Əli Məsimli: “Şəkinin inkişaf proqramında rayonun aktual problemləri öz əksini tapacaq”

Fevral ayının 3-də 114 saylı Şəki kənd birinci seçki dairəsindən deputatlığa namizəd Əli Məsimli növbəti görüşünü rayonun Baş Göynük və Baş Şabalıd kəndlərində keçirib.

Reyting.az xəbər verir ki, görüşdə seçicilərlə yanaşı, deputatlığa namizədin vəkilləri - pedaqogika elmləri doktoru, professor Firədun İbrahimov, dosent Qüdurət Bəkirov seçki qəragahının üzvləri, könüllülər iştirak ediblər.

Deputatlığa namizədin vəkili professor Firədun İbrahimov, dosent Qüdurət Bəkirov Əli Məsimlinin həyat və fəaliyyəti haqqında görüş iştirakçılarına məlumat verdikdən sonra vətəndaşları daha çox narahat edən sosial məsələlər və Şəkinin sosial-iqtisadi problemləri ilə əlaqədar deputatlığa namizədin parlamentdəki çıxışlarını əks etdirən qısa videoçarx təqdim edilib.

Əli Məsimli Milli Məclisdəki 4 illik fəaliyyəti barədə seçicilərə hesabat verib və seçkiqabağı platformasının əsas məqamlarını təqdim edib, ona yenidən etimad göstəriləcəyi təqdirdə parlamentdəki fəaliyyətinin gələcək istiqamətləri barədə danışıb.

Deputatlığa namizəd çıxışında bildirib ki, 114-cü dairənin və ümumiyyətlə Şəkinin problemlərini öyrənəndən sonra, buna əlavə olaraq həm də sosioloji sorğular da keçirmişik: “Bu əsasda Şəkinin 2011-2020-ci illər üzrə inkişaf proqramını hazırladıq. Həmin proqramın 2016-2020-ci illəri əhatə edən hissəsini yenidən işləyib 26 əsas problem üzrə Nazirlər Kabinetinə və digər aidiyyatı orqanlara müraciət etdik. Müraciətdə öz əksini tapan məsələlərin bir hissəsi - xüsusən də Şəki kəndlərinin qazlaşdırılmasının sürətləndirilməsi, kəndlərarası yolların çəkilişi, məktəb tikintisi və sair bu kimi məsələlər dövlət investisiya layihələrinə salınıb və həll olunub.

Amma həllini gözləyən məsələlər də çoxdur. Onların arasında torpaqla bağlı problemlər xüsusi yer tutur: Əhaliyə verilən pay torpaqlarının sənədləşdirilməsi prosesi zamanı yol verilmiş qanunsuzluqların aradan qaldırılması vacibdir. Torpaq islahatı zamanı əhaliyə verilən pay torpaqlarına hüquqi sənədin verilməməsi və ya buna maddi imkanlarının olmaması səbəbindən subsidiya hesablanmasında və güzəştli mineral gübrə alınmasında problemlər yaranır. Bundan əlavə, əkin sahələrinin suvarılması üçün subartezian quyularının qazılması, Baş Şabalıd kəndinə təbii qazın verilməsi, eləcə də Göynüklər zonasının şəhərdən kifayət qədər uzaq olmasını nəzərə alaraq burada Fövqaladə Hallar Nazirliyinin yanğından mühafizə dəstəsinin yaradılması də həllini gözləyən məsələlər sırasındadır”.

Əli Məsimli bildirib ki, Şəki rayonunun aktual problemləri bu dəfə də Şəkinin 2021-2025-ci illər üzrə inkişaf proqramında öz əksini tapacaq və bu problemləri sistemləşdirib yenə də aidiyyatı orqanlara göndərəcək və reallaşdırılması istiqamətində səy göstərəcək.

Görüş çox izdihamlı, faydalı çıxışlarla yaddaqalan olub. Əvvəlki görüşlərdəki çıxışlarında olduğu kimi, Əli Məsimli bu dəfə də seçiciləri islahat prosesində aktiv olmağa, öz həyat şəraitlərinin yaxşılaşdırılması prosesində fəal iştirak etməyə çağırıb.

Çıxış edənlər Əli Məsimlinin parlamentdəki fəaliyyətini, Şəki rayonunun problemlərinin həlli istiqamətində gördüyü işləri yüksək qiymətləndirməklə yanaşı, həm də kəndlərin problemlərinin həllinin sürətləndirimləsinə öz imkanları daxilində təsir göstərməsini istəyiblər. Seçicilər namizədə uğurlar arzulayıblar və onu yenidən Milli Məclisdə görmək istədiklərini, ona səs verəcəklərini bildiriblər.

Əli Məsimli: “Şəkinin inkişaf proqramında rayonun aktual problemləri öz əksini tapacaq”