125 saylı dairədən namizəd Sumqayıtda seçicilərlə izdihamlı görüş keçirdi

125 saylı Zəngilan-Qubadlı seçki dairəsindən deputatlığa namizəd Faiq Alməmməd oğlu Kərimov fevralın 2-də Sumqayıt şəhərindəki Nəriman Nərimanov adına mədəniyyət evində seçiciləri ilə görüşüb.

İzdimalı keçən görüşdə deputatlığa namizədin vəkilləri fevralın 9-da Zəngilan və Qubadlı rayonlarından olan seçiciləri ən layiqli namizəd hesab etdikləri Faiq Kərimova səsverməyə çağırıblar.

Seçicilər də çıxışlarında bu dairədən deputatlığa iddialı olan namizədlərə yox, məhz Faiq Kərimova səs verəcəklərini vurğulayıblar. Onların fikrincə, bundan əvvəl həmin dairədən deputat seçilən və yenidən mandata iddialı olan şəxs 25 il ərzində verdiyi vədlərin əksəriyyətini yerinə yetirməyib. Faiq Kərimov isə müxtəlif vəzifələrdə işlədiyi müddətdə belə, həm zəngilanlıların, həm də qubadlıların problemlərinin həlli üçün əlindən gələn yardımı edib. Seçicilər bu dəfə kimlərinsə boş vədlərinə aldanmayacaqlarını, fevralın 9-da ən layiqli namizədə səs verəcəklərini söyləyiblər. Çıxış edənlər səsvermənin nəticələrinin saxtalaşdırılmasına imkan verməmək üçün hamını seçki məntəqələrinə gəlməyə çağırıblar.

Faiq Kərimov seçicilərinə müraciətində deyib ki, görüşə gələnlərin böyük əksəriyyətinin həm yaxşı, həm də pis günlərində bir yerdə olublar: “Bayaq çıxış edənlərdən biri dedi ki, rayonlarımız işğal olunanda Araz çayından keçib gəlmişik. Arazı keçməklə çoxları gəlib. Amma Qubadlı və Zəngilan əhalisi kimi heç kim gəlməyib. Bura toplaşanların əksəriyyəti ilə pis günlərimizi orada görmüşük, Araz çayının qırağında. Araz bizə arxalıq etdi, biz Xocalıdakı əhalinin gününə düşmədik”.

Faiq Kərimovun sözlərinə görə, camaatı həm yaralı, həm imkanlı, həm də imkansız vaxtında onun arxasında durub: “Bunları unutmaq mümkündürmü? Burada oturanlar məni, mən də onları yaxşı tanıyırıq. Bura toplaşanların heç birini icra hakimiyyəti dəvət etməyib”.

Deputatlığa namizəd ona olan təzyiqlərdən də danışıb: “Bütün təzyiqlərə baxmayaraq, mən sonadək mübarizə aparacam, bunun üçün sizin gücünüzə də arxalanıram. Mənə qarşı olanlara səslənirəm: qorxmursunuzsa, açıq mübarizəyə gəlin. Onda kimin kim olduğu bilinəcək. Seçkiyə çox az qalıb. Onların mübarizəsi üzbəüz deyil. Mənə verilən məlumata görə, icra hakimiyyətinin üzvləri, icra nümayəndələri bura gələnlərin qarşısını kəsib camaatın bura gəlməmələri üçün yoldan qaytarıblar”.

Faiq Kərimov deputatlığa namizədliyini irəli sürməsinin səbəblərini də açıqlayıb:

“Qubadlının 95, Zəngilanın isə 60-dan çox kəndi var. İki rayonun ağsaqqalları mənə namizədliyimi irəli sürməyimi təklif ediblər. Mənim həmişə ağsaqqal məsləhətinə ehtiyacım olub və heç vaxt onların sözündən çıxmamışam. 1986-cı ildə Qubadlıya gələndən sonra da məni püxtələşdirən, məni Faiq Kərimov edən, məni Azərbaycana tanıtdıran bu el-oba olub. Mən o el-obaya minnətdaram.

Prezidentimiz İlham Əliyevin parlamentin buraxılmasının başlıca səbəbinin tərkibin yenilənməsi olduğunu deməsi də məni namizədliyimi irəli sürməyə ruhlandırdı. Mən məhz Prezidentimizin demokratik seçki keçiriləcəyi ilə bağlı fikirlərinə arxalanaraq bu addımı atmışam. Səhv, yaxud düz etdiyimi deyə bilmərəm”.

Faiq Kərimovun sözlərinə görə, 125 saylı seçki dairəsindən namizədliyini irəli sürənlərin əksəriyyəti gənclərdir və onlarla bu və ya digər formada təmasda olub: “Onlarla müəyyən fikir mübadiləsi də aparmışıq. Ancaq Milli Məclisdə təcrübəsi çox olan İmamverdi İsmayılov mənimlə fikir mübadiləsi aparmayıb. Bu da onu deməyə əsas verir ki, ya qarşısındakı adam ondan güclüdür, yaxud arxasında böyük bir qüvvə, böyük el-oba var, bəlkə də bundan çəkinir. Mən ona camaatla üzbəüz görüşə getməsini məsləhət görmürəm. Çünki keçmiş deputat kimi yenə də namizəd olan digərləri ilə müqayisədə daha pis durumla üzləşə bilər. Mən elimizin-obamızın bir üzvü kimi onun belə duruma düşməsini istəmirəm”.

Deputatlığa namizəd seçki platformasından da danışıb: “Mənim yeganə yaralı yerim Qarabağ problemidir”.

Faiq Kərimov deputat seçilərsə, Qarabağ əlillərinin, şəhid ailələrinin problemlərinin həlli istiqamətində bütün məsələlərdə ən fəallardan biri olacağını vurğulayıb.

O, seçiciləri fevralın 9-da səsvermədə aktiv iştirak etməyə çağırıb.

125 saylı dairədən namizəd Sumqayıtda seçicilərlə izdihamlı görüş keçirdi