Deputatlığa namizədə qarşı qarayaxma kampaniyası başlayıb

Deputatlığa bəzi namizədlər güclü rəqiblərinə qarşı qarayaxma kampaniyasına start veriblər. Seçiciləri qarşısında özlərini ifadə edə bilməyən belə namizədlər imkan daxilində güclü, yüksək intellekti ilə seçilən və seçicilər tərəfindən yüksək səviyyədə qarşılanan deputatlığa namizədi ləkələməyə, ona böhtan atmağa çalışırlar.

Haqqında böhtanlar yazılanlardan biri də 84 saylı Füzuli Seçki Dairəsindən deputatlığa namizəd, tanınmış iqtisadçı-alim Vüqar Bayramovdur.

Vüqar Bayramovun həm seçicilər, həm respublikanın elmi ictimaiyyəti tərəfindən dəstəklənməsi, eyni zamanda Qarabağ qaziləri, Şəhid ailələri və Milli Qəhrəmanın onun təbliğat-təşviqat kampaniyasına qoşulması “rəqiblərini” ciddi narahat edib. Bu səbəbdən də sosial şəbəkələrdə bəzən saxta profillər arxasında gizlənmiş “qoçaqlar” mümkün vasitələrlə Vüqar Bayramovun yüksək səviyyəli tədbirlərinə kölgə salmağa və çoxsaylı seçici dəstəyinə mane olmağa çalışırlar.

Reyting.az xəbər verir ki, seçki qərargahı Vüqar Bayramova qarşı başlanmış “Qara piar” kampaniyası ilə bağlı mətbuata müraciət edib.

Müraciətdə bildirilir ki, deputatlığa namizəd Vüqar Bayramov seçkiqabağı təşviqatla bağlı nümunəvi və məhsuldar seçki kampaniyası aparır, respublikamızın müxtəlif bölgələrində məskunlaşmış bütün məcburi köçkün həmyerliləri ilə görüşlər keçirməyə, heç kəsi unutmamağa çalışır:

“Vüqar Bayramovun görüşlərinə gələn həmyerlililərimiz təsdiq edərlər ki, digər namizədlərin varlığı yalnız “bu dairədən seçkiyə qoşulanların hər biri bizim həmyerlimizdir, fevralın 9-da seçkiyə gəlin, layiq bildiyiniz namizədə səs verin”,- şəklində xatırlanmışdır.

Ancaq bu dairədən bəzi deputatlığa namizədlər, onların havadarları olan sosial şəbəkə istifadəçiləri və saytlar yanvarın 17-dən başlayaraq təbliğat-təşviqat kampaniyalarını həmin dairədən namizədliyi qeydə alınmış Vüqar Bayramovun işgüzar nüfuzuna xələl gətirən böhtan və qarayaxma üzərində quraraq, etik çərçivələri və hüquqi normaları kobud şəkildə pozurlar”.

Müraciətdə qeyd olunur ki, 17 və 18 yanvar tarixlərində müvafiq olaraq Sumqayıt şəhərində və Lökbatan qəsəbəsində V. Bayramovun seçicilərlə görüşünü pozmağa cəhd edən bəzi namizədlərin hüquqazidd hərəkətlərini əks etdirən video-görüntülər olsa da, bəzilərinin məqsədli şəkildə yaratdıqları süni gərginliyin aradan qaldırılması məqsədilə onları bu günədək geniş ictimai auditoriyaya təqdim etməyiblər:

“Aşağıdakı linklərə daxil olmaqla, əslində kimlərin pozuculuq fəaliyyəti ilə məşğul olduğunu, zala yığılan seçicilərin Vüqar Bayramovu dəstəkləmək üçün ora gəldiklərini, görüşün Vüqar Bayramovun seçki qərargahı tərəfindən təşkil olunmasına rəğmən, qərargahın rəhbəri tərəfindən kompromis nümayiş etdirilərək digər namizədlərin səhnəyə dəvət edildiyini, bu dəvətin seçicilər tərəfindən etirazla qarşılanmasına baxmayaraq, zalı sakitləşdirdiyini, digər namizədlərə qulaq asmaq istəməyən görüş iştirakçılarının Vüqar Bayramovun komandası zalı tərk etdikdən sonra könüllü şəkildə ayağa qalxaraq bayıra çıxdıqlarını görəcəksiniz.

Görüşlərdə Füzuli rayonunun dövlət qurumları rəhbərlərinin və icra strukturları nümayəndələrinin iştirakı və dəstəyi barədə əsassız ittihamlar səsləndirənlər niyə ortaya video və ya foto-görüntü qoymurlar?

Bildiririk ki, V. Bayramovun görüşlərində çəkiliş aparılmasına seçki qərargahı tərəfindən heç bir məhdudiyyət qoyulmur, əksər hallarda bu görüşlərdən tanımadığımız həmyerlilərimiz canlı yayımlar edirlər. Əgər belə bir fakt olsaydı, çoxdan ortaya çıxardı”.

Qeyd olunur ki, hər bir görüşdən sonra seçicilərin Vüqar Bayramovu asanlıqla buraxmaq istəməməsi, onunla səmimi ünsiyyəti davam etdirməyə çalışması Füzuli camaatının onun şəxsiyyətinə hörmətini nümayiş etdirməklə yanaşı, seçicilərin guya görüşlərə zorla gətirilməsi barədə heç bir əsası olmayan iddiaları da alt-üst edir:

“Qeyd edək ki, Vüqar Bayramovun bütün görüşləri lentə alınır, həmin video-görüntülər yaxın günlərdə “Youtube”yə yerləşdiriləcək”.

Seçki qərargahı bəyan edir ki, son günlər iddiaları potensialları ilə tərs mütənasib olan bu psevdo hüquqşünaslar V. Bayramovun artan nüfuzuna və ona bəslənən yüksək seçici rəğbətinə qarşı bütün çirkli texnologiyaları işə salaraq böhtan və hədyan yoluna sadiq olduqlarını bir daha nümayiş etdirirlər:

“Bu gün Azərbaycan yeni dönəmin astanasındadır. Hər bir deputatlığa namizəd üçün bərabər şərtlərin yaradıldığı bir vaxtda 50 minə yaxın seçicisi olan Füzuli Seçki Dairəsində sözünü deməyə 10 seçici tapmayan, ətrafındakı qohum-əqrəbasını, dost-tanışını seçici kimi kəndbəkənd gəzdirən və 20 il əvvəlin çığır-bağır ritorikası ilə müşayiət olunan “çamur at, izi qalsın” metodu ilə mübarizə aparanların son addımları göstərdi ki, onlar seçkidə uğursuzluqlarını gizlətmək üçün bütün yollara əl atmağa hazırdırlar”.

Müraciətdə yazılır ki, Füzuli rayonunda V. Bayramovdan başqa bütün namizədlərin plakatlarının cırıldığını yazanların vicdanlarının mövcudluğuna rayon ərazisində yaşayanların şübhə ilə yanaşması üçün də ciddi əsaslar var:

“Vüqar Bayramovun seçki qərargahı “Qara piar” kampaniyası həyata keçirən deputatlığa namizədlər və onların havadarları barədə müvafiq hüquqi ölçünün götürülməsi məqsədilə qanunvericilikdə nəzərdə tutulan qaydada, sivil yollarla mübarizə aparmaq üçün müvafiq prosedurların başladıldığını və seçicilərin dinlənilməsi, onların qayğı və istəklərinin öyrənilməsi istiqamətində bu günədək aparılan intensiv seçki kampaniyasının bundan sonra da davam etdiriləcəyini bəyan edir”.

Reyting.az

Ana səhifəyə dön