YAP-ın qərarına qarşı çıxan "arxalı" YAP-çı: Ramin Əhmədovun seçkiyə qatılmasının arxasında kimlər durub?

Xəbər verdiyimiz kimi, 16 saylı Yasamal ikinci seçki dairəsi üzrə seçki yarışı hərarətli keçir.

Reyting.az Mia.az-a istinadla xəbər veirr ki, bu dairədən hakim partiya - YAP Yasamal rayon Gənclər və İdman idarəsinin rəisi Səfərov İlham İlyas oğlunun namizədliyini irəli sürsə də, bu dairədə ən çox diqqət çəkən məqamlardan biri də YAP-ın burada daha bir vəzifəli namizədinin daha iddialı formada seçki yarışına qatılmasıdır.

O, "RX SƏRDAROĞULLARI HOLDİNG" MMC-nin meneceri adı ilə seçkiyə qatılmış, əslində isə, YAP Nizami rayon təşkilatının sədr müavini, eyni zamanda, təşkilatın İdarə Heyəti ilə Siyasi Şurasının üzvü Ramin Əhmədovdur.

Onun, həm də nazir Kəmaləddin Heydərovun atası Fəttah Heydərovun köməkçisi olması, siyasi dairələrdə daha "dumanlı" vəziyyət yaradıb.

Maraqlıdır, seçkiyə partiya mənsubiyyətini gizlədərək "bitərəf" kimi 16 saylı dairədən seçkiyə qatılan R.Əhmədov YAP-da mühüm vəzifə daşıdığı halda, partiyanın rəsmi qərarını niyə gözardı edib? O, 16 saylı dairədə seçkiyə qatılmaqla nəyi planlayıb? Bu vəziyyəti partiyanın rəhbərliyi, yaxud Nizami rayon təşkilatının sədri Sədaqət Vəliyeva necə qarşılayır? Onların məqsədi nədir?...

Partiyanın ica katibinin müavini Siyavuş Novrzuzov Ramin Əhmədov kimi seçkiyə qatılmış partiyadaşlarını nəzərdə tutaraq, APA-ya deyib ki, YAP-ın Nizamnaməsinin 3-cü bölməsində partiyanın təşkilati prinsipləri və üzvlük qaydalarına dair birinci maddə var: "Həmin maddəyə uyğun olaraq, YAP rəhbər orqanlarının qərarı bütün aşağı partiya təşkilatları və onların üzvləri üçün məcburidir. Həmçinin həmin maddənin 3.7-ci hissəsində göstərilir ki, partiya üzvləri hər bir rəhbər orqanın qərarını yerinə yetirməyə borcludur. Bu qərarları yerinə yetirməyən şəxs partiyanın rəhbər orqanlarının qərarını yerinə yetirmədiyinə görə Nizamnamə tələblərinə uyğun olaraq partiya üzvlüyündən xaric edilir, xəbərdarlıq olunur, töhmət verilir”.

YAP icra katibinin müavini qeyd edib ki, seçki kampaniyası çox ciddi aksiyadır: “Bu prosesdə partiyanın qərarları yekdilliklə yerinə yetirilməlidir. Burada gücün bir istiqamətdə qoyularaq partiyanın ümumi qələbəsinə sərf olunması lazımdır.

Əlavə namizədliyini irəli sürən Azərbaycan Respublikasının vətəndaşları və YAP üzvləri var ki, vətəndaş kimi seçkidə iştirak etmək hüququndan istifadə edə bilər. Lakin onlar partiya üzvü olduqları üçün partiyanın rəhbər orqanlarının qərarlarını yerinə yetirməlidir. Bu baxımdan YAP-ın 200-dən çox üzvü namizədliyini partiyanın rəsmi şəkildə irəli sürdüyü namizədlərə alternativ olaraq irəli sürdüyü üçün rayon təşkilatları, ilk təşkilatlar, partiyanın Mərkəzi Aparatı tərəfindən onlarla söhbətlər aparıldı. Nəticə etibarilə onların böyük qismi partiyanın ümumi siyasətini əsas götürərək, eyni zamanda partiya üzvlüyü ilə bağlı Nizamnamə tələblərini dərk edərək namizədliyini geri götürdü.

Bir qrup isə bu və ya digər şəkildə öz fikrində qaldı. Həmin şəxslər partiyanın ilk yerli təşkilatı, rayon təşkilatı tərəfindən partiya Nizamnaməsinin tələbinə uyğun olaraq, partiyanın rəhbər orqanlarının qərarını pozduqları üçün partiya sıralarından xaric olunublar. Bu gün üçün YAP-ı 123 seçki dairəsinin hər birində bir namizəd təmsil edir. Qalanları ilə bağlı isə Mərkəzi Seçki Komissiyasına qərarlarımızı təqdim etmişik və həmin şəxslər partiyanın adından istifadə etmək hüququndan məhrum olunublar”.

Göründüyü kimi, YAP çox açıq şəkildə Ramin Əhmədov kimilərə mesajını verib. Sözsüz ki, partiyanın Nizamnaməsindən də, bu qərarından Ramin Əhmədovun da, onun sədri və hazırda Nizamidən deputalığa təkrar namizədliyini vermiş YAP-ın rayon təşkilatının sədri Sədaqət Vəliyevanın da, hətta Fəttah Heydərovun da xəbəri olmamış deyil.

Elə isə bu addımı necə qiymət vermək olar. Bu, YAP-a qarşı seçki təxribatı, yoxsa məlum qruplaşmanın gizli planıdır? Və ən nəhayət, YAP-ın sərt üzü Ramin Əhmədova da göstəriləcəkmi?

Hər halda bu sualların cavabı seçki gününə qədər açıq qalacaq.

Onu da qeyd edək ki, bu dairədən Müsavatın namizədi BDU-nun professoru Almaz Məmmədovadır. Digər fəal namizəd isə "Real"dan Erkin Qədirlidir

YAP-ın qərarına qarşı çıxan "arxalı" YAP-çı: Ramin Əhmədovun seçkiyə qatılmasının arxasında kimlər durub?