Sentyabrın 26-da Azərbaycanda keçiriləcək referendumu izləmək üçün bu günə qədər Mərkəzi Seçki Komissiyasında 117 beynəlxalq müşahidəçi akkreditasiyadan keçib.

Reyting.az xəbər verir ki, bunu jurnalistlərə MSK sədri Məzahir Pənahov deyib.

M.Pənahov qeyd edib ki, bunlar təxminən 35 ölkənin, Avropa Şurası Parlament Assambleyası da daxil olmaqla müxtəlif beynəlxalq təşkilatların nümayəndələri, parlamentarilərdir:

"Müşahidə aparmaq istəyən ölkə vətəndaşlarının sayı da kifayət qədər geniş çeşidlidir. Bura həm siyasi partiyaların nümayəndələri, öz təşəbbüsü ilə müşahidə aparmaq istəyən vətəndaşlar, həmçinin qeydə alınmış təşviqat qrupunun nümayəndələri daxildir. Ümumilikdə müşahidəçilərin sayı 53 minə yaxındır”.

Seçkilərdə 5600-dən arıq seçki məntəqəsinin olacağını deyən MSK sədrinin sözlərinə görə, demək olar ki, hər seçki məntəqəsinə 10-a yaxın müşahidəçi düşür: "Hesab edirəm ki, nəinki 10, hətta 5 nəfər də müşahidə aparsa bu, şəffalığın təmin edilməsi üçün yüksək göstəricidir”.

MSK sədri əlavə edib ki, referendumun keçirilməsi və seçicilərin səs verməsi üçün şərait yüksək səviyyədədir.