Erkin Qədirli: “Çoxları məni öz siyahısında görmək istəyə bilər...”

“Həyatımda inandığım və yaşatdığım bir neçə prinsip var, ömrüm boyu onları pozmamışam. Onlardan biri budur - özünə yaraşdırmadığın və ya başqasının, səndən daha layiq olanın yerini tutma. Bu prinsipi uşaq yaşlarımdan yaşadıram. Bir dəfə bununla bağlı çox ciddi böhran yaşadım, bugünə qədər özümü sorğulayıram”.

Reyting.az xəbər verir ki, bu sözləri Real Partiyasının funksioneri, tanınmış hüquqşünas Erkin Qədirli özünün Feysbuk hesabında yazıb.

Qədirli qeyd edib ki, 1989-cu ildə universitetin hüquq fakültəsinə qəbul imtahanlarını verib: “İmtahan tarix, ictimaiyyət, rus dili və ədəbiyyatdan idi. İmtahanları özüm verdim. Babamdan xahiş etdim ki, məni tapşırmasın. Babamın onsuz da elə bir niyyəti olmayıb, çünki mənim həkim olmağımı istəyirdi, sənədlərimi hüquq fakültəsinə verdiyimə görə məndən yaman incimişdi, yardım etməyəcəyini demişdi. Mənə də elə bu, lazım idi.

Biliklərimə və özümə güvənirdim, amma hüquq fakültəsinin qəbul imtahanlarında tapşırıqsız “5” almaq, demək olar ki, mümkünsüz idi. Odur ki, bütün fənlərdən “4” yazdılar. Rus dili və ədəbiyyatdan aldığım “4” layiqli idi, ona görə də mübahisə etmədim, amma tarix və ictimaiyyət fənlərindən mənə yazılan “4”-dən şikayət etmişdim. Düzəltmədilər. Yekunda, mümkün olan 15 baldan 12 bal aldım.

Hüquq fakültəsinin rus bölməsinə qəbul planı 25 tələbə olub. Onlardan 11 nəfər qızıl və ya gümüş medalla bir imtahandan “5” alanlar, 6 nəfər hazırlıq fakültəsindən gələnlər birbaşa qəbul olundular. Yerdə qalan 8 yerə 13 nəfərin 12 balı vardı. Yəni, mən rahatlıqla qəbul olunmaya bilərdim, şikayət üçün də bir əsasım olmayacaqdı. 5 nəfər bayırda qalmalı idi. Bu mərhələdə babam, öz əlaqələrindən istifadə edərək, məni tapşırdı və məni qəbul etdilər.

O vaxtdan ağlımda cavabız bir sualı tutaraq yaşayıram - başqasının, məndən daha layiq olan birisinin yerinimi tutdum? Bu, mənim üçün çox önəmli məsələdir.

Universitetdə oxuduğum illərdə hərdən eyni söhbətləri eşitməli olurdum. Qrupda imtahan qiymətini pulla, ya da tapşırıqla alanların içində bir neçə yaxşı oxuyan, imtahanları öz gücünə verən tələbələrə hərdən şübhə ilə baxırdılar, “filan müəllimdən heç zaman özün “5” ala bilməzsən” sayaq atmacalar atırdılar. Tutarlı olmurdu - oxuyan tələbə layiq olduğu qiymətini ala bilirdi.

Parlament seçkilərinin konteksti ayrıdır, orası elədir. Odur ki, yuxarıdakı örnəkləri müqayisə üçün yazmadım. Sadəcə, barəmdə “Erkinin parlamentdə yeri hazırdır” deyənlərin həvəsini anlamağa çalışıram. Ya, məni parlamentə buraxsalar “Erkin satıldı” deyəcəklər. Ya da, buraxmasalar, deyəcəklər ki, “Erkin nəyə ümid edirdi? Buraxılmayacağını bilmirdimi?” İstənilən halda özlərini haqlı çıxaracaqlar.

Mən belə söhbətlərə önəm vermirəm. Onsuz da istədikləri kimi yozacaqlar. Mən nəyə layiq olduğumu, nəyi bacardığımı yaxşı bilirəm. Hakimiyyət çevrələrində mənə olan hörməti də duyuram. Ola bilsin, hansısa siyahıda adım da var. Çoxları məni öz siyahısında görmək istəyə bilər, hərəsinin də bunda öz məqsədi ola bilər. Bununla belə, istəyirəm ki, hər kəs bilsin - mən başqasının, özəlliklə məndən daha layiq olan birisinin yerini tutası deyiləm. Üstəlik, özümə yaraşdırmadığım yollarla başqalarından önə çıxmayacağımı da bilirəm.

Ümid edirəm, belə söhbətləri bir daha eşitməli və ya oxumalı olmayacağam. Bu, mənim bu mövzuda yazdığım son yazıdır. Qarşıdan seçkilərə hazırlıq gəlir. Görək haraya qədər gedə bilirəm”.

Ana səhifəyə dön