BQP: “İşğal reallığını dəyişə bilərik”

Bu gün, Böyük Quruluş Partiyasının (BQP) başqanı Fazil Mustafanın sədrliyi ilə partiyanın Siyasi Qurulunun növbəti iclası keçirilib. İclasda, qərarların icra vəziyyəti, ictimai-siyasi vəziyyət, partiyanın bələdiyyə seçkilərində iştirakı vəziyyəti və digər məsələlər müzakirə edilib. Partiya başqanı ictimai-siyasi vəziyyətlə bağlı çıxış edib, Siyasi Qurul üzvlərini maraqlandıran sualları cavablandırıb.

Reyting.az-ın məlumatına görə, iclasda BQP-nin bələdiyyə seçkilərində iştirakı müzakirə edilib, kampaniyanın başa çatmış mərhələsində ayrı-ayrı rayon və şəhər təşkilatlarının işləri qiymətləndirilib və partiyanın ümumilikdə bu sahədəki fəaliyyəti qənatəbəxş hesab edilib.

Bununla yanaşı siyasi partiyaların, siyasi partiya bloklarının, öz təşəbbüsləri ilə iştirak edən vətəndaşların seçkilərdə iştirakını asanlaşdırmaq üçün Azərbaycan Respublikası Seçki Məcəlləsində mövcud olan bəzi tələblərin dəyişdirilməsinin məqsəduyğunluğu vurğulanıb: “Mərkəzi Seçki Komissiyasına təqdim edilən seçki sənədləri əsasında dövlət qeydiyyatına alınan və rəsmi fəaliyyətinə icazə verilən müvafiq siyasi partiyalar seçkiyə buraxılırsa, aşağı seçki orqanlarına da həmin sənədlərin təqdim edilməsinə ehtiyac qalmamalıdır. Siyasi partiyanın Nizamnaməsi və dövlət qeydiyyatına alınmasına dair Şəhadətnamənin notarusuda təsdiq edilmiş surətləri, səlahiyyətli nümayəndələrin, maliyyə məsələləri üzrə səlahiyyətli nümayəndələrin siyahıları, onlara aid təsdiq edilən vəkalətnamələr və s. MSK-ya təqdim edilir. Adı çəkilən qurum öz iclasında həmin sənədləri müzakirə edir, qərarı ilə müvafiq partiya seçkiyə buraxılır və bununla bağlı məlumatlar da qəzetlərdə və digər KİV-lərdə yayımlanır. Buna baxmayaraq, aşağı seçki orqanlarına da həmin sənədlərin təqdim edilməsi məcburiyyəti saxlanılır. Namizədlərin irəli sürülməsi ilə bağlı siyasi partiyaların ali seçkili orqanlarının həm protokolu, həm də qərarı tələb olunur. Halbuki, bunlardan birinin təqdim edilməsi yetərli sayıla bilər. Şəhadətnamə və Nizamnamənin notariusda təsdiq edilən surətləri yuxarı seçki orqanı - MSK ilə bərabər aşağı seçki orqanalarına - DSK-lara da təqdim edilməsi tələbi saxlanılır ki, bu da həm artıq, həm də partiyaların maliyyə baxımından yüklənməsinə də səbəb olan tələbdir. Bu sənədlərin bir nüsxəsinin dövlət notariat orqanlarında təsdiqi vərəqlərin sayından asılı olaraq 21-27 manat arasında dəyişərsə, 125 seçki dairəsinin hər birində namizədlə iştirak edən siyasi partiyalara kifayət qədər böyük məbləğin lazım olduğunu təxmin etmək çətin deyil. Yaxşı olar ki, ölkənin ictimai-siyasi həyatında hiss edilən dəyişim və müsbət tendeniyalar bu sahəyə də sirayət etsin və Seçki Məcəlləsində siyasi partiyaların seçki prosesində iştirakını ağırlaşdıran amilləri aradan qaldırmaqla onların seçkidə aktiv iştirakını təmin edilməsi üçün daha optimal şərait yaradılsın”.

İclasda bələdiyyələrin səlahiyyətlərinin azlığına da diqqət çəkilib: “Azərbaycanda bələdiyyələrin statusu o qədər yetərsizdir ki, şəhər bələdiyyələrindən bəzilərini çıxmaq şərtilə rayon və kənd bələdiyyələrinə namizədlərin irəli sürülməsində rəqabət mühiti belə yaşanmır. Bu hər şeydən əvvəl bələdiyyələrin real özünüidarə orqanlarına, canlı quruma çevrilməməsi ilə bağlıdır. Qabaqcıl ölkələrdə olduğu kimi bələdiyyələrin kifayət qədər nüfuzlu idarəetmə orqanlarına çevrilməsi, dövlətdən dotasiya alan qurumlar olmaqdan xilas olması üçün onun statusu, pul qazanma imkanları artırılmalıdır. Bunun üçün icra hakimiyyəti institutunun geniş səlahiyyətlərinin bir qismi yerli problemləri daha yaxından bilən və əhaliyə ən yaxın olan qurum kimi bələdiyyələrə verilməlidir. Çünki, bələdiyyələr əhali tərəfindən birbaşa seçilən və hesabatlılığın tələb edilməsi mümkün olan qurumlardır”.

BQP Siyasi Qurulu Dağlıq Qarabağ problemini daim diqqətdə saxlamaq ənənəsinə bu dəfə də sadiq qalaraq, münaqişənin həllində tərəfsiz vasitəçilik missiyasını üzərinə götürmüş hər üç həmsdər ölkənin açıq-aşkar ermənipərəst mövqe sərgiləməsinə kəskin münasibət bildirib: “Dağlıq Qarabağ probleminin həllində hər üç həmsədr ölkənin maraqlı olması aşkardır. Lakin bu maraq məsələnin ədalətli həllinə deyil, Qarabağ məsələsinin ermənilərin maraqlarına uyğun həll edilməsinə yönəlib. Praktiki olaraq, ATƏT-in Minsk qrupu da bu marağı təmin etmək üçün fəaliyyət(sizlik) göstərəkdədir. Bizim bu maraqları alt-üst etməmiz üçün bir neçə faktorun xüsusi önəmi vardır: Xarici güclərə bağlı ünsürlərdən təmizlənmiş güclü ordu, çevik xarici siyasət və Qarabağ məsələsinin müzakirəsindən uzaq tutulmuş milli ideologiya ilə silahlanan xalqı bu müzakirələrin içinə qaytarmaq. Bu komponentlərdə sinxronluq təmin edilərsə, bunlar bir araya gətirilərsə, işğal reallığını dəyişə bilərik".

Sonda iclas cari məsələlərin müzakirəsi ilə öz işini yekunlaşırıb.

Ana səhifəyə dön