Səfir: “Erməni diplomatların Azərbaycana yönələn təxribatlarının qarşısı alınır”

“Ölkə başçımızın tapşırıq və göstərişlərinə uyğun olaraq, xarici siyasətimizin əsas istiqamətlərindən biri Ermənistan-Azərbaycan Dağlıq Qarabağ münaqişəsinin Azərbaycanın ərazi bütövlüyü çərçivəsində həllinə yönəlib. Bu gün Azərbaycan diplomatiyasının üzərinə olduqca böyük bir məsuliyyət qoyulub və hər bir Azərbaycan diplomatı bu məsuliyyəti dərk edərək, ölkə rəhbərliyi tərəfindən qarşısına qoyulan vəzifələrin öhdəsindən gəlmək üçün bütün peşəkarlığını və savadını ortaya qoyaraq, öz vəzifə borcuna layiqincə yanaşır və bundan sonra da belə olacaq”.

Reyting.az xəbər verir ki, bu fikirləri Azərbaycanın Ukraynadakı səfiri Azər Xudiyev Xarkovda jurnalistlərə açıqlaması zamanı deyib.

Səfir qeyd edib ki, bu gün Azərbaycan diplomatiyası müsair dünyamızın çağırış və təhdidlərinə cavab verir və beynəlxalq aləmdə dövlətimizin müsbət imicinin formalaşdırılması istiqamətində səylərini əsirgəmir, eləcə də müstəqil dövlətimizə yönələn mümkün geosiyasi risklərin yaranmasına imkan vermir: “Təəssüflər olsun ki, 27 ildən artıqdır Azərbaycanın tarixi torpaqları, o cümlədən Dağlıq Qarabağ ərazisi erməni işğalı altındadır. Ona görə də Azərbaycan diplomatiyasının əsas fəaliyyət istiqaməti bu münaqişənin həllinə yönəlib. Erməni diplomatları tərəfindən xarici ölkələrdə ölkəmizə qarşı yönəlmiş çirkin əməllər və mütəmadi olaraq yaradılan təxribatların qarşısının alınması üçün tərəfimizdən daim böyük işlər aparılır. Azərbaycan həqiqətlərinin beynəlxalq aləmə çatdırılması diplomatiyamızın ən öndə duran vəzifə borcudur".

A. Xudiyev iqtisadi diplomatiyaya da çox böyük önəm verildiyini söyləyib:

“Azərbaycan Prezidenti cənab İlham Əliyevin həyata keçirdiyi sosial-iqtisadi islahatlarla bağlı Azərbaycan diplomatiyası da öz üzərinə düşən vəzifələri yerinə yetirir. Ölkə başçımızın xüsusi göstərişlərinə əsasən, Azərbaycana xarici sərmayələrin cəlb edilməsi üçün diplomatik missiyalarımız tərəfindən bütün gərəkli işlər aparılır”.

Səfir onu da qeyd edib ki, Ukraynada vətəninə və dövlətinə ürəkdən bağlı olan bir çox vətənpərvər iş adamı var:

“Burada Vətənini, dövlətini sevən azərbaycanlılar çoxdur. Onlar Azərbaycanın təbliği istiqamətində səfirliyimiz tərəfindən işlənib hazırlanan layihələrin həyata keçirilməsində bizə daim dəstək olurlar. Ümumiyyətlə, ukraynalılar və burada yaşayan xalqlar doğma vətənimizin qədim tarixi və zəngin mədəniyyəti ilə yaxından tanış olmalıdırlar, bunun üçün təbliğat işləri daha da gücləndirilməlidir. Əminəm ki, Azərbaycan və Ukrayna dostluğu bundan sonra da yüksələn xətlə inkişaf edəcəkdir”.

Səfir vurğulayıb ki, Azərbaycanın Ukraynadakı diplomatik missiyasının fəaliyyəti Ermənistanın Ukraynadakı səfirliyinin fəaliyyətindən daha üstün və səmərəlidir:

“Bütün ölkələrdəki kimi, Ukraynada da çox güclü erməni diasporu mövcuddur və onlar öz səfirliklərinə ənənəvi olaraq hərtərəfli dəstək olurlar. Bəzən onlar şəxsi münasibətlər zəmnində həmin ölkələrin tanınmış simaları və siyasətçiləri ilə səfirlikləri arasında dostluq əlaqələri yaradır və bundan da yararlanırlar.

Bu münasibətdən çıxış edərək, əminliklə deyə bilərək ki, erməni diplomatları diasporaları tərəfindən dəstəyə ümidvar olaraq öz diplomatik fəaliyyətlərini infantil və səmərəsiz məcrada aparırlar. Öz peşəkar fəaliyyət təcrübəmdən deyə bilərəm ki, istər beynəlxalq təşkilatlarda, yəni çoxtərəfli diplomatiyada, istərsə də ikitərəfli diplomatiyada onlar bizdən çox hallarda peşəkarlıqda geri qalırlar.

Səfirliyimiz Azərbaycan həqiqətləri haqqında Ukraynanın kütləvi informasiya vasitələri ilə çox fəal şəkildə təbliğat işləri aparır. Ukraynanın nüfuzlu təhsil ocaqlarında, milli maraqlarımıza uyğun müxtəlif mövzülarda mühazirələr oxunulur, silsilə tədbirlər təşkil edilir. Ukraynanın paytaxtı və eləcə də böyük şəhərlərində ölkəmizin təbliğat işlərinin daha səmərəli və effektif şəkildə aparılması üçün səfirliyimizin təşəbbüsü və dəstəyi ilə Azərbaycan mədəniyyət və informasiya mərkəzləri artıq fəaliyyətə başlayıb”.

Reyting.az

Ana səhifəyə dön