Trampın sanksiyaları Tehranla İrəvanı çətin vəziyyətdə qoyub

“ABŞ-ın İrana qarşı sanksiyaları Ermənistana zərbə vurdu”.

Reyting.az “Eurasianet”-ə istinadla xəbər verir ki, təhlilçi Ani Meclumyanın məqaləsi belə adlanır.

Müəllif yazır: “İrəvanda təhsil alan 24 yaşlı tehranlı qız Rojin Daeiyə keçən ilin noyabrında bankdan zəng gəldi. Bankdan verilən məlumata görə, onun hesabı bağlanacaq və pulunu bundan əvvəl götürməlidir. Ertəsi gün İrəvanda yaşayan bacısına başqa bir bankdan da oxşar zəng gəldi. Onlar Ermənistanın müxtəlif banklarında yeni hesablar açmağa cəhd etdilər, lakin istəklər dönə-dönə rədd edildi. Dedilər: "Siz iranlısınız və amerikalılarla probleminiz var".

Müəllif yazır ki, iranlı bacıların bank problemləri milli təhlükəsizlik müşaviri Con Boltonun İrəvana səfərindən sonra meydana çıxıb.

Məqalədə qeyd olunur ki, Vaşinqtonun təzyiqi İrəvanın əl-qolunu bağlayır: o, uzaq fövqəldövlətlə yaxşı münasibətləri qorumağa çalışır, eləcə də sərhədi bölüşdüyü cənub qonşusu ilə də mehriban olmaq istəyir. Keçmişdə ABŞ bu çətinliyi dərk edərək, Ermənistanın İranla münasibətlərinə laqeyd yanaşıb. Lakin Tramp administrasiyası dövründə vəziyyət dəyişib.

ABŞ-ın İrəvandakı səfirliyindən bildiriblər: "Biz Ermənistana ABŞ-ın bölgədəki vacib tərəfdaşı olaraq baxırıq. Buna görə də, Ermənistan hökumətinə və özəl sektora açıq şəkildə bildirdik ki, Ermənistanın beynəlxalq birliyin üzvü kimi öz vəzifələrini yerinə yetirməsini, bölgənin sabitliyini pozmağa səylər göstərən və terrorizmi dəstəkləyən İranla əlaqələrini dayandırmasını gözləyirik. Sanksiyalarımızın Ermənistana yönəlmədiyini, əksinə, İran rejiminin maliyyələşdirilməsinə kömək edən və ya zərərli fəaliyyətlərini başqa şəkildə dəstəkləyən dünyanın müəyyən qurumlarına yönəldiyini söylədik. Eyni mesajı bütün tərəfdaşlarımıza İranla əməkdaşlıq haqqında göndəririk".

Müəllif yazır: “ABŞ keçən ilin noyabrında İrana qarşı sərt sanksiyalar tətbiq etdikdən az sonra, Ermənistandakı iranlılar və İranla iş görən ermənilər təzyiqləri hiss etməyə başladılar.

İrana ət ixrac edən bir erməni iş adamı “Eurasianet”-ə bildirib ki, indi Rusiya banklarından istifadə edərək işini aparmaq məcburiyyətindədir.

Hakimiyyətlərin diqqətini cəlb etməmək üçün adının çəkilməməsini xahiş edən iş adamı deyib: "Bunların hamısı ötən ilin noyabr ayında başladı və getdikcə daha da artdı”.

Ermənistan və İran arasında ticarət dövriyyəsi kiçikdir: 2018-ci ildə 364 milyon dollar. İqtisadçı və parlamentin üzvü Artak Manukyan 2019-cu ilin ilk rübündə İrana ixracatın, 2018-ci ilin eyni dövrü ilə müqayisədə, 30 faiz azaldığını, ancaq idxalın da 30 faiz artdığını söyləyib.

İranın Rusiyanın rəhbərlik etdiyi Avrasiya İqtisadi Birliyi ilə sərbəst ticarət müqaviləsi var və Ermənistanın da üzvü olduğu təşkilata tam üzv olmaq istəyir. "Biz ümid edirik ki, İran Avrasiya İqtisadi Birliyinə üzvlüyünü başa çatdırır və bu səbəbdən ortaq bir tərəfdaşımız olacaq”.

Reyting.az

Ana səhifəyə dön