Zərdüşt Əlizadə: “...100 milyardlarla pulumu banklarında dondurmusan”

BMT Baş Assambleyasında Tramp-Ruhani görüşünün baş tutması gözlənilən idi. Əslində İran tərəfi belə bir görüşə hazır idi və öncədən şərtini irəli sürmüşdü.

İran deyir ki, biz uzun illər danışıqlar apardıq və qarşılıqlı güzəşt əsasında nüvə anlaşması əldə etdik. Bu razılaşma BMT Təhlükəsizlik Şurasında beynəlxalq qanun kimi təsdiq olundu. Hamı da, bundan razı idi.

Amma Tramp prezident seçilən kimi bu müqaviləni rədd etdi. Çünki İsrail belə istəyirdi. Niyə İsrailə görə, ABŞ müqavilədən çıxır və əvvəlki öhdəlikləri yerinə yetirən İrana sanksiyalar tətbiq etməyə başlayır və sonra da deyir ki, gəl danışıqlara? Bu halda nə üçün İran səninlə danışmalıdır? Sən ki, imzaladığın müqavilədən geri çəkilirsən, sözünə və imzana hörmət etmirsən.

Bu sözləri Reyting.az-a politoloq Zərdüşt Əlizadə İran-ABŞ münasibətlərini və Nyu-Yorkda ehtimal olunan Ruhani-Tramp görüşünün baş tutmamasını şərh edərkən deyib.

Onun fikrincə, Nyu-Yorka getməzdən öncə Prezident Ruhani çıxış edib və bildirib ki, özünə hörmət etməyən şəxslərlə danışıqlar olmayacaq: “İran deyir ki, mənm özümə hörmət edən ölkəyəm, sən mənə təzyiqlər təşkil edirsən, iqtisadiyyatıma mane olursan, 100 milyardlarla pulumu banklarında dondurmusan. Sən belə edirsən, mən də səni saymıram. Əlindən gələnin beş qatına artıq et. Sən məni hədələdiyin kimi, mən də səni hədələyirəm. Deyirsən ki, İranı vuracağam, mən də deyirəm ki, sənə və müttəfiqlərinə zərbə endirəcəyəm. Görək buna sona qədər kim dözəcək. Mömün İran xalqı, yoxsa sizin eyn-işrətdə olan cəmiyyətiniz.

İran güclü, ideologiyası olan dövlətdir. İran hakimiyyəti xalqa söykənir. Belə olan halda kənardan kiminsə gəlib “mən səni diz çökdürərəm”, - bəyanatı işləmir”.

Zərdüşt Əlizadə əlavə edib ki, Nyu-Yorkda Almaniya, Fransa və Böyük Britaniya liderlərinin Səudiyyə Ərəbistanın neft obyektlərinə endirilən zərbəyə görə, İrana qarşı bəyanat verməsi biabırçı hadisədir: “Əslində bu ölkələr ABŞ-ın yedəyində gedir. ABŞ nə desə, bu üç ölkə onu edəcək. Qərb ittifaqı nəzəri baxımdan diktatorların sədrlik etdiyi partiyalar kimidir. Orada müstəqil düşünən, söz sahibi olan dövlət yoxdur. Hamısı ABŞ qarşısında baş əyir. Qərb aləmində bir-iki itaət etməyən ciddi siyasətçi vardı, onları da öldürdülər. İndi hamı ABŞ-ın sözü ilə otrub durur. ABŞ-a itaət etməyən Çindir, İrandır və Şimali Koreyadır. Qalan hamısı itaət edir, hətta Rusiya. Rusiya bir çox məsələlərdə ABŞ-ın dediyini can-başla həyata keçirir. Məsələn, pulunu ABŞ banklarında saxlayır, milli məzənnəsi ABŞ dolları ilə uzlaşdırır, onların sözü ilə hərəkət edir. ABŞ deyəndə ki, İrana silah vermə, Rusiya deyir, baş üstə”.

Reyting.az

Ana səhifəyə dön