Komitə sədri ilə nazir soydaşlarımızın probleminə biganə yanaşır

Gürcüstanda yaşayan soydaşlarımızın təhsil problemləri artıb. Belə ki, Gürcüstanın təhsil nazirinin müavini səviyyəsində keçirilən toplantıda səslənən fikirlər deməyə əsas verir ki, bu ölkədə fəaliyyət göstərən milli məktəblərimiz bağlana və soydaşlarımız assimliyasiyaya məruz qala bilərlər.

Nazir müavini qeyd edib ki, təqaüd yaşına çatmış müəllimlər iki illik müavinətlə məktəblərdən kənarlaşdırılacaq. Bu, ilk baxışdan islahat təəssüratı yaratsa da, Gürcüstanda milli kadrların hazırlanmasında ciddi problemlər var və gənc kadrların yaşlı nəsli əvəzləməsi də mümkün olmayacaq. Bu isə milli məktəblərimizin bağlanması ilə nəticələnəcək.

Reyting.az-ın məlumatına görə, məsələ ilə bağlı Correct.az-a danışan "Soydaş" İctimai Birliyinin təşkilat komitəsinin sədri Kamran Ramazanlı bildirib ki, Diasporla İş üzrə Dövlət Komitəsinin sədri Fuad Muradov bu istiqamətdə vədlər versə də, vədinə əməl etməyib. Azərbaycanın təhsil naziri Ceyhun Bayramov isə çoxsaylı müraciətlərə reaksiya vermir:

"Gürcüstanda milli məktəblərimizin bağlanma təhlükəsi yaranıb. Belə ki, Gürcüstanın təhsil nazirinin müavini iyun ayında məktəb direktorları ilə müşavirə keçirib, orada deyib ki, təqaüd yaşında olan müəllimlərin hər biri iki illik müavinətlə birlikdə işdən azad oluna bilərlər. Əgər onlar yenidən işləmək istəyirlərsə 15 kredit balı yığmalıdırlar. Təqaüd yaşına çatmış müəllimlər isə müasir tələblərə uyğun şəkildə, kompüterlərlə 15 bal yığa bilməyəcəklər, bu isə təqaüd yaşı çatan müəllimlərin təqaüdə çıxarılması deməkdir. Bu, ilk baxışdan təhsildə islahat kimi görünə bilər. Yəni təqaüd yaşına çatmış müəllimlər yeni, enerjili, gənc müəllimlərlə əvəz olunacaq. Ancaq bu islahat bizim oradakı milli məktəblərimizə ciddi problemlər yaradacaq. Çünki milli məktəblərimiz üçün yeni kadrlar demək olar ki, yox səviyyəsindədir”.

Komitə sədri ilə nazir soydaşlarımızın probleminə biganə yanaşır

K. Ramazanlı

K. Ramazanlının sözlərinə görə, bu qərar nəinki gürcülər, hətta Gürcüstanda yaşayan ermənilər üçün də ciddi problem yaratmayacaq: “Axalçixe şəhərində onların Pedaqoji Universiteti var. Məndə olan məlumata görə, Ermənistan hökuməti pedaqoji kadrların hazırlanması üçün kvota ayırıb ki, kadrlar gedib Ermənistanda təhsil alıb qayıtsınlar. Bizdə isə vəziyyət fərqlidir.

Sovetlər dönəmindən sonra bizim 183 məktəbimiz var idisə, bu gün 117 məktəbimiz var. 7 minə yaxın müəllim var idisə, bu gün 3628 müəllim heyəti qalıb. 50 min şagird var idisə, bu gün 26 min şagird qalıb. Hazırda qalan müəllimlərin isə 80 faizi təqaüdçü və təqaüd yaşına az qalmış müəllimlərdir. Bu "islahat" həyata keçirilərsə - hərçənd ki, həyata keçiriləcək, artıq qocaman müəllimlərin ərizələri də alınıb, - məktəblərimizin sayı 50-yə enəcək, müəllimlərin sayında isə kəskin şəkildə, tam yarısı qədərində azalma yaranacaq. Belə olan halda Gürcüstanda milli təhsil sistemimiz sıradan çıxacaq”.

K. Ramazanlı qeyd edib ki, hazırda fəaliyyət göstərən 117 məktəbdən 40-da Azərbaycan dili və Ədəbiyyat fənnini tədris edənlər qeyri-ixtisas müəllimləridir:

“Böyük faciənin astanasındayıq. Bu çox ciddi məsələdir, lakin aidiyyatı dövlət qurumları bu məsələ ilə bağlı demək olar ki, maraqlanmırlar.

Biz hələ 2018-ci il oktyabr ayının 3-də akademik Ramiz Məmmədovun sədrliyi ilə böyük toplantı keçirdik, 20-ə yaxın tanınmış alim, millət vəkillərimizlə birlikdə müraciət hazırladıq ki, milli məktəblərimizlə bağlı vəziyyət nə yerdədir, nə kimi problemlər var, xahiş edirik, bu məsələ ilə bağlı köməklik edilsin”.

Təşkilat komitəsinin sədri qeyd edib ki, kvotanın ayrılması da məsələnin tam həlli yolu deyil: “Təbii ki, Azərbaycan dili, Ədəbiyyat fənni ilə bağlı kvota ayrılmalıdır. Qeyd etdiyim kimi, hazırda 40 məktəbdə Azərbaycan dili, Ədəbiyyat fənni müəllimi yoxdur. Azərbaycan təhsil sistemi ilə Gürcüstan təhsil sistemi arasında ciddi fərqlər var. Ona görə də biz yerli şəraitə uyğun kadrlar hazırlamalıyıq. Bunun üçün də Tiflisdə Azərbaycan və Gürcüstan dövlətlərinin birgə təsis edəcəyi universitet lazımdır ki, bizim milli məktəblərə kadr hazırlasın. Bununla bağlı aidiyyatı qurumlara və Təhsil Nazirliyinə müraciət göndərilsə də, təəssüflər olsun ki, heç bir cavabı və nəticəsi yoxdur. Eyni zamanda Diasporla İş üzrə Dövlət Komitəsinin sədri Fuad Muradov bu yaxınlarda Gürcüstanda səfərdə idi. O, soydaşlaırmızla görüşdə iki vəd verdi. Qeyd etdi ki, biz Azərbaycan hökuməti olaraq qərar qəbul edəcəyik ki, bu il üçün Pedaqoji universitetlərdə kadr hazırlanması üçün kvota ayrılsın. Həmçinin Gürcüstanın baş naziri ilə Gürcüstan-Azərbaycan Pedoqoji Universitetinin yaradılması ilə bağlı ilkin razılıq əldə olunduğunu bildirdi və əlavə etdi ki, bu istiqamətdə səylərimizi davam etdirəcəyik. Amma yeni tədris ilinin başlanmasına sayılı günlər qalsa da, kvota məsələsindən də bir xəbər yoxdur. Deməli, Fuad Muradov verdiyi vədi yerinə yetirə bilmədi.

Biz çox ciddi sınaq qaşırındayıq. 40 minə yaxın soydaşımız Tiflis ətrafında assimliyasiyaya məruz qalıb. Təsəvvür edin, onlardan soruşuram ki, Nizami Gəncəvi kimdir, deyirlər, inqilabçı. Soydaşlarımız gürcü dilində təhsil alırlar, milli məktəblərimiz yoxdur”.

K. Ramazanlının sözlərinə görə, 20 nəfərin imzası ilə Prezident Administrasiyasına göndərdikləri müraciətə baxılması üçün Təhsil Nazirliyinə göndərilsə də, onlar bu müraciətə nə şifahi, nə də yazılı cavab verməyiblər: “Eyni zamanda bir qrup ziyalı Ceyhun Bayramova müraciət ünvanladı, ona da cavab verilmədi”.

Reyting.az

Ana səhifəyə dön