Deputat Həsənov PKK-ya dəstək bəyanatları verdi

Ermənistanda hakim “Mənim addımım” blokundan deputat, kürd icmasının rəhbəri Knyaz Həsənov Türkiyənin İraqın şimalında PKK-ya qarşı keçirdiyi “Pəncə” əməliyyatını pisləmək üçün mətbuat konfransı keçirib.

Reyting.az-ın məlumatına görə, Virtualaz.org erməni qaynaqlarına istinadla xəbər verir ki, bu aksiya iyulun 19-na keçən gecə Türkiyə Hərbi Hava Qüvvələrinin İraqın şimalında PKK mövqelərinə zərbələr endirməsinin ardınca təşkil olunub. Türkiyə aviasiyası Ərbildə bir türk diplomatının öldürülməsi ilə nəticələnən və PKK tərəfindən həyata keçirilən terror hücumuna cavab olaraq İraqın şimalına hava zərbələri endirib. Bu zərbələrə etiraz Ermənistandan eşidilib. Yerevanda keçirdiyi mətbuat konfransında deputat Həsənov qeyd edib ki, Türkiyə aviasiyasının zərbələri nəticəsində “dinc əhali” həlak olub. Deputat bildirib ki, Ərbildə türk diplomatının öldürülməsinə görə məsuliyyəti heç bir təşkilat üzərinə götürməyib. Lakin bu hücumu PKK həyata keçirmiş olsaydı belə onu “düzgün qəbul edərdilər”.

Deputat Həsənov PKK-ya dəstək bəyanatları verdi

Knyaz Həsənov İraqın şimalındakı kürd administrasiyasını da “Türkiyənin hücumlarına laqeyd qaldıqları üçün” tənqid edib.

“Məsələn, bu gecə Türkiyə aviasiyası İraq Kürdüstanı ilə sərhəddəki Mahmur düşərgəsini bombalayıb, orada BMT-nin himayəsi ilə qaçqınlar məskunlaşıb. Ölənlər, yaralananlar var. Bu da o deməkdir ki, türk dövləti kürdləri məhv etmək istəyir”, - Ermənistandakı yezidi kürd icmasının rəhbəri deyib.

Knyaz Həsənov İmralı həbsxanasında saxlanılan PKK lideri Abdullah Öcalan haqda da danışıb. Deyib ki, ona son 8 ildir vəkilləri ilə görüşə icazə verilmirdi, amma İstanbulda keçirilən seçkilər ərəfəsində buna şərait yaratdılar. Çünki İstanbulda “milyonlarla kürd” yaşayır və onların səsini qazanmaq istəyirdilər.

Ermənistanda fəaliyyət göstərən “Kürdüstan” komitəsinin sədri Slo Drobyan da Türkiyəni qınayıb, bu ölkənin “Osmanlı imperiyasının sərhədlərini bərpa etmək istədiyini” bildirib. Drobyanın sözlərinə görə, İraqın şimalındakı regional kürd hökuməti kürdlərin səsini dinləmir, Ərdoğanla əməkdaşlıq edir və susur.

“Biz regiondakı demokratik qüvvələri həmin kürd administrasiyası ilə əməkdaşlıq etməməyə çağırırıq”,-Drobyan deyib.

Deputat Həsənov PKK-ya dəstək bəyanatları verdi

Qeyd edək ki, son vaxtlar Ermənistan hakimiyyətinin PKK-ya birbaşa dəstəyi haqda məlumatlar tez-tez yayılır. Türkiyə qaynaqlarının məlumatlarına görə, Ermənistanın xüsusi xidmət orqanları və hökuməti həm İranın Türkiyə ilə həmsərhəd kəndlərindəki PJAK yaraqlılarına, həm də İraqın şimalındakı PKK-çılara silah və maddi dəstək verir. Ermənistandan dəstəklənən PJAK yaraqlıları İranın Türkiyə ilə sərhədindəki azərbaycanlı kəndlərinə silahlı hücumlar təşkil edir, kəndləri boşaltmağa çalışır.

Deputat Həsənov PKK-ya dəstək bəyanatları verdi

O cümlədən Ermənistanın öz ərazisində və Azərbaycanın işğal altındakı Kəlbəcər, Laçın rayonlarında PKK təlim düşərgələri yaratdığı haqda dəfələrlə məlumatlar verilib. Bu günlərdə isə Ermənistanın dəstəyi ilə Suriyanın şimalında yerli ermənilərdən formalaşdırılan “Ozanyan briqadası” adlı qruplaşmanın görüntüləri yayılmışdı. Həmin qruplaşma ASALA terror təşkilatının yeni adla bərpası kimi qiymətləndirilir.

Ana səhifəyə dön