Qarabağ münaqişəsi müəllim və tələbələrlə müzakirə olunub

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə Tətbiqi Tədqiqatlar Fondu “Ermənistanın Azərbaycana qarşı işğalçılıq siyasətinin fəsadlarının işıqlandırılması və onların qarşısının alınması yolunda Azərbaycanın mövqeyinin təbliği” layihəsi çərçivəsində ATMU ilə birgə "Ermənistan-Azərbaycan Dağlıq Qarabağ münaqişəsinin hazırkı vəziyyəti və onun inkişaf dinamikası” mövzusunda seminar keçirib.

Reyting.az-a verilən məlumata görə, seminarda ATMU-nin müəllimləri, tələbələri, KİV və QHT nümayəndələri iştirak ediblər.

ATMU-nun Xidmət mühəndisliyi fakültəsinin dekanı Kənan Allahverdiyev problemin aktuallığından danışaraq, onun regionun həyatında böyük əhəmiyyətini vurğulayıb. Azərbaycanın ictimai həyatının ən vacib problemlərindən biri olan Qarabağ münaqişəsinin daim diqqətə çatdırılması, Azərbaycanın ədalətli mövqeyinin mütəmadi olaraq dünya ictimaiyyətinə çatdırılmasının vacibliyi bildirilib.

Layihənin rəhbəri İbrahim Əliyev “Qarabağ münaqişəsinin mahiyyəti, səbəbləri, məqsədləri” adlı məruzəsində münaqişənin başlama səbəbləri, onların tarixi köklərini ətraflı təhlil edib, bu münaqişəni törədənlərin məqsədlərindən söz açıb. Məruzədə qeyd olunub ki, Qarabağda alovlandırılmış münaqişə Azərbaycan xalqına, türk xalqlarına, müsəlman dünyasına qarşı uzun illərdən bəri qərb dövlətlərinin apardığı məkrli siyasətin mərhələlərindən biridir. O, regionda onların ağalıq etmək, onu təsir altında saxlamaq, sərvətlərini talan etmək məqsədi ilə yaradılmış münaqişə ocaqlarından biridir. Ermənistan isə bu münaqişədə ən mənfur rolu oynayır. Onlar öz qonşularına xəyanət edərək dünyanın mürtəce güclərinin sifarişlərini reallaşdırmağa kömək etməklə, öz maraqlarına çatmaq istəyirlər. Onlar göstərdikləri “xidmətlərin” müqabilində Azərbaycanın, Türkiyənin torpaqlarının bir hissəsini zəbt etmək, talanlar törətmək, qarət etmək məqsədi güdürlər. Onların cəzasızlığının, törətdikləri özbaşınalıqlara göz yumulmasının başlıca səbəbi də məhz bu amildir. Buna görə də bu problemin ədalətli həllinin başlıca şərti problemin əsasında duran qüvvələrin dəqiq, faktlarla aşkar edilərək üzə çıxarılması, onların niyyətlərinin ortaya qoyulması, məqsədlərinin ifşa edilməsidir.

İkinci məruzədə siyasi elmlər üzrə fəlsəfə doktoru Zaur Əliyev “Ermənistan-Azərbaycan Qağlıq Qarabağ münaqişəsinin həlli üzrə ATƏT-in Minsk qrupunun fəaliyyətinin problemləri” mövzusunda beynəlxalq təşkilatların bu münaqişəyə olan münasibətlərində olan ziddiyyətlər, onların səbəbləri haqqında müzakirələrə istiqamət verib. Qeyd olunub ki, Azərbaycanın problemlərinə münasibətdə beynəlxal təşkilatların ikili mövqe nümayiş etdirməsi bir çox mətləblərdən xəbər verir. Bildirilib ki, bu ziddiyyətli mövqelər dünya güclərinin buradakı böyük maraqlarını və onların hər birinin öz maraqlarına uyğun hərəkət etdiklərinin göstəricisidir.

Ermənistanın beynəlxalq hüququn norma və prinsiplərini kobud şəkildə pozmasına böyük dövlətlərin və beynəlxalq təşkilatlarının kifayət qədər ciddi yanaşmaması münaqişənin uzanmasına və ağır fəsadlar verməsinə yol açır. Minsk qrupunun fəaliyyəti ilk baxışda passivlik kimi qəbul edilə bilər. Lakin onların qəsdən ləng hərəkət etmələri, prinsipial məqamlarda qeyri-müəyyən mövqe tutmaları onların passivliyinin deyil, fərqli maraqlaının olması qənaaətini yaradır.

Hüquqşünas-alim Asif Qədirov isə öz məruzəsində diqqəti münaqişənin hüquqi aspektlərinə yönəldib. Bildirib ki, formal olaraq Ermənistan bu münaqişədə işğalçı tərəf kimi tanınsa da, ona heç bir beynəlxalq təzyiq göstərilmir. BMT-nin qətnamələri uzun illərdir ki, icra olunmur. Bu da bu münaqişədə çoxsaylı gizli maraqların olmasını sübut edir. Bütün bunlara baxmayaraq Azərbaycan dövlətinin möhkəm mövqe və əzm nümayiş etdirməsi beynəlxalq aləmdə xeyli irəliləyişlərin əldə edilməsinə gətirib çıxarıb.

Fərid Həsənsoy öz çıxışında Azərbaycan ordusunun 2016-cı il aprel döyüşlərində əldə etdiyi uğurların münaqişədə dönüş etdiyini vurğulayıb. Bu döyüş bir tərəfdən Azərbaycanın öz torpaqları uğrunda dönməz mövqeyini, qətiyyətini nümayiş etdirirsə, digər tərəfdən ermənilərin ümidlərinin üstündən xətt çəkib.

Sonda məruzələr ətrafında maraqlı müzakirələr aparılıb. Seminarın materialları əsasında kütləvi informasiya vasitələrində və sosial şəbəkələrdə müzakirələrin davam etdirilməsi nəzərdə tutulub.

Qarabağ münaqişəsi müəllim və tələbələrlə müzakirə olunub