İcra Hakimiyyəti şura sədrliyindən qovulan biznesmen haqqında araşdırma aparır

Məlum olduğu kimi, İmişli rayonunun Sarıxanlı kəndində 9 May – faşizm üzərində Qələbə Günü münasibətilə keçirilən tədbir ölkədə böyük rezonans doğurub.

Belə ki, İkinci Dünya müharibəsi xatirə kompleksinin üzərinə keçmiş SSRİ bayrağı sancılıb, tədbir zamanı Sovet mahnıları səsləndirilib, iştirakçıların yaxasına isə Rusiya hərbi işğalının rəmzi kimi tanınan “Georgiyev lenti” taxılıb. Hadisə cəmiyyət tərəfindən birmənalı qarşılanmayıb.

Məsələ ilə bağlı mətbuata danışan İmişli rayon icra hakimiyyəti başçısının birinci müavini Mirzə Quliyev bildirib ki, hazırda qalmaqallı tədbirlə bağlı araşdırma aparılır: “Bu hadisədən xəbərimiz var. Həmin bayrağı xiyabanda rayon ağsaqqallar şurasının sədri sancıb. Hazırda bu barədə araşdırma aparılır. Lazımi tədbirlər görüləcək”.

Azərbaycan Ağsaqqallar Şurasının İdarə Heyəti isə növbədənkənar iclası keçirib və Saleh Səmədovu vəzifədən qovub.

“İdarə Heyəti Şuranın adına ləkə gətirən hərəkətlərə yol verdiyinə, Azərbaycan Ağsaqqallar Şurasının Nizamnamə tələblərini kobud şəkildə pozduğuna görə Saleh Səmədovun İmişli Rayon Ağsaqqallar Şurasının sədri vəzifəsindən azad edilməsi, o cümlədən Azərbaycan Ağsaqqallar Şurasının üzvlüyündən çıxarılması barədə qərar qəbul edib” – deyə, Ağsaqqallar Şurasının İdarə Heyətinin məlumatında bildirilirb..

Milli Məclisin İmişlidən olan deputatı Razi Nurullayev isə “AzPolitika”-ya açıqlamasında məsələni araşdırmadığını əsas gətirərək açıqlama verməkdən imtina edib.

“Hadisəni araşdırmamışam. Bu səbəbdən hər hansı açıqlama verə bilmərəm. Hər halda dövlət orqanları məsələni araşdırıb, qiymət verəcəklər”, – deyə deputat bildirib.

Məsələ ilə bağlı diqqət çəkən daha bir açıqlama isə rayon Ağsaqqallar Şurasının sədri və tədbirin əsas təşkilatçısı Saleh Səmədovdan gəlib. O, tədbirdə baş verənlərə haqq qazandıraraq SSRİ bayrağının tədbir zamanı qaldırılmasını belə izah edib: “Bu sadəcə olaraq bizim tariximizdir. Burada nə var ki?! Cavan nəsil o bayrağı bilmir, biz isə o bayraq altında doğulmuşuq… Müharibənin rəmzi olaraq biz o bayrağı oraya qoymuşduq. “Georgiyev lenti” də rəmzdir, ona görə də taxmışdım… Burada Türkiyə bayrağı da dalğalanır, bəs ona niyə bir söz demirsiniz?!”.

Göründüyü kimi, baş verən bu biabırçılığın mərkəzindəki əsas şəxs – Saleh Səmədov SSRİ bayrağına və “Georgiyev lenti”nə fəxrlə haqq qazandırmaqla yanaşı, utanmadan Rus imperiyasının davamı olan, ilk müstəqil Cümhuriyyətimizin mövcudluğuna son qoyan, Azərbaycanda 1937-ci il repressiyalarının, 20 yanvar qətliamının baiskarı olan SSRİ-nin bayrağı ilə qardaş Türkiyə bayrağını eyniləşdirir. Bu, sadəcə tarix sarıdan bisavadlıq nümunəsi deyil, həm də Türkiyəyə, eləcə də milli kimliyimizə qarşı açıq nifrətin və “rusbaşlığın” göstəricisidir. Həmçinin bu, planlaşdırılmış təxribat təsiri bağışlayır və qətiyyən təsadüfi, bisavad adamın beyninin məhsuluna bənzəmir…

Ana səhifəyə dön