Qu quşunun “son nəğməsi” » arxiv.reytingaz.info

Digər adı “sona” olan Qu quşu əcəlinin çatdığını hiss edəndə son nəğməsini ifa edir və canını tapşırır.

Vəzifəsindən “sui-istifadə”. Bütün normal ölkələrdə olduğu kimi, yəqin Birləşmiş Ştatların Cinayət Prosessual Məcəlləsində də belə bir maddə var. Söhbət vəzifə səlahiyyətlərini aşaraq, dövlətin və millətin ona etibar elədiyi postun imtiyazlarından şəxsi mənafeyi naminə yararlanmaqdan gedir. Necə ki, ABŞ Prezidenti Cozef Bayden iki məhkəmə işi üzrə ittiham olunan və təqsiri sübuta yetirilən oğlu Hanteri əfv etmək qərarına gəlib. Bu barədə Ağ evin mətbuat xidməti tərəfindən yayılan rəsmi məlumatın altından qeyri-rəsmi çox şeylər boylanır. Tutaq ki, Baydenin xalqa müraciətində dediyi “Bu gün mən oğlum Hanter üçün əfv imzaladım” açıqlamasında müəyyən qədər səmimiyyət dozası var. Axı, bu hadisə özünü “demokratiyanın beşiyi”, “qanunun şahdan da üstün olduğu” bir ölkədə baş verir. ABŞ tarixində, görəsən, nə vaxtsa belə bir presedent olubmu? Cavab verməyə çətinlik çəkirik...

Təkcə Amerika xalqı yox, bütün dünya bilirdi ki, Baydenin oğlu əyyaş, narkoman, cinayət törətmiş şəxsdir. Məhkəmə hələ 2018-ci ildə onun vergidən yayınması və qanunsuz silah saxlaması ilə bağlı araşdırmaya başlamışdı. 2023-cü ilin dekabrında isə konkret ittiham irəli sürülüb və barəsində məhkəmə qərarı var. Bu ilin martında isə Hanter Bayden məhkəmə qarşısına çıxarılmalı idi. Proses bir qədər ləngisə də, məhkəmənin iyunun 3-də keçirilən iclasında prokurorlar H.Baydenə qarşı silah saxlamaqla bağlı ittiham irəli sürdülər. Bundan başqa, o, həmçinin narkotik vasitə qəbul etmədiyi barədə yazılı yalan məlumat verdiyinə, narkomanların odlu silaha sahib olmasını qadağan edən qanunu pozduğuna görə də ittiham olunur. Altı ildən sonra başa çatan istintaq və məhkəmə prosesi iyunun 11-də yekunlaşıb. ABŞ qanunvericiliyinə əsasən, narkotik vasitələrin istifadəçilərinə odlu silah saxlamaq qadağasını pozan Hanter Bayden məsuliyyətə cəlb edilib. Günahı sübuta yetiriləcəyi təqdirdə onu 25 ilədək həbs cəzası və 750 min dollar məbləğində cərimə gözləyirdi.

Prezident kreslosunda əyləşmə müddəti ayyarımdan sonra başa çatacaq Cozef Bayden öz səlahiyyətindən sui-istifadə edərək oğlunu azadlığa buraxdı. Yəni, əfv etdi. O, vaxtında tüfeyli həyat tərzi keçirdiyinə görə ictimai qınaq hədəfinə çevrilən narkoman, cinayətkar, əxlaqsız oğlunu ata kimi bağışlaya bilər. Bunu başa düşmək mümkündür. Amma, ortada ağır cinayətlərdə ittiham olunan ABŞ vətəndaşı var. Məgər dövlət başçısının oğlu belə ittihamlarla üzləşən yeganə müttəhimdir ki, ona qarşı istisna hal kimi bu boyda “xeyirxahlıq” göstərilsin, əfvlə mükafatlandırılsın?

Bəs, oxşar cinayətlərdə ittiham olunan yüzlərlə, bəlkə də minlərlə vətəndaşın həbsxanaya düşməsinin qarşısını kim alacaq? Onlara kim “atalıq qayğısı” göstərəcək?

Bu da sizə “amerikasayağı”, daha doğrusu, “baydensayağı demokratiya”. İndi kim bizə sübut edə bilər ki, demokrat Baydenin bu jesti səlahiyyətdən sui-istifadə, qanunun aliliyinin pozulması demək deyil? Elə ABŞ-nin seçilmiş prezidenti Donald Trampın sələfinin addımını məhz bu cür qiymətləndirməsi tamamilə başadüşüləndir.

Vaşintondakı Ağ evin dairəvi kabinetində əyləşib dünya ölkələrinə qanunun aliliyindən dərs keçən, altdan-altdan terrorçuları dəstəkləyən, üzdə “Ermənistan-Azərbaycan münasibətlərinin normallaşması prosesinə töhfələr verən”, arxada isə separatçıları, işğalçı İrəvanı maliyyələşdirən, eləcə də postsovet məkanındakı respublikalara insan hüquqlarının pozulması ilə bağlı bəyanatlar ünvanlayan Bayden özü ən ali səviyyədə qanunsuzluğa əl atdı. Qu quşu əcəlinin çatdığını hiss etdiyi kimi, Bayden də, çox güman ki, “son nəğməsi”ni oğlunun şərəfinə ifa elədi. Onun “bu ifası” ABŞ tarixinə ən uğursuz və biabırçı qanunsuzluq aktı kimi düşəcək.

İ. HƏSƏNQALA,
“Xalq qəzeti”,
3 dekabr

Ana səhifəyə dön