Keçmiş deputat 5.5 milyonluq mənimsəmə ittihamını qəbul etmir

Keçmiş deputat Hüseyn Abdullayev öz məhkəməsinə gətirilmir, saxlandığı Bakı İstintaq Təcridxanasından videokonfrans şəklində məhkəmə prosesinə qatılır.

Ötən məhkəmə iclaslarından birində təcridxanada onun vəziyyəti pis olduğuna görə, başı qarşısındakı masanın üstünə qoyulmuş vəziyyətdə çəkilmiş fotosu mediada yayılandan sonra Hüseyn Abdullayev sentyabrın 19-da məhkəmə prosesi zamanı kamera önündə dayanmaq istəməyib. O, həmçinin özünü yaxşı hiss etmədiyini bildirib.

6 il yarıma yaxındır ki, həbsdə olan sabiq deputatın işinə Bakı Ağır Cinayətlər Məhkəməsində baxılır. Hakim Azər Tağıyevin sədrliyilə keçirilən bugünkü məhkəmə prosesində onun vəkili Cavad Cavadov müvəkkilinin səhhətinin ağır olduğunu bildirib. Müdafiəçi Avropa İnsan Haqları Məhkəməsinin də bugünlərdə Hüseyn Abdullayevin səhhətilə bağlı qərar qəbul etdiyini yada salaraq, müvəkkilinin həkim Adil Qeybulla tərəfindən istintaq təcridxanasında müayinəsinə icazə verilməsi barədə vəsatət qaldırıb. Vəkilin sözlərinə görə, bunun üçün Penitensiar Xidmətə də müraciət ediblər, bu qurum “yox” deməyib. Amma oradan cavab verilib ki, əgər məhkəmə razılıq versə, həkimin müayinəsinə şərait yaradarlar.

Hüseyn Abdullayevin digər vəkili Günay İsmayılova sabiq deputatın son aylar ərzində səhhətindəki problemlər nəticəsində 16 kiloqram çəki itirdiyini məhkəmənin diqqətinə çatdırıb.

Hakimlər Adil Qeybullanın Bakı İstintaq Təcridxanasında keçmiş deputatı müayinə etməsilə bağlı vəsatəti təmin edib.

Daha sonra prokuror ittiham aktını elan edib. Orada iddia olunur ki, Hüseyn Abdullayev özü və ailə üzvlərinin adlarına Azərbaycandakı banklarda açılmış 7 hesab vasitəsilə ümumilikdə 5.5 milyon manatdan çox pulu həm yerli, həm də xarici banklardakı hesablara köçürüb, yaxın qohumunun adına Azərbaycanda daşınmaz əmlaklar alıb.

Ona qarşı Cinayət Məcəlləsinin 193-1.3.2 (cinayət yolu ilə əldə edilmiş xeyli miqdarda əmlakı leqallaşdırma) maddəsi ilə ittiham irəli sürülüb.

Bu maddənin sanksiyasında 7 ildən 12 ilədək azadlıqdan məhrumetmə cəzası nəzərdə tutulub.

İttihama münasibət bildirən sabiq deputat onun saxta və əsassız olduğunu deyib, özünü təqsirli bilmədiyini vurğulayıb.

“Qətiyyən özümü təqsirli bilmirəm. Hamısı şər-böhtandır”, – Hüseyn Abdullayev bildirib.

Keçmiş deputatın digər vəkili Ceyhun Yusifov bildirib ki, ittihamın mahiyyəti aydın deyil. Vəkil deyir ki, ittihamda 2006-cı ildə baş vermiş hadisədən bəhs olunur. Amma həmin dövrdə cinayət qanunvericiliyində “cinayət yolu ilə əldə edilmiş xeyli miqdarda əmlakı leqallaşdırma” maddəsinin “külli miqdarda ziyan vurmaqla törədildikdə” hissəsi yox idi.

“Olmayan norma ilə necə ittiham vermək olar? Gərək bu norma doğulsun ki, onunla kimisə ittiham edəsən də…”, – vəkil bildirib.

Məhkəmə prosesində şahid kimi İlqar Mustafayev ifadə verib. O bildirib ki, 30 ildir Hüseyn Abdullayevgili tanıyır. Uzun illər bu ailənin yanında işləyib, onların mülkiyyətləri, təsərrüfat işlərinin idarəçiliyində iştirak edib. Bunun üçün ona etibarnamə veriblər: “Mən əsasən atası Abbas Abdullayev və anası Zeynəb xanımla işləmişəm. Bütün tapşırıqları onlardan almışam. Onların verdiyi baş etibarnamələrlə iş görmüşəm”.

Şahid deyir ki, Hüseyn Abdullayevlə birbaşa işləməyib, amma sabiq deputatın Bakının mərkəzinfə – Neftçilər prospektindəki mağazasının administratoru o olub.

O əlavə edib ki, Hüseyn Abdullayevin qanunsuz fəaliyyəti, cinayət yolu ilə əldə etdiyi vəsaitləri leqallaşdırması barədə nəsə eşitməyib.

Sabiq deputatın məhkəməsi oktyabrın 3-də davam edəcək.

Hüseyn Abdullayev 2018-ci ilin aprelində İstanbulda saxlanılaraq Azərbaycan hüquq-mühafizə orqanlarına təhvil verilib. Keçmiş deputat Bakı Hərbi Məhkəməsinin 2019-cu ilin oktyabrında çıxardığı hökmə əsasən, dələduzluq, vergidən yayınma, cinayət yolu ilə əldə olunmuş vəsaitlərin leqallaşdırılması kimi ittihamlarla 6 il azadlıqdan məhrum edilmişdi.

Cəzasının başa çatmasına ay yarım qalmış – bu ilin martında onun barəsində yenidən cinayət işi başlanıb. Ona bu dəfə Cinayət Məcəlləsinin 193-1.3.2-ci (cinayət yolu ilə əldə edilmiş xeyli miqdarda əmlakı leqallaşdırma) maddəsilə ittiham verilib. O, bir neçə ölkədə külli miqdarda pulu leqallaşdırmaqda təqsirləndirilir.

İddia olunur ki, Hüseyn Abdullayev özü və ailə üzvlərinin adlarına Azərbaycandakı banklarda açılmış 7 hesab vasitəsilə ümumilikdə 5.5 milyon manatdan çox pulu həm yerli, həm də xarici banklardakı hesablara köçürüb, yaxın qohumunun adına Azərbaycanda daşınmaz əmlaklar alıb. Bu yolla da külli miqdarda vəsaiti leqallaşdırmaqda təqsirləndirilir.

Lakin sabiq deputat ittihamı qəbul etmir. O, özünü təqsirli bilmədiyini bildirib.

Barəsindəki cinayət işinə gəlincə, hesab edir ki, onu həbsdə saxlamaq üçün saxta iş hazırlayıblar.

Hüseyn Abdullayevə ittiham verilən Cinayət Məcəlləsinin 193-1.3.2 maddəsində 7 ildən 12 ilə qədər azadlıqdan məhrumetmə cəzası var.

Bu, Hüseyn Abdullayev haqqında üçüncü cinayət işidir. İlk dəfə o, 2007-ci ildə parlamentin iclasında digər deputat Fəzail Ağamalı ilə davaya görə həbs olunmuş, bir müddət sonra şərti cəza ilə azadlığa buraxılmışdı. Azadlığa çıxandan sonra Almaniyaya mühacirət edən keçmiş deputat 2014-cü ildə orada sığınacaq almışdı(MeydanTV).

Ana səhifəyə dön