Azay Quliyev rəqibini hədələyir, deputatlığa namizəd dövlət başçısına müraciət edib

Milli Məclisin keçmiş deputatı, hazırda 8 saylı Binəqədi Seçki Dairəsindən yenidən deputatlığa namizəd olan Azay Quliyev qeyd edilən dairədə gərginlik yaradıb.

Mia.az xəbər verir ki, həmin dairə üzrə deputatlığa namizəd Rəhimov İlkin Oruc oğlu Azərbaycan Respublikasının Prezidenti İlham Əliyevə, Baş prokuror Kamran Əliyevə, Dövlət Təhlükəsizliyi Xidmətinin rəisi Əli Nağıyevə, İnsan Hüquqları üzrə Müvəkkil (Ombudsman) Səbinə Əliyevaya, Mərkəzi Seçki Komissiyasının sədri Məzahir Pənahova, Ədliyyə naziri Fərid Əhmədova, Ədliyyə nazirinin müavini - Penitensiar xidmətin rəisi Mirsaleh Seyidova, 8 saylı Binəqədi Birinci Seçki Dairəsinin sədri Natiq Əliyevə, Penitensiar Xidmətin 11 saylı cəzaçəkmə müəssisəsinin rəisi Şakir Qəniyevə şikayət məktubu ünvanlayıb.

Şikayət məktubunu təqdim edirik:

"Çox hörmətli cənab Prezident!

Mən bu il - 1 Sentyabr 2024-cü ildə keçiriləcək növbədənkənar parlament seçkilərində iştirak etmək üçün öz təşəbbüsümlə MSK-nın 8 saylı dairəsinə müraciət etmişdim.

Müvafiq proseduru keçdikdən sonra dairədən mənə imza vərəqələri verildi və imzatoplama kampaniyasını müvəffəqiyyətlə başa çatdırıb sənədləri yenidən 8 saylı Seçki Dairəsinə təqdim edərkən, mənə bildirdilər ki, neçə illərdi bizim daimi deputatımız Quliyev Azay Əjdər oğludur. O, səninlə görüşmək istəyir, onunla görüş, sonra sənin namizədliyinin qeydə alınmağına baxarıq. Sözün düzü, bu mənə qəribə görünsə də, etiraz etmədim və deputatlığa namizəd olan Quliyev Azay Əjdər oğlu ilə görüşə hazır olduğumu bildirdim.

Bizi əlaqələndirdilər və deputatlığa namizəd Quliyev Azay Əjdər oğlu məni öz kabinetində qəbul etdi. İlk anda məni pis qarşılamasa da, sonradan namizədliyimi geri götürüb onun yanında olmağımı tələb etdi. Məndən rədd cavabı aldıqdan sonra isə mənə qarşı münasibəti dəyişdi və təhdid olaraq bildirdi ki, mən həm Prezident yanında Əfv Komissiyasının üzvüyəm, həm də Penitensiar Xidmətin rəisi general Mirsaleh Seyidovun qohumuyam (Əgər bu, təhdid deyildisə, nə üçün qohumlarından yalnız birini mənə xatırlatdı, məgər digər qohumları yoxdur ki? O, bununla mənə, əgər namizədliyimi geri götürmərəmsə, həmin qohumundan – Penitensiar Xidmətin rəisi ədliyyə general-mayoru Mirsaleh Seyidovdan mənə və atama qarşı bir zor aparatı kimi istifadə edə biləcəyini diqqətə çatdırdı), baxma ki, səninlə belə mehriban danışıram, deputatlığa namizədliyin qeydə alınsa, səninlə belə “mülayim” danışmayacam, danışıq tərzim dəyişəcəkdir.

Əvvəlcə onun bu təhdidlərini ciddi qəbul etmədim (necə ola bilər ki, prezident İlham Əliyevin administrasiyasında işləyəsən, sənə etimad göstərilib yüksək vəzifə versin, amma sən onun siyasətinə qarşı gedəsən – ədalətsizliklər edib hədə-qorxularla seçki prosesinə müdaxilə və təzyiq edəsən!) ta o vaxta qədər ki, mənim yaxın qohumlarımdan birini də çağırıb o tərzdə təhdid və hədələrlə qorxutmamışdılar.

26.08.2024-cü ildə (Azərbaycan Respublikasının Birinci vitse-prezidenti hörmətli Mehriban xanım Əliyevanın doğum günü) yaxın qohumlarımdan birini çağırıb deyiblər ki, Rəhimov İlkin Oruc oğluna deyin ki, namizədliyini geri götürsün, çünki (bu dəfə yenə də həmin şəxs yaxın qohumuma Quliyev Azay Əjdər oğlunun mənə dediklərini eynilə təkrarlayaraq, sadəcə, qohumluq əlaqələrini bildirərkən xüsusi isimlərin yerini dəyişərək deyib) bilirsiniz də, Quliyev Azay Əjdər oğlu general Mirsaleh Seyidovun qohumudur, onsuz da 11 saylı cəzaçəkmə müəssisəsindəki seçki qutusundan general Mirsaleh Seyidov kimi desə, o çıxacaqdır. Cəzaçəkmə müəssisəsinin rəisinin cəsarəti çatmaz ki, generalın bir sözünü iki etsin (əlbəttə, görünür, istər qanuni – istərsə də qeyri-qanuni göstərişləri nəzərdə tutubdur), seçki bitdikdən sonra, əgər Rəhimov İlkin Oruc oğlu deputat seçilməzsə, onda atasının vəziyyətinin necə olacağını düşünsün.

Cənab Prezident!

Sizin vəzifəyə təyin etdiyiniz şəxslərdən ədalətli, vicdanlı insanlardan çoxunu tanıyırıq, amma istisna olaraq ona həvalə etdiyiniz vəzifədən öz şəxsi mənafeyi üçün sui-istifadə edənlər də vardır, o cür insanların “xidməti” sayəsində atamın həyatına təhlükə yaradılıb, təhdidlər edilir.

Yuxarıda qeyd etdiklərimi nəzərə alaraq 8 saylı seçki dairəsində (daha doğrusu, Penitensiar Xidmətin 11 saylı cəzaçəkmə müəssisəsində) ədalətli seçkilərin keçirilməyi üçün orada nəzarəti gücləndirmək, seçkilər bitdikdən sonra həmin müəssisədə və həmin seçki məntəqəsində, hətta 8 saylı seçki dairəsinin bütün məntəqələrində yoxlamalar aparmaq, eləcə də atamın həyatı (həmçinin də mənim həyatım) üçün yaranmış təhlükəni aradan qaldırmaq məqsədilə müvafiq tədbirlər görülməkdən ötrü xüsusi göstəriş verib yoxlamaları, həmçinin yoxlamaların nəticələrinə müvafiq tədbirlərin görülməyini öz xüsusi nəzarətinizdə saxlamağınızı xahiş edirəm.

Hörmətlə,

8 saylı Binəqədi Birinci Seçki Dairəsindən deputatlığa namizəd Rəhimov İlkin Oruc oğlu".