Rusiya səfiri Bakı-İrəvan əlaqələrinin normallaşdırılmasını dəstəkləyir

“Azərbaycanla Ermənistan arasında sülh müqaviləsinin imzalanması Bakı və İrəvanın siyasi iradəsindən asılı olacaq. Ümid edirəm ki, bu, tezliklə baş verəcək”.

Reyting.az xəbər verir ki, bunu Rusiyanın Azərbaycandakı səfiri Mixail Yevdokimov rusdilli Azərbaycan jurnalı “Utro”ya ("Səhər") müsahibəsində deyib.

O bildirib: “Biz Azərbaycan və Ermənistan arasında davam edən münasibətlərin normallaşması prosesini, o cümlədən iki ölkənin xarici işlər nazirləri arasında mayın 10 və 11-də Almatıda sülh müqaviləsi üzrə danışıqları alqışlayırıq. Bu, Cənubi Qafqazda davamlı sülhə və firavanlığa nail olmaq üçün daha bir addımdır.

Rusiya, Azərbaycan və Ermənistan liderlərinin iki müttəfiq ölkəmiz arasında barışıq prosesi üçün alternativsiz “yol xəritəsi” müəyyən etməsi vacibdir. Söhbət sülh müqaviləsinin işlənib hazırlanmasından və bağlanmasından, regionda nəqliyyat kommunikasiyalarının qarşısının alınmasından, sərhədin delimitasiyası və demarkasiyasından, vətəndaş cəmiyyətləri arasında müntəzəm təmasların qurulmasından gedir.

Bu baxımdan Azərbaycan və Ermənistan arasında dövlət sərhədinin delimitasiyası və demarkasiyası prosesinin davam etdirilməsini dəstəkləyirik. Hesab edirik ki, o, davamlı, balanslaşdırılmış və qarşılıqlı məqbul olmalıdır. Lazım gələrsə, tərəflərə məsləhətçi yardım göstərməyə hazırıq.

Xarici təzyiqlərə gəlincə, aprelin 5-də Brüsseldə keçirilən Ermənistan-ABŞ-Aİ yüksək səviyyəli görüşü xarici qüvvələrin regionun işlərinə məsuliyyətsiz və dağıdıcı müdaxiləsinin bariz nümunəsidir. Azərbaycan Prezidenti Əliyevin dəfələrlə səsləndirdiyi qiymətləndirmə ilə tam razıyıq ki, görüşün məqsədi Cənubi Qafqazda bölücü xətlər yaratmaqdır.

Bu qəbildən başqa bir nümunə Aİ-nin Ermənistandakı hazırkı müşahidə missiyasıdır. Kanadadan bir “mütəxəssis”in əlavə edilməsi ilə faktiki olaraq o, şübhəli məqsədləri olan paramilitar Qərb əməliyyatına çevrildi. Missiyanın heyəti artıq ən azı 2 dəfə artırılıb və yeni müşahidə məntəqələri açılır. Missiyanın Qərbin hibrid müharibəsinin aləti olması faktını isə məxfiliyi, hesabatsızlığı və istər Ermənistan, istərsə də Azərbaycan tərəfindən nəzarətsizliyi təsdiqləyir. Açıq-aşkar təxribat xarakterli iş aparılır, missiya anti-Rusiya təbliğatı ilə intensiv məşğul olur, anti-Azərbaycan və anti-İran xarakteri alır.

Əminik ki, Cənubi Qafqazda regional və ikitərəfli xarakter daşıyan istənilən problem 2023-cü ilin oktyabrında Tehranda keçirilən, həm erməni, həm də azərbaycanlı iştirakçıları olan “3+3” Məşvərət Regional Platformasının ikinci görüşü zamanı razılaşdırılmış “regional məsuliyyət” prinsipinə uyğun olaraq həll edilməlidir”.

ELÇİN

Ana səhifəyə dön