Atlantik Şura: “Rusiya onlarla ölkəni işğal edə bilər”

“Ukraynaya Qərb tərəfindən istənilən dəstəyin verilməməsinin səbəblərindən biri də Rusiya Federasiyasının tamamilə dağılması qorxusu və hərbi məğlubiyyətdən sonra ərazisində xaosun yaranmasıdır. Bununla belə, bunlar boş qorxulardır”.

Reyting.az xəbər verir ki, bu barədə Amerikanın Atlantik Şurasının analitikləri yazıb.

Qeyd edilir ki, keçmişdə də Qərb geosiyasi rəqibi və düşməni - SSRİ-nin dağılmasından qorxurub. Hətta ABŞ prezidenti Corc Buş Ukraynanın müstəqilliyini elan etməzdən bir müddət əvvəl Kiyevə gələrək, ukraynalıları Moskvadan ayrılmamağa inandıran bədnam “Cücə Kiyev nitqi” ilə çıxış edib.

“Hər şeydən əvvəl, Qərb liderlərini Sovet İttifaqının nəhəng hərbi maşınının və nəhəng nüvə arsenalının taleyi narahat edirdi. Bunun bir qrup yeni müstəqil dövlətlər arasında bölüşdürülməsinə icazə vermək onlara ağılsızlığın zirvəsi kimi görünürdü. Ona görə də Sovet imperiyasının süqutunu sürətləndirmək əvəzinə, bu prosesin qarşısını almağa və ya heç olmasa, idarə etməyə çalışırdılar. Eyni narahatlıqlar indi Ukraynaya dəstək verməyə mane olur”,- məqalədə qeyd edilir.

Əminlik ifadə olunur ki, Ukraynadakı məğlubiyyət Rusiya dövlətinin xaotik dağılmasından daha çox Putin rejiminin süqutuna və islahatlar dövrünün başlanmasına səbəb ola bilər. Keçmişdə Rusiyanın digər səs-küylü məğlubiyyətlərindən sonra da məhz belə olub: Krım müharibəsindəki məğlubiyyət təhkimçiliyin ləğvinə gətirib çıxardı, 1905-ci ildə Yaponiya ilə müharibədə məğlubiyyət rus parlamentarizminin yaranması ilə nəticələndi.

“Hazırkı işğal da məğlubiyyətlə başa çatarsa, Rusiyanın zərərsiz çıxacağına inanmaq üçün bütün əsaslar var, çünki Ukraynadan geri çəkilmək Rusiyanın milli qüruruna dərin bir yara olsa da, Rusiya üçün ekzistensial təhlükə yarada bilməz”,- deyə materialda yazılır.

Atlantik Şura qərb liderlərinə “Rusiyanın gələcək çöküşünün qorxulu ssenariləri” ilə qorxmağı dayandırmağı və Ukraynada Kremlin qələbəsinin yarada biləcəyi daha ciddi təhlükələrə diqqət yetirməyi tövsiyə edir.

Atlantik Şura bildirir ki, “tarixi rus torpaqlarını geri qaytarmaq bəhanəsi ilə” Kreml Finlandiyadan Qazaxıstana kimi onlarla qonşu ölkəni də işğal edə bilər.

Analitiklər Rusiyanın Ukraynadakı qələbədən sonra çox tükənəcəyi və buna görə də yeni təcavüzə cəsarət etməyəcəyi arqumentini rədd edirlər.

“Təəssüf ki, bu cür arqumentlər Rusiyanın Ukraynadakı uğurlarının təsirini nəzərə almır. Rusiyanın qələbəsi geosiyasi ab-havanı dəyişəcək, Kremlə beynəlxalq dəstəyin artmasına və Qərbin demorallaşmasına səbəb olacaq. Qlobal Cənub ölkələri neytrallıqdan əl çəkəcəklər və Moskva ilə daha sıx əlaqələr qurmağa tələsəcəklər”,- deyə Atlantik Şura xəbərdarlıq edir.

“NATO ölkələrinin Ukraynadakı müharibə ilə bağlı hazırkı strategiyası nə Kiyevin, nə də Moskvanın qəti qələbə qazanmamasını təmin etmək məqsədi daşıyır”. Bu fikri Polşa Elmlər Akademiyasının İqtisadiyyat Elmləri İnstitutunun professoru Adam Lipovski deyib. Onun fikrincə, Qərb Putin rejiminin süqutunun nəticələrindən, xüsusən də Rusiya nüvə silahlarının xaotik yayılmasından qorxduğu üçün Ukraynanın qələbəsini qətiyyətlə təmin etmək istəmir. Məhz buna görə də bu gün Qərb Rusiyanın dövlət strukturunun məhvinin qarşısının alınmasının Ukraynanın 2014-cü il sərhədlərinə qaytarılmasından daha yüksək geosiyasi prioritet olduğu aksiomasını rəhbər tutur.

E. KAMAL

Ana səhifəyə dön