Partiya sədri PA rəsmiləri ilə görüşdən danışıb: "Görüşü düşmənçilik hesab edənlər başa düşməlidir ki..."

Xəbər verdiyimiz kimi, ötən gün siyasi partiyalarla dövlət orqanları arasında konstruktiv əməkdaşlığın qurulması və inkişaf etdirilməsi məqsədilə Prezident Administrasiyası tərəfindən Milli Məclis Aparatının, Mərkəzi Seçki Komissiyasının, Hesablama Palatasının, Ədliyyə və Maliyyə nazirliklərinin, habelə 25 siyasi partiyanın nümayəndələrinin iştirakı ilə görüş keçirilib.

Görüşdə “Siyasi partiyalar haqqında” Qanunun qəbulundan sonra partiyaların yeni tələblərə uyğunlaşması, eyni zamanda aidiyyatı üzrə dövlət qurumlarının partiyalarla apardığı iş müzakirə olunub. Görüşdə rəsmilərlə yanaşı görüşdə iştirak edən partiya nümayəndələri də çıxış edərək təkliflərini səsləndirib.

Görüşlə bağlı “Cebhe.info”-ya danışan AĞ Partiyanın sədri Tural Abbaslı deyib ki, bu cür tədbirlər çox önəmli və lazımlıdır:

“Bu, həm siyasi-psixoloji, həm də siyasi-təşkilati baxımdan önəmli məsələ idi. Ona görə ki, artıq cəmiyyətdə səfirlik qapısında yatıb, amma öz dövləti ilə görüşməyi düşmənçilik hesab edənlər də başa düşməlidir ki, belə tədbirlər adi hal almalıdır. Bir dövlətdə fəaliyyət göstərən partiya öz dövlətinin qurumları ilə əlaqəli şəkildə fəaliyyət göstərər. Yəni Fransa, ABŞ, Böyük Britaniya, Norveç səfiri ilə yox, öz dövlətinin strukturları ilə görüşüb işləməlisən. Bizdə bəziləri iqtidarla dövlət anlayışını qarışdırırlar. Bu mağara təfəkküründəki insanların da gözünün öyrəşməsi üçün belə görüşlər önəmlidir. Eyni zamanda, cəmiyyət artıq partiyaların da cəmiyyətin gözündə legitimləşməsi, dövlətin aşağı strukturlarında partiyaların legitim struktur olduğunun qəbulu üçün belə tədbirlər vacibdir. Bunlar siyasi-psixoloji baxımdan tədbirin faydalarından biridir”.

Partiya sədri əlavə edib ki, bu cür tədbirlər davamlı olmalıdır, bu, siyasi partiyalar haqqında yeni qəbul edilən qanundan irəli gələn məsələlərin müzakirəsi üçün vacibdir:

“Doğrudur, bu qanunda bizim razılaşdığımız və razılaşmadığımız məqamlar da var. Amma fakt odur ki, bu qanun artıq qəbul edilib. Bu tədbirin bir məqsədi də o idi ki, qanun qəbul edildikdən sonra proses necə gedir, problemlər varmı? Bu problemlərin müzakirəsi də önəmli məsələdir. Müxtəlif partiyalar öz fikirlərini dedilər, biz də öz fikrimizi səsləndirdik. Bu məsələni həm də ciddi edən o idi ki, həmin qanundan irəli gələn bəzi tələbləri təftiş etməli olan, ona nəzarət edən qurumların yüksək səviyyəli məmurları iştirak edirdi. Məsələn, partiyaların hesabatlılığı ilə bağlı Maliyyə Nazirliyinin, reyestr məsələləri ilə bağlı Ədliyyə Nazirliyinin, eyni zamanda Hesablama Palatası və Mərkəzi Seçki Komissiyasının nümayəndəsi tədbirdə iştirak edirdilər ki, onlar da yeni qanundan irəli gələn bəzi məsələlərə aydınlıq gətirdilər. Partiya sədrləri ilə ünsiyyətdə olduq, diskusiya apardıq. Eyni zamanda, Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin rəhbəri, əməkdaşları ilə görüşmək imkanımız oldu. Ayaqüstü də olsa fikir mübadiləsi apardıq. Təbii ki, partiyalar da özünün çatışan və çatışmayan cəhətlərini vurğuladılar. Bu aspektlərdən baxanda düşünürəm ki, çox önəmli və vacib tədbir idi. Hətta orada da fikirlər sələndi ki, bu cür tədbirlər müxtəlif mövzular ətrafında davamlı olmalı, partiyalar fikir mübadiləsi aparmalıdır. Mən də o fikirlə razıyam ki, müxtəlif həllini tapmalı olan məsələlər var, onlar belə müzakirələrlə həllini tapmalıdır. Xeyirli, faydalı tədbir idi, davamlı olmağını arzu edirəm”.

Ana səhifəyə dön