Navalnıya görə Rusiyaya qarşı sanksiyalar tətbiq edilib

Müxalifət liderlərindən olan Aleksey Navalnının həbsdə ölməsi ilə bağlı uzun müzakirələrdən sonra Avropa İttifaqı (Aİ) Rusiyaya qarşı yeni sanksiyaları təsdiqləyib. Sanksiyalar insan hüquqlarının pozulması ilə əlaqədar 33 rusiyalıya və iki hüquqi şəxsə tədbiq ediləcək.

Reyting.az-ın məlumatına görə, həmin şəxslərin Avropa Birliyində aktivləri aşkar edilərsə, gecikdirilmədən bütün bank hesabları ilə birlikdə dondurulacaq, eləcə də adı bu siyahıda olanların Aİ-yə girişinə qadağa qoyulacaq.

“Aleksey Navalnının Kreml rejimi tərəfindən tədricən öldürülməsi, mövcud rejimin insan həyatına tamamilə etinasızlıq göstərdiyini açıq şəkildə sübut etdi. Yenicə qəbul edilən sanksiyalar Rusiyanın siyasi rəhbərliyini və hakimiyyət orqanlarını ölkədə davam edən insan haqları pozuntularına görə çox ciddi məsuliyyətə cəlb etmək əzmimizi nümayiş etdirir. Eyni zamanda onu da yaxşı bilirik ki, Putin Rusiya deyil, Rusiya isə Putin demək deyil. Biz Rusiyadakı vətəndaş cəmiyyətini, azad, müstəqil səsləri dəstəkləməyə davam edəcəyik”, - deyə Avropa diplomatiyasının rəhbəri Cosep Borrell bildirib.

Yamalo-Nenets Muxtar Dairəsində Xarp şəhərindəki 3 saylı “Qütb canavarı” adlanan həbsxana, eləcə də Vladimir vilayətinin Melexovo şəhərində yerləşən 6 saylı islah cəzaçəkmə həbsxanası da sanksiyalar siyahısına daxildir. Aİ-nin qərarında deyilir ki, xüsusilə bu iki həbsxana fiziki və psixoloji təzyiqlə, tam təcridlə, məhbuslara qarşı işgəncə və zorakılıqla tanınır.

Aİ Şurası həmçinin bəyan edib ki, A. Navalnı dəfələrlə koloniyalarda cəzaçəkmə kamerasına göndərilib, beləliklə, bu addım siyasətçinin səhhətinin ciddi pisləşməsinə səbəb olub, müxalifətçi lider dəfələrlə belə “qəddar, qeyri-insani və insanın ləyaqətini alçaldan davranışlara” məruz qalıb.

Xəbər verildiyi kimi, sözügedən sanksiyalar siyahısına daxil edilənlərin arasında Rusiya ədliyyə nazirinin müavini Vsevolod Vukolovla yanaşı Moskva Federal Penitensiar Xidmətinin rəhbəri olan Sergey Morozun, həm də onun digər həmkarının, Federal Penitensiar Xidməti rəhbərinin birinci müavini vəzifəsinə təyinat almış və Aleksey Navalnının müəmmalı ölümündən üç gün sonra Putinin fərmanı ilə general-polkovnik rütbəsinə layiq görülən Valeriy Boyarinevin də adları var.

Sanksiyalara koloniyaların rəhbərlərinin və işçilərinin, eləcə də müxtəlif illərdə A. Navalnının işi üzrə qərar çıxaran hakimlərin də adları daxildir. Bu sanksiyada Navalnıya xüsusi rejimli həbsxanada 19 il həbs cəzası verən Andrey Suvorovun və Navalnının 12 gün cəza kamerasında qanunsuz olaraq saxlandığı üçün Rusiya müxalifət liderinin irəli sürdüyü IK-6-ya qarşı iddiasını yalana çıxarıb rədd edən Kirill Nikiforovun adları xüsusilə vurğulanır.

Bundan əlavə, sanksiya siyahısında həm də Moskva Basmannı məhkəməsinin hakimləri Yevgeniya Nikolayevanın, Natalya Dudarın adları da çəkilir. Onlar müxalifətçilərə, həm də A. Navalnıya qarşı siyasi qərarlar qəbul ediblər. Aİ Şurasının fikrincə, bu addımlar Rusiyada siyasi repressiyaların artmasına töhfə verib.

Aİ Şurası bəyanatında Rusiya hakimiyyətini Rusiyadakı bütün siyasi məhbusları "Dərhal qeyd-şərtsiz” azad etməyə çağırıb.

Oqtay QORÇU

Ana səhifəyə dön