Kreml Boris Nadejdindən ehtiyat edir

Boris Nadejdin

Fevral-mart aylarından üzü bəri Rusiyanın müstəqil siyasətçisi Boris Nadejdin barədə söz-söhbətlər kəsilmir. Onun hakimiyyətin təzyiqləri üzləşdiyi də bildirilir.

Reyting.az-ın məlumatına görə, Stavropol diyarındakı Ekstremizmə qarşı Mübarizə Mərkəzinin ("E" Mərkəzi) bir qrup əməkdaşı siyasətçi, Ukrayna müharibəsinin əleyhdarı Boris Nadejdinin prezidentliyə namizəd kimi irəli sürülməsini dəstəkləyən və bu məqsədlə ona imza toplayan fəallar üzərində axtarış aparıblar.

Bu yoxlamaların şahidi olan bir fəal anonimlik şərti ilə axtarışların motivləri barədə mediaya məlumat verib.

Stavropol diyarında Boris Nadejdinin təbliğatçısı və siyasətçi üçün imza toplamanın təşkilatçı koordinatoru Aleksandr Korovaynı da faktı təsdiq edərək baş verən kütləvi basqından danışıb.

Onun sözlərinə görə, 8 martda "E” Mərkəzinin əməkdaşları Essentukidə də axtarışlar aparıblar. O, baş verənlər barədə deyib:

“Dözülməzdir. Martın 12-də bu dəstə yenə fəalların yanına gəldi, üstəlik sıraları böyümüşdü. Bu gün ayın 14-dür, ancaq "E" Mərkəzinin dəstələri hələ də "düşmən" fəalların axtarışındadır. Mən əminəm ki, əgər Essentukidə hər şey sakit keçsə idi, onların çoxsaylı dəstəsi fəallarla qanun çərçivəsində danışıb daha nəzakətli olsaydılar, hər şey gördüyümüzdən fərqli olardı. Axtarışların nəticələri heç də yaxşı olmadı. Mixaylovskdan olan kollektor üçün isə daha pis nəticələndi, Ekstremizmə qarşı Mübarizə Mərkəzinin əməkdaşları həmin şəxsin avadanlıqlarını yerindəcə müsadirə etdi. Özünü də xeyli incidiblər. Düzdür, bəzi fəallara zor tətbiq edilmədi, ancaq inanın ki, danışmaq istəmədiyim başqa məqamlar da var”.

Korovaynı həmçinin bildirib ki, Boris Nadejdinin tərəfdarlarına çox qəzəbli olan hakimiyyət mənsubları, güc orqanları bir neçə gün ərzində xəbərdarlıq etmədən müxtəlif insanları axtarmağa və qanunsuz təftiş etməyə gəliblər. O deyib ki, bütün bu axtarışlar əslində kobud qanun pozuntuları əsasında aparılıb və heç bir ciddi zorakılıq tətbiq olunmasa da, kimsəni dinləməyiblər.

B. Nadejdinin nümayəndəsi A. Korovaynı vəziyyəti ümumi olaraq belə qiymətləndirib: "Belə təəssürat yaranıb ki, iqtidar insanları normal şəkildə seçkiləri müşahidə etməkdən imtinaya çalışırlar. Bu faktın özü bir daha sübut edir ki, putinçilər arxayınlıqla və asanlıqla saxtalaşdırmaya gedəcəklər”.

Adının açıqlanmasını istəməyən digər fəal da axtarışların Rusiyada qarşıdan gələn prezident seçkiləri ilə bağlı olduğunu söyləyib: “Hələ ki, hədələr davam edir, yəqin heç kəsilməyəcək. Onların adamları bu və ya digər şəkildə müşahidəçi olmaq istəyənlərlə görüşüblər. Bunun isə səbəbi məlumdur, səbəb – Seçkilər ərəfəsində hər kəsi qorxutmaq üçün – bəlkə də tək bizləri yox, səsverməyə gedən digər vətəndaşları da qorxutmaq üçün ortaya çıxıblar”.

Rusiyalı siyasətçi, müharibə əleyhdarı olan Boris Nadejdinin Kaluqada yerləşən seçki qərargahının rəhbəri Konstantin Larionovu isə martın 13-də işdən evə qayıdan zaman döyüblər.

"OVD-İnfo" verdiyi xəbərdə bildirilir ki, mart ayının 14-də Vladivostokda Boris Nadejdinin qərargahından olan dörd könüllü də yaxalanıb. Həmin fəallar saxta ittihamlarla, sosial şəbəkələrdə “Qadağan olunmuş simvolları nümayiş etdirdiklərinə görə” inzibati həbsə göndəriliblər. Fəallara qarşı sürülən digər ittiham isə “Ekstremist LGBT hərəkatı”-nın simvolu hesab olunan göy qurşağı bayrağı olan postun yayılmasıdır.

Nəzərə alaq ki, B. Nadejdin bu ilin mart ayında keçiriləcək prezident seçkilərində "Vətəndaş Təşəbbüsü" partiyasından əsas namizəd olub. O, açıq şəkildə müharibə əleyhinə mövqe bildirən yeganə namizəd kimi özünə xeyli tərəfdaş toplayıb. Məhz bu səbəbdən B. Nadejdinin seçkilərdə iştirakına icazə verilməyib. Rusiya Mərkəzi Seçki Komissiyası Nadejdinin təqdim etdiyi imzalarda qəbuledilməz bir çox qüsurların olduğunu əsas gətirib və elə buna görə də siyasətçinin prezidentliyə namizədliyi qeydə alınmayıb.

Mübarizəsinə davam edəcəyini vurğulayan B. Nadejdin Mərkəzi Seçki Komissiyasının qərarına inadla etiraz etməyə çalışıb, lakin məhkəmələr, eləcə də Ali Məhkəmə iddianı təmin etməyib.

“Səslər lazım olan yerə getməlidir",- fikrində olanların söylədiyinə görə B. Nadejdinin prezident seçkilərində iştirakına qoyulmuş qadağa əslində gözlənilən idi. B. Nadejdinin nüfuzu, bir siyasətçi kimi xüsusi fəallığı onu gələcəkdə parlamentdə fraksiya liderinə də çevirə bilərdi.

Bəzi siyasi analitiklər iddia edir ki, məhz elə buna görə Kreml Boris Nadejdinin gücünə bələd olduğundan onunla ciddi rəqib kimi davranıb və siyasətçiyə mane olmaqla öz istəyini həyata keçirə bilib.

Rusiyalı digər siyasətçilərlə müqayisədə bir çox analitiklər üstünlüyü ona veriblər. Buna görə də Kreml özünü sığortalamaq istəyib. Putin rejimi Boris Nadejdinin 10 faizdən çox səs qazanacağından qorxub və məhz buna görə iqtidar prezident seçkiləri ərəfəsində belə bir addım atmalı olub.

Tanıtım üçün xatırladaq ki, "Vətəndaş Təşəbbüsü" partiyasının əsas namizədi, müstəqil siyasi fəaliyyəti ilə tanınan, bəzilərinin "Moskvanın sevimlisi" adlandırdığı alimi, ziyalı Boris Nadejdin 1963-cü ildə, aprelin 26-da Özbəkistanın Daşkənd şəhərində doğulub. Bir müharibə əleyhdarı olaraq bu siyasi xadimin Rusiya şəhər və vilayətlərində çoxlu tərəfdarları var.

Fizika-riyaziyyat üzrə elmlər namizədi Boris Nadejdin ixtisasca müəllimdir. Siyasi fəal uzun müddətdir Moskva Fizika-Texniki İnstitutununda dərs deyir. B. B. Nadejdin müxtəlif dövrlərdə, yəni 2019-cu ilə qədər Moskva vilayətinin Dolqoprudnı dairəsini deputat kimi təmsil edib.

Oqtay QORÇU

Ana səhifəyə dön