Fransız siyasətinin alman diversantı

Elçin MİRZƏBƏYLİ

Avropa Şurası Parlament Assambleyasının (AŞ PA) Azərbaycanın ərazi bütövlüyünün və suverenliyinin bərpası ilə nəticələnən 44 günlük müharibədən və lokal antiterror tədbirlərindən sonra, əsas qurucularından biri olan Fransanın mövcud səlibçi hakimiyyətinin ritorikasını olduğu kimi təkrarlaması, ölkəmizə qarşı əsassız və həm də aqressiv iddilarla çıxış etməsi, bu təsisatın da rəsmi Paris və Berlin də daxil olmaqla, bəzi təsisçi və üzvlərinin girovuna çevrildiyini və öz ənənəvi prinsiplərindən uzaqlaşaraq, geosiyasi təzyiq mexanizminə çevrildiyini təsdiqləyir.

Avropa İttifaqının tərkibində mərkəzdənqaçma meyllərini gücləndirən, təsisatdaxili ziddiyyətləri dərinləşdirən, beynəlxalq hüququn norma və prinsiplərindən, milli maraqlardan çıxış edən üzv ölkələrə qarşı diskriminasiya siyasəti yürüdən səlibçi, ksenofob, islamafob və ultramillətçi Fransa və Almaniya, həmçinin bu ölkələrin “cırtdan” peykləri, vassal subyektləri, artıq eyni prosesin Avropa Şurasında və bu qurumun məşvərətçi orqanında da stimullaşdırılmasına başlayıblar. Paris və Berlinin hədəfi Avropa İttifaqı və Avropa Şurasına üzv ölkələri, ən müxtəlif vasitələrlə şantaj etməklə, sıxışdırmaqla öz maraqlarının ifadəçisinə çevirmək, ram olmayanları isə hər iki təsisatın subyektlərindən uzaqlaşdırmaqdan ibarətdir.

...Biz artıq xeyli müddətdir ki, giley siyasətindən uzaqlaşmışıq və ölkəmizə qarşı qarayaxma kampaniyalarının plasdarmına çevrilmiş sözdə beynəlxalq və regional təşkilatların, əslində özünü beynəlxalq hüququn müstəqil və bərabərhüquqlu subyekti kimi aparan, milli maraqlarını və ədalət prinsiplərini qoruyan dövlətləri sıxışdırmaq üçün “siyasi məngənə”yə çevrildiyini də çox yaxşı başa düşürük.

Torpaqlarımızın Ermənistanın işğalı altında olduğu, viran qoyulduğu, yüzminlərlə azərbaycanlının öz ev-eşindən didərgin salındığı, evlərinin daşına, kərpicinə, mismarına kimi daşındığı, ziyarətgah və ibadətgahlarının, qəbristanlıqlarının yerlə bir edildiyi, təhqirə məruz qoyulduğu zaman kəsiyində, bircə dəfə də olsun Avropa Şurasının və onun törəmə məşvərətçi orqanının öz prinsiplərinə sadiq qalaraq, təcavüzkara qarşı ədalətli və ünvanlı qərarlar qəbul etdiyinin şahidi olmamışıq. Ümumi səfsəfələr olub, amma əvəzini artıqlaması ilə çıxaraq “işğala şam tutmağa” davam ediblər. Azərbaycan torpaqlarının işğal altında olduğu müddətdə Avropa Şurası və onun siyasi təzyiq institutu olan AŞ PA bircə dəfə də olsun Ermənistanın öz öhdəliklərinə əməl etmədiyini dilə gətirməyiblər. Əslində, Ermənistan heç bir halda Azərbaycan torpaqlarının işğalına son qoymadan Avropa Şurasının kandarından içəri buraxılmamalıydı... Amma nəinki buraxıldı, hətta himayə olunaraq mükafatlandırıldı da...

Zənnimcə, Avropa Şurası Parlament Assambleyasının mənzil-qərargahının Fransada yerləşməsinin özü belə, rəsmi Parisin bu quruma təsir imkanlarının kifayət qədər yüksək olduğunu düşünməyə əsas verir.

Fransanın Almaniyanın, həmçinin Avropa təsisatlarına üzv olan Niderland, Danimarka, Lüksenburq və digər bu kimi yedək ölkələrin siyasətçilərinin arxasında gizlənərək, hədəfə aldığı dövlətlərə qarşı qərəzli münasibəti stimullaşdırdığı kimsəyə sirr deyil.

Qeyd edim ki, Paris, AŞ PA və digər təsisatlar çərçivəsində həyata keçirdiyi təxribat ssenarilərində əsas “oyunçuları”, daha dəqiq desək “marionet”ləri seçəndə daha ehtiyatlı davranırdı. Amma bu dəfə eyni “marionet”dən müəyyən zaman fərqilə bir neçə dəfə istifadə olunması, daha çox diqqət çəkir.

Qənaətimə görə, Azərbaycana qarşı növbəti təxribat ssenarisinin “baş qəhrəmanı” Frank Şvabenin 2017-ci ildə, məhz Fransa parlamentarilərinin dəstəyi ilə “Şimali Qafqaz” üzrə, həm də “Çeçenistanda cinsi azlıqların təqib olunması” kontekstində həmməruzəçi təyin olunması, kifayət qədər maraqlı məqamdır. Qeyd edim ki, Şvabenin 2012-ci ildə Moskva Dövlət Beynəlxalq Münasibətlər İnstitunda keçirdiyi görüşlərdən sonra, Rusiyaya tez-tez səfər etməsi, bu ölkənin sonradan Almaniyaya, Fransaya qaçan biznes elitasının nümayəndələri ilə təmasda olması, bir vaxtlar onun haqqında şübhəli məqamların ortaya çıxmasına və müzakirə predmetinə çevrilməsinə də zəmin yaratmışdı...

Daha bir diqqət çəkən məqam, Şvabenin, uzun illərdir ki, Azərbaycan əleyhinə açıq qərəzli mövqedən çıxış etməsi, lakin bu məqamın AŞ PA-nın ermənipərəst rəhbərliyi tərəfindən, hansısa səbəblərdən “nəzərə alınmaması”dır.

Frank Şvabenin Türkiyədə keçirilən son prezident seçkilərində AŞ PA nümayəndə heyətinə rəhbərlik etməsi və seçkilərin nəticələrini şübhə altına alması da, bu şəxsin Azərbaycana və Türkiyəyə qarşı bütün çirkli oyunların epidsentrində yer aldığını təsdiqləyir. Türkiyədə keçirilən son prezident seçkilərinin nəticələri ilə bağlı Frank Şvabeninin “mövqeyi” qənaətimə görə, bu şəxsin qarmaqda olan təxribatçı missiyasını icra etdiyini təsdiqləyir. Sitat: "Əsas siyasi və ictimai xadimlər dəmir barmaqlıqlar arxasında qalırlar. Ədalətli seçki kampaniyası üçün şəraitə nail olmaq üçün Türkiyənin hələ çox keçməsi lazımdır”. Şvabeninin iqtibas gətirdiyim iddialarında sözügedən “əsas siyasi və ictimai xadimlər” PKK terrorçuları və FETÖ-nun cinayət əməllərinə görə layiqli cəzalarını almış başbilənləridir. Deməli, Şvabe və onun arxasında dayananlar Türkiyənin hakim və ana müxalifət partiyalarının iki tur davam edən mübarizəsini, göz önündə olan reallıqları nəzərə almaq belə istəmirlər. Onlar üçün “əsas siyasi və ictimai xadimlər” Türkiyə dövlətçiliyini sarsıtmağa çalışan terrorçular, separatçılardır.

Zənnimcə, yuxarıda sadaladığım “cizgilər” Şvabe və onu idarə edənlərin tam obrazını bütün çılpaqlığıyla ortaya qoyur.

Ana səhifəyə dön