Zatulin: “Bakı və İrəvan Rusiyanı regionda sıxışdırmaqda həmfikirdir”

“Ermənistanın indiki hakimiyyəti ilə Azərbaycan hökuməti əslində bir məsələdə həmfikirdirlər - Rusiyanı regionda sıxışdırmaqda”.

Reyting.az xəbər verir ki, bunu “Danışır Moskva” radiostansiyasına müsahibəsində Rusiya Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsi sədrinin birinci müavini Konstantin Zatulin deyib.

“Azərbaycan və Ermənistana gəlincə, əlbəttə ki, məsələ həll olunmayıb, çünki Azərbaycanın bütün ambisiyaları təmin edilməyib, regionda hər şeyə nail olunmayıb. Ermənistanın indiki hakimiyyəti ilə Azərbaycan hökuməti əslində bir məsələdə həmfikirdirlər - Qarabağla bağlı bütün hadisələr, Qarabağ müharibəsi və s. nəticəsində Rusiyanı regiondan sıxışdırıb çıxarırlar. Belə olan halda Paşinyan erməni xalqının şüurunu yenidən formalaşdıraraq Qərbdə müttəfiqlər axtaracaq və Rusiyaya qarşı nifrət yaradacaq”, - Zatulin əlavə edib.

Ermənistanın baş naziri Paşinyanın Tbilisidə Azərbaycanın baş naziri Əsədovla görüşündən də danışan siyasətçi bunu “görüşlərdən biri” adlandırıb: “Bu, Azərbaycan və Ermənistan arasında razılaşma şəklində tamamlanacaqmı? Müxtəlif proqnozlar var: ilin sonuna qədər yekunlaşacaq, ilin sonuna qədər yekunlaşmayacaq.

Məsələn, mən də başqaları kimi Türkiyənin Ermənistanla normallaşmaq üçün öz şərtlərini irəli sürdüyünü deyən türk mənbələrinin bəyanatına diqqət yetirdim ki, bunlar arasında Ermənistan ərazisindən keçən - Azərbaycan və Türkiyəni birləşdirən Zəngəzur dəhlizi, Qarabağdan və nəhayət “Erməni soyqırımı”nı pisləmək siyasətindən imtina var. İlk iki suala gəlincə, məncə, Paşinyan razılaşmağa hazır olardı. Üçüncüsünə gəlincə, Paşinyan bundan necə imtina edə bilər, əgər həqiqətən də bu, sülh müqaviləsinin imzalanması üçün şərtdirsə”.

Zatulinin sözlərinə görə, Paşinyanın siyasi karyerası üçün bu, (Uydurma soyqrımdan imtina nəzərdə tutulur-red.) Qarabağın təslim olmasından da pis olacaq, çünki o, artıq bunu izah edə bilməyəcək: “Qarabağa gəlincə, o, artıq Ermənistanda hamıya başa salır ki, Qarabağı ruslar təslim edib, hər şeydə günahkar Rusiyadır. Bizim bununla işimiz yoxdur, bütün məsuliyyəti öz üzərinə götürür. O, əslində Qarabağı müharibəyə atdı və Ermənistanı döyüşə səfərbər etməkdən imtina etdi. Özü də ötən il demişdi ki, bu, daxili məsələdir - Qarabağ Azərbaycanın bir hissəsidir. Amma belə çıxır ki, hər şeydə günahkar Rusiyadır”.

Sədr müavininin fikrincə, Rusiyanın günahı odur ki, o, yavaş-yavaş əvvəldən bəlli olana gəlir: “2018-ci ildə hakimiyyətə gələn Paşinyan Qarabağı təslim etməyə, Rusiya ilə yollarını ayırmağa gəlirdi. Uzun müddət Rusiyada belə bir təəssürat var idi ki, o, özünəməxsus şəkildə Ermənistanın vətənpərvəridir və hansısa məqsədlərə çatmağa çalışır, müttəfiqə hörmətlə yanaşılmalıdır və s. Müttəfiqə hörmətlə yanaşmaq lazımdır, lakin bu gün bu müttəfiqin kürsüsündə oturan kəs əslində sizin müttəfiqiniz deyil”.

Zatulin zaman-zaman azərbaycanıların üzləşdiyi faciələrdən, soyqırımdan, deportasiyadan söz açmır, amma Qarabağ ermənilərinin başına gələnləri “ədalətsiz” hesab edir:

“Nədənsə müəyyən mərhələdə əməl etməyə başladığımız xəttimiz sanki dayandı. “Ah, Paşinyan dedi ki, Qarabağ Azərbaycanın bir hissəsidir”. Paşinyan erməni xalqının Papasıdır? Onun bütün erməni xalqının, xüsusən də Ermənistanın heç vaxt rəsmi struktur kimi tanımadığı Qarabağın adından danışmağa haqqı varmı? Hələ sovet dövründə də aydın idi ki, ermənilərin Azərbaycan SSR tərkibində dözümlü şəkildə yaşaması üçün onların zəmanəti olmalıdır. Zəmanət statusdur. O, Dağlıq Qarabağ Muxtar Vilayəti adlanırdı. İndi isə statusdan söhbət getmir, Paşinyan bu problemi tamamilə aradan qaldırıb. Biz də onun ardınca getdik və razılaşdıq – bəli, biz də bu gün bu mövzu haqqında danışmırıq”.

Rusiyanın buna niyə razı olduğunu soruşduqda isə, ermənipərəst Zatulin deyib: “Çünki erməni xalqının rəsmən seçdiyi baş nazir Paşinyan bunu bəyan edib, biz ermənilərdən artıq erməni ola bilmərik. Bu yanaşma nəticəsində gözümüzün qabağında sülhməramlı kontingentimizin iştirakı ilə faktiki olaraq erməniləri Qarabağdan qovduq. Biz ora sülhməramlılar göndərdik, lakin onları aktivləşdirməkdən imtina etdik. Biz neçə ay dözdük ki, Azərbaycan Laçın dəhlizini bağladı. Azərbaycan hiss etdi ki, nə istəsə, edə bilər, istədiyini də etdi. Qafqazda başqa nə istəyirsiniz?”.

Rusiyalı deputat Bakının “Zəngəzur dəhlizi” adlanan ərazini aşacağını istisna etmir: “Bu, tamamilə mümkündür. Paşinyan Rusiya ilə münasibətlərdən faktiki olaraq imtina edəndə, bu, daha çox mümkündür. O, erməni xalqını dalana dirədir. O, bunu bir səbəbdən edir, çünki birincisi, çox oynayıb, ikincisi, Qərb əmisinin onu qiymətləndirib Ermənistanın Qaleiteri kimi saxlayacağını gözləyir”.

Zatulin Paşinyanın mövqeyinin Qərbə doğru olduğuna inanır: “Qoy ermənilər Paşinyanın nə qədər pis olduğunu və onu niyə qovmadıqlarını başa düşsünlər, çünki bu, onların məsuliyyət zonasındadır.

İkincisi, onlar bu addımı atmadılar, çünki Moskvadan Rusiyanın bunun tərəfdarı olduğuna dair aydın bir siqnal hiss etmədilər. Hər halda, məsələ buna yaxınlaşanda buradan siqnallar göndərilirdi. Biz özümüzü qorxutduq və vəziyyətin həqiqətindən yayındıq”.

E. KAMAL

Ana səhifəyə dön