“İvan, idi domoy!” » arxiv.reytingaz.info

Akif ƏLİ,
yazıçı-publisist

Azərbaycan xalqı Rusiya "sülhməramlılarının" yarıtmaz fəaliyyətinə etiraz edir!

Müxtəlif vətəndaş birliklərinin, ekoloqların, qeyri-hökumət təşkilatlarının və mətbuat nümayəndələrinin Şuşada Rusiya “sülhməramlılarına” etiraz aksiyası davam edir.

Qalib xalqın cəsarətli vətəndaşları dinc şəkildə rusiyalı əsgərlərlə üzə-üz dayanaraq, ermənilərin Azərbaycana məxsus faydalı yataqları qeyri-qanuni istismar etməsi, nəticədə ekoloji və digər fəsadların törənməsi ilə bağlı monitorinq aparılması üçün mütəxəssislərimizin əraziyə buraxılmasını tələb edirlər.

Belə bir sürpriz aksiyanı gözləməyən "sülhməramlılar" pat və pərt vəziyyətə düşüblər. Artıq neçə gündür Azərbaycan vətəndaşlarının Azərbaycan torpaqlarında qarşısını kəsib tərpənməz dayanıb durublar. Güman ki, mərkəzdən “nə etməli” sualına cavab gözləməkdədirlər. Ancaq başı Ukraynada, Moldovada, Gürcüstanda, Suriyada, Kubada, Nikaraquada, Vyetnamda, Əfqanıstanda, Kambocada, Tacikistanda, Qazaxstanda, Anqolada, Burundidə, Çadda, Konqda, Sudanda, kosmosda, ayda, ulduzda “sülh yaratmağa” qarışan Kreml isə Azərbaycandakı “sülh yaradanların” sorğusuna hələlik cavab tapmayıb susur və susur: “Görəsən, Azərbaycan vətəndaşlarını Azərbaycan torpaqlarına buraxaq, ya yox? Necə edək?”

Axı, bu xalq artıq o xalq deyil...

Dəmir yumruğu ilə dünyanı heyrətə salan xalqdır!

30 il yekə dövlətlərin ibtidai erməni tayfası üçün quraşdırdığı yeraltı qazmaları, beton istehkamları 44 günə darmadağın edib bayrağını Şuşaya sancan xalqdır!

Artıq xalq yaxşı bilir ki, bölgədəki missiyası guya Laçın dəhlizinə nəzarət etməli olan müvəqqəti "sülhməramlılar" sən demə, erməni terrorçularının Qarabağa sərbəst girişinə göz yummuş, hətta ermənilərin təbii sərvətlərimizi daşıyıb aparmasına da yardımçı olurlarmış.

Əlini-qolunu sallaya-sallaya ərazilərimizə rahatca girib-çıxan oğru, quldur, terrorçu banditlər əsasən İran, Ermənistan və b. ölkələrdən bura daşınır. Müvəqqəti qonaq saxladığımız "sülhməramlılar" isə özlərinə aid işi görmək əvəzinə, həmin silahlı banditlərin yoxlanmadan sərbəst şəkildə Azərbaycan ərazisinə girmələrinə şərait yaradırlar. Hədəfin yenə Qarabağ ətrafında vəziyyəti gərginləşdirmək olduğu gün kimi aydındır.

Beləliklə, Azərbaycanın suveren torpaqlarında erməni terror qruplarının cəmləşməsinə imkan verməklə, münaqişəni yenidən alovlandırmaq niyyəti güdən Rusiya "sülhməramlılarının" burada sülh yaratmaq istədiklərini necə söyləmək olar?! Mümkün deyil...

Ona görə də dünyanın hər yerində RF "sülhyaradanları" üçün səsləndirilən şüarın Qarabağda da səslənməsinə ehtiyac var:

“İvan, idi domoy!”

Yəni: “Ay urus, çıx get evinə!” Biz daha 30 il gözləyən xalq deyilik!

...O ki qaldı guya "müxalifətçi" örpəyinə bürünüb sosial şəbəkələrdə ekologiya aksiyasına istehza edən bir ovuc gəvəzə “rus-fars-yan-pərəst” şərəfsizlərə, onları da ifşa edib pərəstiş etdiklərinin arxasınca göndərmək, yumşaq desək, - rədd eləmək vaxtıdır.

Havanı təmizləmək lazımdır. Son yüz ildə çox çirklənib.

Biz bir olanda – güclü oluruq. Çünki el gücü - sel gücüdür!

Qarabağ isə həmişə Azərbaycandır!

14.XII.2022

Müəllifin bütün yazıları - Akif ƏLİ

Bütün yazarlar

Ana səhifəyə dön