“Qisas 44” kitabının təqdimatı olub

Turizm və Sosial Xidmətlər üzrə Bakı Dövlət Peşə Təhsil Mərkəzində şəhid mayor Vüsal Vəliyevin xatirəsinə həsr olunmuş “Qisas 44” adlı kitabın təqdimatı keçirilib.

Reyting.az xəbər verir ki, tədbirdə millət vəkilləri, bir sıra qeyri-hökumət təşkilatlarının numayəndələri, elm adamları, ziyalılar, ictimai xadimlər, şəhid ailələri, qazilər, müharibə iştirakçıları, hərbçilər, eləcə də şəhid mayor Vüsal Vəliyevin sinif və kursant yoldaşları, ailə üzvləri iştirak ediblər.

Tədbirdə çıxış edən AMEA Azad Həmkarlar İttifaqının sədri, h.ü.e.d., professor Habil Qurbanov Vətənimizin azadlığı və müstəqilliyi uğrunda canından keçən şəhidlərimizin xatirəsinin xalqımız tərəfindən daim əziz tutulduğunu, dövlətimiz tərəfindən şəhid ailələrinə daim diqqət və qayğı göstərildiyini deyib. Şəhidlərimizin adının əbədiləşdirilməsi istiqamətində görülən işlərdən danışan professor Habil Qurbanov “Qısas 44” kitabının ərsəyə gəlməsini də bu istiqamətdə görülmüş işlərin bir hissəsi olduğunu vurğulayıb. O, şəhid mayor Vüsal Vəliyevin qardaşı Əpoş Vəliyevin AMEA Folklor İnstitutunun aparıcı elmi işçisi olduğunu və onun müəllifliyi ilə hazırlanmış kitabın AMEA AHİ-nin maliyyə dəstəyi ilə çap edildiyini diqqətə çatdırıb.

Bildirilib ki, nəşrdə mayor Vüsal Vəliyevin həyat və döyüş yolundan bəhs edilir, şəhidin ailə üzvlərinin, döyüş yoldaşlarının xatirələri, onun haqqında yazılmış poemalar, məqalələr, şeirlər və mahnı sözləri yer alır.

Təqdimat mərasimində şəhidin ailə üzvləri çıxış edərək Vüsal Vəliyevlə bağlı xatirələrini bölüşüb, onun şərəfli həyat yolundan söz açıblar.

Qeyd edək ki, Vüsal Vəliyev 1988-ci il iyulun 15-də Şərur rayonunun Dizə kəndində anadan olub. 1994-2002-ci illərdə Dizə kənd tam orta məktəbində, 2002-2005-ci illərdə Heydər Əliyev adına Hərbi Liseydə təhsil alıb. 2005-2009-cu illərdə isə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb. 2009-cu ildən leytenant hərbi rütbəsində Beyləqan rayonunda xidmətə başlayıb.

O, tank əleyhinə taqımın komandiri, motoatıcı taqım komandiri, motoatıcı taborun qərargah bölüyünün komandiri, motoatıcı bölüyün komandiri, tank əleyhinə bölüyün komandiri, motoatıcı taborun qərargah rəisi, tabor komandirinin müavini, motoatıcı taborun komandiri vəzifələrində Beyləqan, Füzuli, Ağdam, Tərtər, Tovuz, Qazax və Göygöl-Murovdağda xidmət edib, mayor hərbi rütbəsinəcən yüksəlib.

Xidmət etdiyi müddətdə mayor Vüsal Vəliyevə “Azərbaycan Respublikası Silahlı Qüvvələrinin 95 illiyi (1928-2013) Yubiley medalı”, “Azərbaycan Ordusunun 100 illiyi (1918-2018) Yubiley Medalı”, “10 il Qüsursuz xidmətlərə görə” 3-cü dərəcəli medalı ilə təltif olunub.

Azərbaycan Ordusunun mayoru olan Vüsal Vəliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Murovdağ-Kəlbəcər istiqamətindən döyüşə başlayıb, Şuşanın azadlığı uğrunda gedən döyüşlərədək savaşıb. Vüsal Vəliyev noyabrın 9-da şəhid olub.

Döyüşdə şücaət və igidlik göstərdiyi üçün mayor Vüsal Vəliyev ölümündən sonra Azərbaycan Respublikasının Prezidenti İlham Əliyevin Sərəncamı ilə “Vətən uğrunda” “Kəlbəcərin azad olunmasına görə”, “İgidliyə görə” medalları və “Azərbaycan bayrağı” ordeni ilə təltif edilib.