Hollivud məşhuru "Terminator", "Titanik" və "Avatar" filmlərinin rejissoru Ceyms Kemeron generativ süni intellekti "dəhşətli" yenilik adlandırıb.

Reyting.az xəbər verir ki, rejissor CBS kanalına müsahibəsində "Avatar: alov və kül" filminin istehsalından söz açıb.

Kemeron moşn-kepçer texnologiyasını süni intellekt ilə eyniləşdirməyin yanlış olduğunu bildirib.

Onun sözlərinə görə, ümumiyyətlə, moşn-kepçer canlı ifa edən aktyor oyununun rəqəmsal bir qəhrəmana köçürülməsidir, həmçinin aktyor-rejissor yaradıcılığının təntənəsidir. Generativ süni intellekt isə "mətni əsas götürüb sıfırdan obraz və ifa yaradan tam əks bir prosesdir və bu, çox qorxuludur".

Rejissor həmçinin "Avatar: alov və kül" adlı yeni ekran əsərinin nümayişinin dekabrın 19-da olacağını bildirib və onu franşizadakı ən mürəkkəb vizual effektli iş adlandırıb.

Xatırladaq ki, bundan əvvəl də Ceyms Kemeron kinoda süni intellektdən istifadənin əleyhinə olduğunu bildirmişdi.

Oqtay QORÇU