Aydan Nuriyevanın musiqi dünyası » arxiv.reytingaz.info

Etibar CƏBRAYILOĞLU

Həmin gün gözəl bir yaz axşamının sükutunu ecazkar klassik musiqi və ifaçıya ünvanlanan alqış sədaları pozdu. Gənc musiqiçi Aydan Nuriyeva fortepianonun dillərinə barmaqları ilə deyil, ürəyi ilə toxunurdu sanki...

Dünən Müslüm Maqomayev adına Dövlət Akademik Filarmoniyasının Kamera və Orqan Musiqisi Zalında gənc pianoçu Aydan Nuriyevanın ilk solo konserti keçirildi.

Moskva, Sankt-Peterburq, Nyu-York səhnələrini fəth edən 15 yaşlı azərbaycanlı qız

Aydan Nuriyeva 2010-cu il aprelin 16-da Moskvada anadan olub. Valideynlərinin işi ilə bağlı Rusiya paytaxtında yaşayan balaca Aydan nənəsi Nəzirə Cahangirovadan təkcə nağıl, şeir və tapmaca deyil, həm də musiqi ilə bağlı söhbətlər eşidib. Tanınmış elm və təhsil xadimi Nəzirə xanım Balabəyqızı nəvəsi Aydanda musiqiyə maraq oyada bilib.

6 yaşında Moskvadakı Uşaq İncəsənət Məktəbinə daxil olan balaca istedad tanınmış pedaqoq Yelena Litvinadan dərs alıb. Yelena Valeriyevna öz yetirməsini belə xarakterizə edir: “Elə ilk günlərdən Aydan musiqi duyumu, yüksək yaradıcılıq potensialına malik uşaq kimi diqqətimi çəkməyi bacardı. Çox tələbkar, öz üzərində yorulmadan çalışmağı sevir. Onu dinləmək maraqlıdır”.

İkinci sinifdən Aydan Nuriyeva müxtəlif müsabiqə və festivallarda iştirak etməyə başlayıb, ilk mükafatlarını qazanıb. Balaca istedada P.İ.Çaykovski adına Moskva Dövlət Konservatoriyasının Raxmaninov zalında, Sankt-Peterburq Dövlət Muzeyində, İtaliyanın Qrossemo şəhərindəki Duomo di San Lorenzo kilsəsində, ABŞ-nın Nyu-York şəhərindəki Karnegi-Hollda çıxışlar etmək və mükafatlar qazanmaq nəsib olub. O, VII Moskva Açıq İncəsənət Festivalının, V Beynəlxalq Gənc Pianoçular Müsabiqə-Festivalının laureatıdır. 2019-cu ilin martında keçirilən VIII Moskva Açıq İncəsənət Festivalının Qran-Prisini qazanıb.

Günəşli Bakının adajiosu

2022-ci ilin fevralından Aydan valideynləri ilə birgə doğma Azərbaycana qayıdıb. Musiqi təhsilini Bülbül adına Musiqi Məktəbində davam etdirən istedadlı pianoçu burada Əməkdar müəllim Adilə Rəhimovadan, Əməkdar incəsənət xadimi Kəmalə Neymanovadan dərs alıb.

Vətənində də bir çox müsabiqələrdə, konsertlərdə həvəslə iştirak edən Aydan Nuriyeva Ümummilli Lider Heydər Əliyevin 100 illik yubileyi münasibəti ilə 2023-cü ilin aprelində təşkil edilən IV Respublika müsabiqəsinin I dərəcəli laureatıdır. Gənc və istedadlı pianoçu Xalq artisti Teymur Göyçayevin, Əməkdar artist Fuad İbrahimovun dirijorluğu ilə konsertlərdə öz ifası ilə diqqət çəkib.

Dünən yaz axşamında Aydan Nuriyevanın ilk solo konsertinə toplaşanlar bu gənc istedadın ürəyindən və barmaqlarından süzülən gözəl ifalar dinləmək ümidində idilər. Aydan valideynlərinin, pedaqoqlarının başını uca etdi. Şopenin, Bethovenin, Şumanın, Prokofyevin əsərləri Aydanın ifasında necə də gözəl və özünəməxsus tərzdə səsləndi. Dünyanın müxtəlif səhnələrində adından söz etdirən 15 yaşlı Aydan Nuriyeva doğma Bakıdakı solo konsertində şəhərin musiqi həyatına gözəl bir hava gətirdi. Balaca skripkaçı Elmira Dadaşova Çaykovskinin “Düşüncələr” əsərini ifa etməklə Aydanla həmrəyliyini bildirdi sanki.

Həmin yaz axşamı səhnəni bəzəyən gül dəstələri, çələnglər, zalda səslənən aramsız tamaşaçı alqışı hamıda bir ümid yaratdı - gənc və istedadlı pianoçu Aydan Nuriyeva bu al-əlvan çələngləri, gurultulu alqışları hələ çox qazanacaq. Özü də təkcə doğma Bakıda yox, dünyanın hər yerində. Axı əsl musiqi, əsl istedad sərhəd tanımır...

Ana səhifəyə dön