Ulduz aktyorun xanımına qadağa tətbiq oluna bilər

Hollivud ulduzu, aktyor Corc Kluni həyat yoldaşından ayrı düşə və prezident Donald Trampın sərəncamı ilə Amal Kluninin ABŞ-a girişi qadağan oluna bilər. Məşhur amerikalı aktyor bununla bağlı narahatlığını ifadə edib. Çünki onun həyat yoldaşı Amal Kluni sanksiya təhlükəsi ilə üzləşib.

Reyting.az xəbər verir ki, sanksiya təhlükəsinə səbəb Amal Kluninin Beynəlxalq Cinayət Məhkəməsinin (ICC) işində qanuni iştirakı və HƏMAS-ın bir çox simalarının həbsinə səbəb olmasıdır.

"The Mirror" nəşri yazır ki, Amal Kluni bir müddət əvvəl Britaniya Xarici İşlər Nazirliyindən, onun Beynəlxalq Cinayət Məhkəməsinin işindəki iştirakının mümkün nəticələri ilə bağlı özəl xəbərdarlıq alıb. Ona xüsusi xəbərdarlıq edilib ki, xanım Kluni prezident Donald Trampın sərəncamı ilə ABŞ-nın tətbiq etdiyi sanksiyalara məruz qala bilər. Bu, İsrail-HƏMAS münaqişəsi ilə bağlı davam edən müharibə cinayətlərinin araşdırılması prosesində iştirak edən şəxslərin Amerikaya girişinə qadağa qoyulmasını nəzərdə tutur.

"O, sadəcə, öz peşəkar işini gördüyü üçün bu əmrin qurbanı ola bilər", - deyə "The Mirror" hüquqi mənbəyə istinadla yazır.

Üstəlik, həmin sərəncamda deyilir ki, məhkəmə əslində Amerikaya, onun yaxın müttəfiqi olan İsrailə qarşı qanunsuz və əsassız addımlar atıb.

D. Trampın fevral ayında imzaladığı sərəncam artıq Beynəlxalq Cinayət Məhkəməsi ilə əməkdaşlıq edən bir sıra vəkillərin səyahət qadağaları və aktivlərinin dondurulması ilə nəticələnib. Lakin bu iş üzrə prokuror müşaviri kimi çıxış edən zaman Amal Kluni bildirib ki, onun proseslərdə siyasi iştirakı yoxdur və o, ancaq beynəlxalq hüquq prinsiplərinə əsaslanıb.

"Bu, siyasi qərar deyildi - bu, tamamilə bir hüquq məsələsi idi. Mən isə qanunun aliliyinə və mülki şəxslərin müdafiəsinin zəruriliyinə inandığım üçün belə bir işdə iştirak etməli oldum", - deyə vəkil A. Kluni vurğulayıb.

Klunilər ailəsi əsasən Avropada yaşasalar da, bu cütlüyün ABŞ-da, Corc Kluninin aktyor kimi çıxış etdiyi Brodveydə böyük mülkləri var. Əgər sanksiyalar daha da sərtləşdirilərsə, A. Kluninin Amerikaya girişi qadağan edilə bilər.

47 yaşlı hüquq müdafiəçisi A. Kulini Livanda anadan olsa da, o, uşaqlıqdan Böyük Britaniyada yaşayır. A. Kluni soyqırım və siyasi təqib qurbanları ilə bağlı işlərdə çalışmaqla, dünyanın ən tanınmış hüquq müdafiəçilərindən birinə çevrilib. Üstəlik, vəkillik fəaliyyətinə görə, o, 2024-cü ildə ilin hüquqşünası mükafatına layiq görülüb.

Nəşr hətta bunun "qisas vaxtı" olduğunu da təxmin edir. Xatırlanır ki, C. Kluni bundan əvvəl, ABŞ hökumətini və prezident D. Trampı sərt şəkildə tənqid etmişdi. Kino ulduzu həssas bir mövzuya toxunmaqla, bildirmişdi ki, Amerikadakı hakimiyyət orqanları jurnalistləri alçaldır, onların hüquqlarını məhdudlaşdırmağa çalışır. O zaman Tramp aktyorun açıqlamasına dərhal cavab vermişdi. ABŞ prezidenti öz emosiyalarını cilovlaya bilməyib, onlayn paylaşımında C. Klunini "ikinci dərəcəli" adlandırmışdı.

Onu da qeyd edək ki, cütlük hələlik rəsmi açıqlama verməsə də, beynəlxalq səviyyədə tanınmış vəkil kimi A. Kluninin prezident D. Trampın sərəncamından sonra Amerika ərazisində yaşaması sual altındadır.

Oqtay QORÇU

Ana səhifəyə dön