Hamı xeyir xəbər gözləyir » arxiv.reytingaz.info

Evdə hamı narahatdır. Döyüşlərdə iştirak edən ailənin tək oğlu Muraddan neçə gündür ki, xəbər yoxdur. Ata oğlunun erməni işğalçılarına qarşı igidliklə vuruşub torpaqlarımızı azad edəcəyinə, ailənin 30 illik Şuşa həsrətinə son qoyub doğma ev-eşiyinə qayıda biləcəyinə əmindir. Ana hər gün qıldığı namazlarda Muradın sağ-salamat qayıtması üçün dualar edir. Bacı qardaşının səsini eşitmək ümidi ilə yaşayır...

Qarabağ müharibəsindən, 44 günlük Zəfərimizdən bəhs edən pyeslərin səhnə ömrü yaşaması, müxtəlif teatrlarımızın repertuarında yer alaraq möhkəmlənməsi həm tarixi xronika, həm də gənclərimizdə vətənpərvərlik ruhunun gücləndirilməsi baxımından çox vacibdir. Sevindirici haldır ki, gənc yazıçı-dramaturq Ülviyyə Heydərovanın “İnanıram” monopyesi həm Dövlət Akademik Milli Dram Teatrında, həm Dövlət Akademik Musiqili Teatrında, həm də Dövlət Milli Gənc Tamaşaçılar Teatrında səhnəyə qoyulub və uğurla nümayiş etdirilib. Samir Qulamovun Dövlət Akademik Musiqili Teatrının repertuarındakı “Bir nəfəs qədər yaxın”, İlqar Fəhminin Dövlət Milli Gənc Tamaşaçılar Teatrında oynanılan “Balaca kişilər” tamaşaları da tarixi qələbəmizlə bitən Vətən Savaşının səhnədə bədii həlli baxımından maraqlıdır.

Sumqayıt Dövlət Dram Teatrı da erməni işğalçılarına qarşı aparılan 44 günlük müharibədən bəhs edən tamaşa ərsəyə gətirib. Mədəniyyət Nazirliyinin dəstəyi ilə hazırlanan “Xeyir xəbər” tamaşası Əməkdar incəsənət xadimi, tanınmış yazıçı-dramaturq Əli Əmirlinin eyni adlı pyesi əsasında hazırlanıb. Tamaşaya quruluş vermək üçün gənc rejissor Fuad Cavadzadə dəvət olunub.

...Ön cəbhədəki oğlundan günlərdir xəbər ala bilməyən valideynləri ağır bir sınaq gözləyir. Muradın cəbhə yoldaşı Cəmil (Elay Xasıyev) yaralı halda gələrək onlara Vətən savaşında yaşananlardan danışır, bildirir ki, Murad (Şəmistan Süleymanlı) qızğın döyüşlərdən birində çiyin-çiyinə vuruşduğu əsgərlərin həyatını qorumaq üçün irəli atılıb və yəqin ki, düşmənlə qeyri-bərabər döyüşdə şəhid olub, çünki nə öldüsündən, nə qaldısından bir xəbər var.

Hümbət kişi (Habil Xanlarov) oğlunun şəhid olması ilə fəxr edir, övlad itkisi ilə daxilən əzab çəksə də bu hissini gizlətməyə çalışır. Hamıdan, qonşuları- Müəllimdən (Siyavuş Mahmudov), Hüseynalı kişidən (Akif Mirzəyev) tələb edir ki, ona başsağlığı verməsinlər, şəhid atası kimi təbrik etsinlər.

Gülüstan (Əməkdar artist Elmira Kərimova) ağlayıb yas tutsa da ana kimi hiss edir ki, Murad günlərin birində öz evinə dönəcək. Anaqız isə (Məryəm Hüseynli) qardaşından dəqiq xəbər öyrənmək üçün rəsmi orqanlara məktub göndərmək fikrindədir.

Ailənin eşitdiyi növbəti xəbər vəziyyəti tamam dəyişir. Televiziya efirindən Muradın döyüş vaxtı əsir düşdüyü xəbəri yayılır. Atası Hümbət kişi bu xəbərə inanmaq istəmir, Muradı əsl qəhrəman kimi böyütdüyünə əmin olduğunu deyir. Gülüstan ana oğlundan xeyir xəbər gözləyir. Səhnədəki gərginlik tamaşaçı zalına da sirayət edir, hamı baş verənləri daha diqqətlə izləməyə başlayır.

Gərgin anlara efirdən elan edilən xeyir xəbər son qoyur, əvvəlcə şəhid olduğu, sonra isə düşmən əsirliyində qaldığı güman edilən Muradın döyüşdə ağır yaralandığı və torpaqlarımızı erməni işğalçılarından azad edən əsgərlərimiz tərəfindən sağ-salamat tapıldığı xəbər verilir.

Nəhayət ailənin gözlədiyi an gəlib çatır, Murad evə dönür. Lakin... Məlum olur ki, işğalçılara qarşı ağır döyüşlər igid əsgərin səhhətində ciddi problemlər yaradıb. Ana öz duaları ilə, ata, bacı və döyüş yoldaşı Cəmil Tezliklə bu ailənin qapısını daha bir xeyir xəbər döyür-Vətən savaşında göstərdiyi igidliyə görə Murad qəhrəman adına layiq görülür. Yaxınlarının səyi, özünün əzmi sayəsində Murad sağlamlığını bərpa edir.

Tamaşanın quruluşçu rejissoru Fuad Cavadzadə müasir texnoloji vasitələrin köməyi ilə səhnə əsərinin finalını çox uğurlu həll edə bilib, yersiz pafosdan qaçaraq tamaşaçını vətənpərvərlik ruhuna kökləməyə müvəffəq olub. Tanışlıq üçün deyək ki, Fuad Cavadzadə Azərbaycan Dövlət Mədəniyyət və İncəsənət Universitetinin məzunudur. Bu ali məktəbin teatr sənəti fakültəsində rejissorluq ixtisasına yiyələndikdən sonra Mədəniyyət Nazirliyinin xətti ilə təhsilini Türkiyədə davam etdirib, İstanbul Universitetinin Dövlət Konservatoriyasında magistr pilləsini bitirib, “K.Stanislavski və V.Meyerholdun oyunçuluq yöntəmlərinin karşılaştırmalı incelemesi” mövzusunda dissertasiya müdafiə edib. Hazırda Azərbaycan Dövlət Milli Gənc Tamaşaçılar Teatrında çalışır. İnanırıq ki, gənc və istedadlı rejissor növbəti quruluşlarında da teatr ictimaiyyətinin diqqətini çəkə biləcək.

“Xeyir xəbər” tamaşası Sumqayıt Dövlət Teatrının Şəmistan Süleymanlı, Elay Xasıyev, Məryəm Hüseynli kimi gənc aktyorlarına da öz istedadlarını göstərmək üçün yaxşı bir fürsətdir və hər üç ifaçı bu imkanı dəyərləndirməyi bacarıb.

Döyüş səhnələri əks olunan kütləvi səhnələrdə teatrın gənc aktyorları Kamran Muradlı, Ramazan Xanlarov, Etibar Əmirov və Əmrah Cəbiyev iştirak edirlər.

“Xeyir xəbər” tamaşasının bədii rəhbəri Sumqayıt Dövlət Dram Teatrının baş rejissoru, Xalq artisti Firudin Məhərrəmov, quruluşçu rəssamı Nizami Dadaşov, musiqi tərtibatçısı sənətşünaslıq üzrə fəlsəfə doktoru Telman Qəniyevdir. Səhnə əsərinin qrafika işlərini isə Sahil Nəzərov hazırlayıb.

44 günlük tarixi zəfərimizi səhnədə bədii cəhətdən əks etdirmək, gənclərimizi vətənpərvərlik ruhunda yetişdirmək baxımından Sumqayıt Dövlət Dram Teatrının bu addımı təqdirə layiqdir.

Etibar CƏBRAYILOĞLU
Reyting.az

Ana səhifəyə dön