Filmə çəkilən xanımların çəkdikləri

Dünən “RS Production” yeni filmini təqdim etdi. “Nizami” Kino Mərkəzində “Qırxdan sonra…” qısametrajlı bədii filminin təqdimatına dəvətli tanınmış sənət adamları, ictimaiyyət nümayəndələri qarşısına çıxan yaradıcı heyət filmin özü kimi qısa danışdılar.

Tanınmış kino tənqidçisi, filmin ssenari müəlliflərindən biri olan Sevda Sultanova bildirdi ki, “Qırxdan sonra” aktrisaların, ümumilikdə qadınların düşüncələri, müəyyən yaşdan sonrakı mənəvi mübarizəsi barədədir.

Filmin ssenari müəlliflərindən biri və quruluşçu rejissoru Saida Haqverdiyeva bildirdi ki, yeni ekran işində cəmiyyətimizdəki qadınların, xüsusən yaradıcı qadınların, özünü ifadəyə çalışan zərif cinsin ümumiləşmiş obrazını yaratmağa çalışıblar. Yeri gəlmişkən, filmin yaradıcı heyətinin əksəriyyəti də məhz qadınlardır.

Saida xanım filmin ərsəyə gəlməsində dəstək verən qurum və şəxslərə , o cümlədən, Mədəniyyət Nazirliyinə, “Nizami” Kino Mərkəzinə təşəkkürünü bildirdi, bu silsilədən daha iki film çəkəcəyini, hazırda ikinci ekran işi üzərində işə başladıqlarını da əlavə etdi.

Sonra söz filmin qəhrəmanları – aktrisalar Zümrüd Qasımova və Gülçöhrə Abdullayeva verildi. Onlar belə bir fərqli və maraqlı, bir növ ürək sözlərini ekrana daşıyan layihəyə görə yaradıcı heyətə təşəkkür etdilər.

“Qırxdan sonra…” qısametrajlı bədii filminin ssenari müəllifləri Sevda Sultanova və Saida Haqverdiyeva, quruluşçu rejissoru Saida Haqverdiyeva, görüntü rejissoru Şahmar Səfəroğlu, prodüseri Kəmalə Həhmətova, redaktoru Həmidə Rüstəmovadır.

Filmin əsas məqsədi sənətin görünməyən tərəflərini qadın qəhrəmanın müxtəlif ruh hallarında təsvirə can atmaqdır. Tragikomik hadisələrlə zəngin ekran əsəri aktyorların həyatının arxa planını, daha doğrusu, tamaşaçının bəlkə də görmək istəmədiyi yönlərini böyük ekrana çıxarır.

Qısametrajlı filmin qəhrəmanı yaşı 40-ı keçmiş iki qadındır. Onlardan biri (Gülçöhrə Abdullayeva) illər əvvəl teatrdan uzaqlaşsa da ikinci əsas personaj mübarizədədir. İstedadlı aktrisa Zümrüd Qasımovanın canlandırdığı obraz isə ailə-məişət qayğıları fonunda bir də zaman keçdikcə kinoda, teatrda ona olan tələbatın azaldığını hiss edir. Amma bunu qəbul etmək istəmir. Hətta mübarizə aparır, hər gün öz üzərində çalışır. Az qala təbiətə qarşı gedir. Amma onun nə zamanındakı populyarlığı, nə də peşəkarlıq və təcrübəsi artıq işinə yaramır. Əvəzində sosial şəbəkə fenomeni olanlar qısa zamanda ekranlara rol tapıb, o və onun kimilərin oynayacaqları rolları əllərindən asanlıqla alırlar. Sözsüz ki, aktrisa bununla barışmır və sarsıntılar keçirir. Amma mübarizə əzmini də itirmir. Ən əsası nikbindir və ən çətin anında belə gülməyi, özünün kədərinə gülməyi bacarır. Özü də hər hansı obrazda yox. Elə özü kimi. Filmin sonunda nəhayət ki, ona telefon zəngi gəlir və...

Etibar CƏBRAYILOĞLU
Reyting.az

Ana səhifəyə dön