Əliqulu dünən evlənmədi » arxiv.reytingaz.info

Görkəmli dramaturq, yazıçı Sabit Rəhman komediya janrında qələmə aldığı maraqlı əsərləri ilə ədəbiyyatımızda özünəməxsus mövqe tutub. Müəllifin pyesləri həm sağlığında, həm də özündən sonra teatrlarımızda dəfələrlə səhnəyə qoyulub.

Azərbaycan Dövlət Akademik Musiqili Teatrı özünə doğma saydığı dramaturqun yaradıcılığına müraciət edərək “Əliqulu evlənir” komediyasına yeni səhnə həyatı verib. Amma bu dəfə fərqli adla və fərqli yozumda. Oxuculara və tamaşaçılara yaxşı tanış olan pyes Xalq artisti İlham Namiq Kamalın librettosu və quruluşunda “Əliqulu bu gün evlənir” adı ilə hazırlanıb.

Dövlət Akademik Musiqili Teatrı dünən bu yeni yaradıcılıq işini tamaşaçılara ilk dəfə təqdim edib.

Məlum olduğu kimi, İlham Namiq Kamal libretto üzərində illər öncədən işləməyə başlamışdı və istedadlı bəstəkar, Əməkdar incəsənət xadimi Oqtay Rəcəbov tamaşaya maraqlı musiqilər yazmışdı. Təəssüf ki, premyerada iştirak etmək Oqtay müəllimə nəsib olmadı. Yeri gəmişkən, mərhum bəstəkarın musiqisinə Əməkdar incəsənət xadimi, tanınmış şair Baba Vəziroğlu mətnlər yazıb. Həm librettoda, həm də mahnıların mətnlərində müəlliflər müasir dövrümüzlə, günümüzlə səsləşən hadisələr, elementlər əlavə ediblər.

İlham Namiq Kamalın ifa etdiyi Əliqulu xırda məmur olsa da, böyük iddiaları və özünəməxsus gündəlik davranış qaydaları var. Kabinetindəki kreslonun eynisindən evdə də saxlayıb ki, kreslodan ayrılmasın. İşdən evə qayıdanda papağını başından çıxarmağı əziyyət bilir, bu işi xanımı Gövhər (Zemfira Əbdülsəmədova) görməlidir. Mənsəbpərəst Əliqulu yeganə övladı Qumralı (Əzizə xanım Kazımova) böyük vəzifəli, arxası-dayağı olan adama, hətta meymuna ərə verməyə də razıdı. Təki, həmin meymun kiminsə kabinetində atılıb-düşsün.

Əliqulu yaşlı vaxtında kreslosunu qorumaq, karyera pilləsində bir qədər də irəli getmək üçün dayısı nazirlikdə mühüm vəzifə tutan Nazlı (Gülnarə Əzizova) ilə evlənmək istəyir. Ömür-gün yoldaşı Gövhərdən də ayrılmağı planlaşdırır, təki vəzifəli şəxslə qohum olsun.

Əliqulunun təyin etdiyi toy günü vəziyyət tamam dəyişir. Çünki vəzifəni yox, saf məhəbbəti, ülvi duyğuları seçənlər - Rövşən (Əməkdar artist Əkbər Əliyev), Humay (Rəsmiyyə Nurməmmədova), Səadət (Gülçöhrə Abdullayeva), Kamal (Səmədzadə Xasıyev), Azad (Ruslan Mürsəlov), Xəlil (Əliməmməd Novruzov) onun planını pozurlar. Əliqulunun ştatlı yaltağı Səfər (Əməkdar artist İqrar Salamov) tamahkarlığı üzündən məğlub duruma düşür. Küçə musiqiçilərinə - Heyvaxanıma (Böyükxanım Məmmədova) və Lumuxanıma (Mehriban Rəcəbova) da Əliqulunun toyunda iştirak etmək nəsib olmur.

Gövhər rolunu ifa etmək üçün Milli Gənc Tamaşaçılar Teatrından dəvət edilən aktrisa Zemfira Əbdülsəmədova öz istedadı və yaradıcılıq imkanları sayəsində ümumi ansambla tez uyğunlaşmağı bacarıb. Onun ifasında Gövhər ailəsinin xoşbəxt olması üçün hər cür fədakarlığa hazır olan həyat yoldaşı, qayğıkeş anadır.

Akademik Musiqili Teatrı hər zaman gənc istedadlara potensiallarını göstərmək üçün imkan yaradır. “Əliqulu bu gün evlənir” tamaşasında Qumral rolunda çıxış edən gənc ifaçı Əzizəxanım Kazımova öz təbii oyunu ilə tamaşaçıların diqqət çəkə bilib. Yəqin ki, rejissorlar onu diqqətdə saxlayacaqlar.

“Əliqulu bu gün evlənir” tamaşasının quruluşçu dirijoru Əməkdar incəsənət xadimi Fəxrəddin Atayev, xormeysteri Əməkdar artist Vaqif Məstanov, quruluşçu baletmeysteri Əməkdar artist Nigar Şahmuradova, quruluşçu rəssamı Əməkdar rəssam Nabat Səmədovadır. Geyim üzrə rəssamı Nübar Hüseynova, konsertmeysteri isə Fidan Əliyevadır.

Əliqulunun çalınmayan toyuna tamaşa etmək istəyənlər Azərbaycan Dövlət Akademik Musiqili Teatrının repertuarını izləyə bilərlər.(Fotolar Azərtacındır)

Etibar CƏBRAYILOĞLU
Reyting.az

Ana səhifəyə dön