“YUĞ”-un direktoru: “Nazirin sözləri kollektivdə inam yaratdı”

“YUĞ” Dövlət Teatrının yaranmasından 35 il keçir. Bu illər ərzində kollektiv maraqlı tamaşalar hazırlayıb, ölkəmizi beynəlxalq sənət festivallarında layiqincə təmsil etməyə çalışıb.

Mədəniyyət naziri Adil Kərimli bu günlərdə “YUĞ” Dövlət Teatrının kollektivi ilə görüşüb. Səmimi ortamda keçən görüşdə teatrın keçdiyi yola nəzər salınıb, uğurlardan danışılıb, yaradıcı və texniki heyəti narahat edən problemlər ətrafında fikir mübadiləsi aparılıb.

“YUĞ” Dövlət Teatrının direktoru, Əməkdar mədəniyyət işçisi İslam Həsənov Reyting.az-a açıqlamasında mədəniyyət nazirinin kollektivlə görüşünü səmərəli adlandırıb:

“Cənab nazirin teatrımızın 35 illiyi ərəfəsində bizimlə görüşə gəlməsi, iş şəraitimizlə şəxsən maraqlanması, səmimi şəkildə söhbəti çox faydalı oldu. Kollektivimizin keçdiyi yol, qazandığı uğurlar, son illər tamaşaya qoyulan səhnə əsərləri, iştirak etdiyimiz beynəlxalq teatr festivallarındakı qazandığımız mükafatlar barədə ətraflı məlumat verdik. Bizi narahat edən məsələləri də nazirin diqqətinə çatdırdıq”.

Qeyd edək ki, “YUĞ” teatrının Murtuza Muxtarov küçəsində yerləşən binası Bakıda salınan Mərkəzi İstirahət Parkının ərazisinə düşdüyündən sökülüb və kollektiv Azərbaycan Dövlət Kukla Teatrının binasına sığınmalı olub. Direktorun sözlərinə görə, nazirin bu problemin yaxın zamanlarda müsbət həll ediləcəyi ilə bağlı dediyi sözlər kollektivdə inam yaradıb: “Artıq uzun müddətdir ki, “YUĞ” öz binası olmadan fəaliyyət göstərməyə məcburdur. Bu illər ərzində Dövlət Kukla Teatrında məşqlər edir, yeni tamaşalar hazırlayırıq. Bu da yaradıcı kollektivin potensialını tam gücü ilə göstərməyə mane olur, gündəlik işimizdə xeyli çətinlik yaradır. Nazir Adil Kərimli bizimlə görüşəndə şəraitimizlə də tanış oldu, özü də şəxsən gördü ki, kollektiv necə fədakarlıq edir. Cənab nazir əminliklə dedi ki, yaxın zamanlarda “YUĞ”un bina problemi həll olunacaq. Onun sözləri kollektivdə böyük inam yaratdı”.

“YUĞ”un 35 illiyi bu teatrın yaradıcısı, Əməkdar incəsənət xadimi unudulmaz Vaqif İbrahimoğlunun 75 illik yubileyi ilə eyni vaxta təsadüf edir. Direktorun sözlərinə görə, kollektiv bir araya gələrək mərhum sənətkarın xatirəsini anıb: “Vaqif İbrahimoğlunun xatirəsi hər birimiz üçün çox əzizdir, bu gün kollektivdə Vaqif müəllimlə çiyin-çiyinə “YUĞ”u yaradanlar, həm də onun tələbələri çalışır. Yubiley günündə hamımız bir araya gəlib Vaqif müəllimin ruhunu ehtiramla yad etdik. Vaqif İbrahimoğlunun 75 illiyi ilə bağlı başqa bir planımız da var, bir vaxtlar onun bu teatrda quruluş verdiyi “Albalı bağı” tamaşasını bərpa etmək fikrindəyik. Çexovun pyesi əsasında hazırlanan səhnə əsərini gələn ilin martında sənətsevərlərə təqdim etməyi planlaşdırırıq”.

İslam Həsənov onu da bildirib ki, teatr Estoniyaya qastrola hazırlaşır. “YUĞ” Tallin şəhərində “Asılqan” tamaşası ilə çıxış edəcək: “Rejissor Əbdülqəni Əliyevin Xalq yazıçısı Anarın hekayəsinin motivləri əsasında hazırladığı “Asılqan” teatrımızın son uğurlu işlərindəndir. Səhnə əsərində rolları Elşən Əsgərov və Ləman Mərrih oynayırlar. Estoniyadakı diaspor təşkilatları, həmin ölkədə yaşayan soydaşlarımızın dəvəti ilə Tallinə gedib dekabrın 29-da tamaşanı təqdim edəcəyik”.

Direktor sonda əlavə edib ki, “YUĞ”un Tallinə səfəri Azərbaycan Respublikası Mədəniyyət Nazirliyinin və Estoniya Mədəniyyət Nazirliyinin razılığı əsasında reallaşacaq.

E. İSMAYILOV

Ana səhifəyə dön