Stiv Bolduin: "Leonardo Di Kaprionu kino sənətinə sırıyıblar"

Stiven Bolduin

"Adi şübhəlilər" filmində oynadığı roluna görə daha da məhşurlaşan amerikalı aktyor Stiven Bolduin öz həmkarı, Hollivud ulduzu Leonardo Di Kaprionu sərt tənqid edib. Stiven Bolduin əminliklə deyib ki, Leonardo Di Kaprion əslində çox yaxşı aktyor deyil. Üstəlik, həddən artıq qiymətləndirilib və imtiyazlı birinə çevrilib.

Reyting.az-ın "World of Reel"-ə istinadla verdiyi məlumata görə, uzun illərdir ki, öz karyeralarını, talelərini kinoya həsr edən və Hollivud çevrəsində yaxşı tanınan Bolduin ailəsinin üzvü, dörd qardaşın ən kiçiyi olan aktyor Stiven Bolduin Di Kaprionu hətta qərəzli şəkildə tənqid etməklə ona meydan oxuyur.

Bolduin iddia edir ki, Kaprio əslində fitri istedadı sayəsində uğur qazanmayıb.

"Leonardo Di Kaprio o qədər də istedadlı aktyor deyil. Məncə, belə bir xüsusiyyət əslində müəyyən dərinlik, yəni ekran varlığı tələb edir. Və hamımız yaxşı bilirik ki, bütün zamanların ən böyük aktyorlarına baxdıqda onların hamısı tamaşaçılar qarşısında peşəkarlıq nümayiş etdirdiklərinə görə ancaq böyük emosional reaksiya doğurublar. İstedadlı sevilənlər həmişə olub və qəribə səslənsə belə, onlar sənayedə Di Kapriodan böyük görsənmirlər, çünki daim ona yaxşı rollar verilir. Fakt budur ki, Leonardo Di Kaprio bir neçə möhtəşəm filmdə rol alıb, amma bu, onu böyük aktyor etmir. Bəlkə də, heç onu aktyor Qari Oldman kimi görmürlər, amma böyük aktyor sayılır. Mürəkkəb bir yanaşmadır. Ona görə yox ki, o da bir çox aktyorlar kimi sənətini yüksək peşəkarlıq baxımından daha da yaxşı mənimsəmək naminə kinonu tərk edib və on il ərzində Brodveydə çıxış edib, xeyr!. O, hətta bunu da etməyib. Məhz teatr səhnəsində canlı oynamağı, yəni sənə baxan tamaşaçılarla ünsiyyəti nəzərdə tuturam. Elə buna görə də fikrimcə, Leonardo Di Kaprio deyildiyi qədər heç də çox böyük potensiala malik bir kino aktyoru deyil, sadəcə, onu bu kino sənətinə sırıyıblar",-deyə Bolduin bildirib.

Leonardo Di Kaprion

Daha sonra o, Kaprionu digər aktyorlarla müqayisə edib. S. Bolduin teatr və kino aktyoru, Hollivud ulduzu Al Paçinonu isə "oyunların Maykl Jordanı" adlandırıb. O, həmçinin aktyor Con Litqounu da böyük və qiymətləndirilməyən aktyorlardan biri sandığını söyləyib. Tom Kruzdan söz açan Bolduin onu "bütün zamanların ən böyük kino ulduzu" adlandırıb.

Hollivud kinosunun ulduz aktyorlarından biri hesab olunan Leonardo Di Kaprionun böyük liqalardakı statusuna, onun böyük kinodakı karyerasının möhkəmlənməsinə kömək edən rejissor Martin Skorseze bir dəfə açıq şəkildə bildirmişdi ki, Di Kaprio aktyor kimi onun üçün Brando, Olivie, De Niro, Paçino, Dey-Lüis, Nikolson, Boqart səviyyəsində olan məşhurlardan biridir.

Oqtay QORÇU

Ana səhifəyə dön