Qədim Honşan əjdahası tapılıb » arxiv.reytingaz.info

Arxeoloqlar qədim Çinin ən böyük nefrit, yəni yeşim əjdahasını tapıblar.

Reyting.az "Science" saytına istinadla bildirir ki, arxeoloqlar Çin Xalq Respublikasının şimalında yerləşən, həmçinin 1949-cu ildən Daxili Monqolustan Muxtar Bölgəsi adlanan böyük bir ərazidə (Bu bölgə həm də monqolca Öbür Monggol adlanır) çox qədim tarixə malik böyük kəşf ediblər.

Çinli arxeoloqların fikrincə, bu bölgədə yeni aşkar edilən və indiyə qədər tapılanların ən böyüyü sayılan nefrit, yəni yeşim Honşan mədəniyyəti ilə əlaqəli ilk üzə çıxan əjdaha artefaktıdır.

4000 ildən də əvvəl yaradılmış bu misilsiz və qiymətli artefakt həm də inkişafı çox qədim dövrlərə gedib çıxan bənzərsiz Çin sivilizasiyasının ən yüksək sənətkarlığının və dini inanclarının sübutdur.

Nefrit əjdahasının uzunluğu 15,8 sm, eni 9,5 sm, qalınlığı isə 3 santimetrdir. Qədim artefakt 2024-cü ilin aprelindən arxeoloji qazıntıların aparıldığı Çifenq rayonunda tapılıb.

Eradan öncə 3500-2500-cü illərdə qədim Çinin ərazilərində mövcud olmuş Honşan mədəniyyətində artefaktlar emalı, eləcə də müxtəlif formalı fantastik heyvanların simvolik təsvirlərini yaratmaq həm də bu qədim ölkədəki ibadət inancı ənənələrinə görə müqəddəs bir lütf kimi qəbul edilib. Elm adamlarının dediklərinə görə, burada aşkar edilmiş artefaktlar arasında qədim Honşan mədəniyyətin hər sahəsini təmsil edən 100-dən çox nadir nümunə daxildir. Qazıntılar zamanı nefrit əşyalarla yanaşı, qəbirlər, skelet qalıqları, həmçinin bəzi keramika məmulatları da aşkar edilib ki, bu da mürəkkəb ritual dəfn sisteminin mövcudluğundan xəbər verir.

Yeni və elm aləmində ilk hesab edilən bu kəşf həm də ona görə alimlər üçün daha çox maraqlıdır ki, məzarlardan biri qədim Çinin şimal, həmçinin cənub memarlıq ənənələrinin elementlərini mükəmməl bir şəkildə özündə birləşdirib. Elə buna görə də belə bir nadir kəşfin sayəsində ölkənin müxtəlif bölgələri arasındakı mədəni mübadilələr haqqında artıq yeni fikirlərin meydana çıxdığı deyilir. Bununla da Çinin müasir tarixində və eləcə də arxeologiya elmində fərqli baxışlar, nəzəriyyələr, həm də yeni ideyalar yaratmaqla bu sahələrdə geniş, əhatəli araşdırmalara başlanacağı düşünülür.

Çinli alimlər, arxeoloqlar bildiriblər ki, bu qədim ərazidə tapılmış qədim və tarixilik baxımından çox nadir, həmçinin qiymətli hesab olunan belə müxtəlif artefaktların üzə çıxması əvəzsiz kəşf kimi Çin alimlərinə yeni yollar açır. Daxili Monqolustan bölgəsinin, həmçinin də ölkənin şimal-şərqinin araşdırılmasını davam etdirməklə çinli alimlər, həm də bu regionda mövcud olmuş tarixi baxımdan qədim mədəniyyətlərin daha dərindən və əhatəli öyrənilməsində iştirak etməklə ilk kəşfin mənbələrinə istinad edəcəklər.

Çin arxeoloqları və elm adamları bildiriblər ki, bu kəşf və qiymətli yeni tapıntı müasir Çin elmində uğurlu yeniliyə doğru çox mühüm addım olacaq.

Oqtay QORÇU

Ana səhifəyə dön