"Skal Baku"nun 22-ci toplantısı "Sumqayıt Plaza"da keçirilib

Oktyabrın 26-da "Skal İnternational" beynəlxalq turizm təşkilatının Bakı klubunun 22-ci ziyafət toplantısı keçirilib.

Reyting.az bildirir ki, bu dəfə ənənədən bir qədər kənara çıxan klub üzvləri paytaxtdan kənarda – Sumqayıtda yerləşən "Sumqayıt Plaza" hotelində toplaşıblar.

Tədbirin rəsmi hissəsində çıxış edən "Skal Baku"nun prezidenti Ceyhun Aşurov təşkilatın son bir illik fəaliyyəti barədə iştirakçılara ətraflı məlumat verib. Bildirib ki, MDB məkanında ilk dəfə olaraq Bakıda yaradılan qurum 2009-cu ildən fəaliyyət göstərir və bu müddətdə Azərbaycan turizminin inkişafı üçün müəyyən işlər görüb. Onun sözlərinə görə, skal turizm peşəkarlarının könüllü birliyidir və dostlar arasında biznes yaratmaq missiyası daşıyan bir təşkilatdır.

"Skal Baku"nun 22-ci toplantısı "Sumqayıt Plaza"da keçirilib

Rəhbərlik etdiyi bir il ərzində klubun fəaliyyətindən danışan C. Aşurov deyib ki, bu müddətdə qurumun iclasları, müxtəlif mövzularda təlim və treninqlər keçirilib. Bu dövrdə turizm sahəsində təhsil alan tələbələrlə görüşlər və təlimlər təşkil edilib. Eyni zamanda turizm sənayesinin peşəkarları ilə Networking xarakterli görüşlər keçirlilib. Həmçinin mehmanxana xidmətinə aid xüsusi təlimlər və böyük miqyasda "Tourism Meetup and Workshop" tədbir sənayedə böyük maraqla qarşılanıb.

"Turizmin inkişaf etdiyi ölkələrdə «Skal İnternational»a üzv olmağa və qurumun müxtəlif klublarının yaradılmasına böyük önəm verilir. İspaniya, Fransa, İtaliya kimi ölkələrdə "Skal" geniş fəaliyyətə malikdir". Bu sözlər isə "Skal Baku"nun yaradıcısı və qurumun fəxri sədri Ruslan Quliyevə məxsusdur. Onun sözlərinə görə, Azərbaycan bu təşkilata 2009-cu ilin sentyabrında üzv olub. Həmin il "Skal İnternational"ın Türkiyə Respublikasından seçilmiş o zamankı prezidenti Hülya Aslantaşın iştirakı ilə "Skal Bakı" klubu təsis edilib.

"Skal Baku"nun 22-ci toplantısı "Sumqayıt Plaza"da keçirilib

R. Quliyevin fikrincə, ölkəmizdə turizm inkişaf edən və perspektivi olan bir sahədir. Bu səbəbdən də «Skal»a üzvlük Azərbaycanın turizm potensialının dünyada tanınmasına çox böyük yardım edir.

Ölkədə turizmin inkişaf səviyyəsindən danışan klubun eks-prezidenti bildirib ki, hazırda Azərbaycanda həm regionlarda, həm də paytaxtda adıçəkilən sahənin inkişafı eyni zamanda yüksək standartlara cavab verən hotellərin sayının artması ilə müşayiət olunur. R. Quliyev tədbirin keçirildiyi Sumqayıt şəhərində son illər turizm sahəsinin inkişafı istiqamətində həyata keçirilən işlər haqqında danışıb və maraqlı bir təklif də irəli sürərək bildirib ki, müxtəlif tədbirləri, festivalları bu şəhərdə keçirməklə buranı festivallar və turizm mərkəzinə çevirmək olar.

"Sumqayıt Plaza" hotelinin nümayəndəsi Yusif Fərzəliyevin təqdimatı ilə iştirakçılar hotel haqqında məlumat alıblar.

Tədbirdə daha sonra Azərbaycan Turizm və Menecment Universitetinin prorektoru Anar Eminov, Milli Məclisin deputatı Mirzəcan Xəlilov, Azərbaycan Milli QHT Forumunun prezidenti Rauf Zeyni, Azərbaycan Dövlət Turizm Agentliyinin nümayəndəsi Kənan Qasımov çıxış edərək, Azərbaycanda turizm sahəsinin inkişaf perspektivləri barədə maraqlı fikirlər söyləyiblər.

"Skal Baku"nun baş katibi Tahir Məmmədovun "Skal İnternational" haqqında qısa təqdimatından sonra təşkilatın yeni üzvlərinə üzvlük kartları, klubun fəal üzvlərinə isə təşəkkürnamələr təqdim edilib.

Sonra tədbir şam yeməyi ilə davam etdirilib.

Fəxriyyə Abdullayeva

Ana səhifəyə dön