Siyasi şərhçi: “Yeni Baş nazir Gürcüstanı ABŞ-ın aləti olmağa imkan verməyəcək”

“Başda ABŞ olmaqla, Qərb dövlətləri müəyyən məqsədlərinə çatmaq üçün demokratiyanı vasitəyə çeviriblər. ABŞ 2003-cü ilin oktyabrında “Qızılgül inqlabı”nı başlatdı və nəticədə 15 yanvar 2004-cü ildə Mixail Saakaşvili Gürcüstanda hakimiyyətə gəldi. Onların məqsədi Gürcüstanı siyasi alətə çevirib Rusiyaya qarşı istifadə etmək idi. Bunun da nəticəsini gürcü xalqı ağır ödədi və ərazisinin bir qismini itirməli oldu. İndi hakimiyyətdə olan “Gürcü Arzusu” Partiyası xalqın maraqlarına uyğun siyasət yürütmək niyyətindədir. Bu məqsədlə Türkiyə prezidentinin bölgədə birgə əməkdaşlıq çağırışına müsbət yanaşıb və bu istiqamətdə danışıqlar aparmaq niyyətini bildirib”.

Bunu Reyting.az-a açıqlamasında Strateji Planlaşdırma və Araşdırmalar İnstitutunun rəhbəri, siyasi şərhçi Azad Məsiyev Gürcüstanda baş verən son proseslərdən danışarkən deyib.

Onun sözlərinə görə, Gürcüstanın müstəqil siyasəti, qonşularla münasibəti yaxşılaşdırmaq ABŞ-ın maraqlarına uyğun gəlmir. Bu baxımdan Böyük Britaniyanın Gürcüstandakı səfiri Mark Kleyto və ABŞ-ın Gürcüstandakı Səfirliyi “Birləşmiş Millət Hərəkatı” Partiyasının sədri Nika Meliyanın həbsini bəhanə edərək Gürcüstanın Avropa standartlarından və demokratik dəyərlərdən uzaqlaşdığını bəyan ediblər.

Azad Məsiyev Nika Meliyanın İngiltərədəki ali məktəblərdən birinin məzunu olduğunu xatırladaraq deyib: “Bəs Mixail Saakaşvilinin yaratdığı “Birləşmiş Millət Hərəkatı” Partiyasının sədri Nika Meliya ABŞ üçün niyə bu qədər önəmlidir? Bir məsələyə aydınlıq gətirmək yerinə düşərdi.

Keçmiş SSRİ-nin Dövlət Təhlükəsizlik Komitəsi bu ölkəyə xaricdən təhsil almağa gələn tələbələr arasında xüsusi işlər aparırdı. Potensialı olan tələbələri məxfi əməkdaşlığa cəlb edir, onları yetişdirir, sonra kəsfiyyat idarəsinə təhvil verirdilər. Həmin tələbələr ölkələrinə qayıtdıqdan sonra SSRİ-nin maraqlarına uyğun istifadə edilirdi, hətta onların məsul vəzifə tutmalarında maraqlı olur, həmin kadrlara dəstək verilirdi. DTK-nın bu metod və üsullarından əksər dövlətlərin xüsusi xidmət orqanları istifadə edir.

ABŞ da bu gün Gürcüstanda öz kadrlarını müdafiə etməklə hakimiyyətə təzyiq göstərir. Diplomatlarla yanaşı amerikalı konqresmen Adam Kinzinger Gürcüstan hökumətini dramatik hərəkətlərdən imtina etməyə çağırır, Avropada ABŞ-ın quru qoşunlarının keçmiş başçısı general Ben Hoces isə bəyan edir ki, Nika Meliyanın saxlanılması Gürcüstan üçün geriyə atılmış addımdır”.

Siyasi şərhçi bildirib ki, Gürcüstanda keçirilən parlament seçkilərində hakim partiya olan “Gürcü Arzusu”nun qələbə qazanması, müxalif partiyanın yeni parlamentin tərkibində yer almaması ABŞ-ın narahatlığına səbəb olub: “Birləşmiş Millət Hərəkatı” Partiyasının sədri Nika Meliya tərafdarları və dövlət sturukturlarında fəaliyyət göstərən ABŞ-a meyilli kadrlar ölkə daxilində siyasi qarşıdurmalar yaratmaqla ölkəni xaosa sürükləyirdilər. Bunun qarşısını almaq üçün Giorgi Qaxariya istefa verdi. Giorgi Qaxariyanın istefasından sonra İrakli Qaribaşvili Baş nazir seçildi. O, Nika Meliyanın həbs olunmasını şərh edərkən hüquq-mühafizə orqanlarının fəaliyyətini alqışlayıb”.

İnstitut rəhbəri əlavə edib ki, “Gürcü Arzusu” Partiyası xalqın mənafeyinə uyğun olaraq regionun inkişafında, həm Türkiyə, həm də Rusiya ilə ikitərəfli, eyni zamanda coxtərəfli əməkdaşlıq qurmaqda maraqlıdır: “Bu məqsədlə Türkiyənin Xarici işlər naziri Mövlud Çavuşoğlunun, Gürcüstan Baş nazirinin müavini-Xarici işlər naziri David Zalkalianinin 19 fevral 2021-ci ildə Bakıya səfəri nəzərdə tutulmuşdu. Bu səfər çərçivəsində Azərbaycanın Xarici işlər naziri Ceyhun Bayramovun iştirakı ilə işgüzar görüş baş tutmalı idi. Gürcüstandakı məlum istefa görüşün təxirə salınmasına səbəb oldu. Hesab edirəm ki, yeni Baş nazir Gürcüstanın ABŞ-ın alətinə çevrilməsinə imkan verməyəcək”.

“Gürcü Arzusu” Partiyasının Rusiya ilə münasibətləri yaxşılaşdırdıqdan sonra Rusiyanın Gürcüstan ərazisindən keçən enerji xətlərinin fəaliyyətinə mane olacağı ilə bağlı səslənən iddialara gəldikdə, A. Məsiyev qeyd edib ki, Gürcüstan ərazisindən keçən enerji xətləri bu ölkəyə külli miqdarda gəlir gətirir: “Səsləndirdiyiniz fikirlər Gürcüstanın həm iqtisadi, həm də siyasi maraqlarına uyğun deyil, çünki qeyd etdiyiniz enerji xətləri beynəlxalq status alıb və bu kəmərlər üzərindən Azərbaycanın, Türkiyənin, o cümlədən Avropa dövlətlərinin strateji maraqları uzlaşmaqdadır. Güya “Gürcü Arzusu” Partiyasının hakimiyyətdə olması enerji xətlərinin fəaliyyətinə təhlükədir, Gürcüstanda hakimiyyətdə olanlara təzyiq etmək, onların hakimiyyətdən uzaqlaşdırmaq üçün ABŞ-ın Tblisidəki fəaliyyətinə dəstək vermək anlamı yaratmaqdır. Belə fikirlər ABŞ-ın xüsusi xidmət orqanlarının dövriyyəyə buraxdığı dezinformasiyadan başqa bir şey deyildir”.

Ana səhifəyə dön