Qanuni əsaslarla Çexiyada 1,13 milyondan çox əcnəbi yaşayır. Bu da əhalinin 10,38 faizini təşkil edir.

Reyting.az xəbər verir ki, bunu Çexiya Daxili İşlər Nazirliyi (DİN) bildirib.

Qeyd olunur ki, bu ölkəyə axın və əcnəbilərin sayındakı artıma Rusiya-Ukrayna müharibəsi səbəbindən ukraynalı vətəndaşlara verilən müvəqqəti müdafiə statusu da rol oynayır.

Hazırda Çexiyada ən böyük əcnəbi icma ukraynalılardır. Statistikaya görə, onların sayı təxminən 613 min nəfərə çatıb.

DİN-nin məlumatında vurğulanır ki, bu ölkəyə sığınmış ukraynalıların 393 min nəfəri Çexiyada yaşayan qaçqın kimi müvəqqəti müdafiə statusuna malikdir.

Ukraynalılardan sonra Çexiyada yaşayan əcnəbilər arasında çoxluq təşkil edən slovaklardır. Onların sayı 125 minə çatıb.

Avropanın bu ölkəsinə pənah gətirən xarici vətəndaşlar sırasında 70 min vyetnamlı, o cümlədən 37,5 min nəfər rusiyalı var.

Ümumiyyətlə, Çexiya Respublikası əhali sayının nisbətinə görə, Ukrayna qaçqınlarına qapı açan, həm də bu ölkənin vətəndaşlarını ən çox qəbul edən Avropa İttifaqı ölkələrindən biridir. Əslində Çexiya üçün bu önəmli amil ölkənin miqrasiya siyasətini də müəyyənləşdirir.

Oqtay QORÇU