Siyasi şərhçi: “Gürcüstandakı istefalar ABŞ-dan qaynaqlanır”

“Gürcüstan coğrafi baxımdan Cənubi Qafqazda önəmli bölgədir. Ona görə də ABŞ bu bölgədə 2003-cü ilin oktyabrında “Qızılgül inqlabı”nı başlatdı və nəticədə 15 yanvar 2004-cü ildə Mixail Saakaşvili hakimiyyətə gəldi. Həmin vaxtdan Amerikaya münasib kadrlar Gürcüstanda dövlət idarəçiliyinə yerləşdirildi və nəticə olaraq Gürcüstan NATO-ya inteqrasiya istiqamətində fəaliyyətə başladı”.

Bunu Reyting.az-a açıqlamasında Strateji Planlaşdırma və Araşdırmalar İnstitutunun rəhbəri, siyasi şərhçi Azad Məsiyev Gürcüstanın Baş naziri Giorgi Qaxariyanın və rəhbərlik etdiyi hökumətin tam tərkibdə istefasına münasibətində deyib.

Onun sözlərinə görə, M. Saakaşvilinin fəaliyyəti nəticəsində Rusiya-Gürcüstan münasibətlərində soyuqluq bu günə kimi davam etməkdədir.

A. Məsiyev xatırladıb ki, hakim “Gürcü Arzusu” Partiyasını 19 aprel 2012-ci ildə biznesmen Bidzina İvanişvili yaradıb:

“Gürcüstanda 2020-ci ilin oktyabrın 31-də keçirilmiş parlament seçkilərinin nəticələrinə əsasən “Gürcü Arzusu-Demokratik Gürcüstan” Partiyası Baş nazir vəzifəsinə Giorgi Qaxariyanın namizədliyini irəli sürdü və nəticədə o, hakimiyyəti fomalaşdırdı”.

İnstitut rəhbəri əlavə edib ki, ötən ilin sentyabr ayının 27-də Qarabağda başlayan 44 günlük Vətən müharibəsinin nəticəsi bölgədə geosiyasi vəziyəti dəyişib, bunun nəticəsi olaraq keçən ilin dekabr ayında Bakıda Qələbə paradına həsr olunmuş mətbuat konfransında Türkiyə prezidenti Rəcəb Tayyib Ərdoğanın bölgədə birgə əməkdaşlıq bəyanatı (3+3 formatında, Türkiyə, Rusiya, Azərbaycan, İran, Gürcüstan, Ermənistan) sülhə və bölgənin inkişafına hesablanmış bir ideyadır: “Bu ideyanı həyata keçirmək üçün Türkiyə-Azərbaycan-Gürcüstan dövlətləri, digər tərəfdə isə Rusiya-İran-Ermənistan dövlətləri arasında dialoqun, məsləhətləşmələrin başlanması nəzərdə tutulmuşdu. Bölgənin belə bir formatda inkişafı, iqtisadi-siyasi cəhətdən birgə əməkdaşlığı ABŞ-ın bu bölgədə siyasi baxımdan tam iflası deməkdir. Qeyd etdiyim kimi, üçtərəfli dialoqu inkişaf etdirmək üçün Türkiyənin Xarici işlər naziri Mövlud Çavuşoğlunun, Gürcüstan Baş nazirinin müavini-Xarici işlər naziri David Zalkalianinin 19 fevral 2021-ci ildə Bakıya səfəri nəzərdə tutulmuşdu. Bu səfər çərçivəsində Azərbaycanın Xarici işlər naziri Ceyhun Bayramovun iştirakı ilə işgüzar görüş baş tutmalı idi. Ehtimal edilirdi ki, bu toplantıda bölgənin gələcək inkişafı üçün ciddi müzakirələr aparılacaq. Gürcüstanda da yaxşı anlayırlar ki, böyük imkanlara malik qonşu Rusiya ilə münasibətdə düşmənçilik siyasəti gürcü xalqının mənafeynə uyğun deyil və ABŞ-ın əlində alətə çevirilmək gürcü xalqını uçuruma aparır. Necə ki, bu gün onun ağrısını çəkməkdədirlər. Bu baxımdan Türkiyə prezidentinin bölgədə birgə əməkdaşlıq bəyanatı gürcü xalqının da mənafeynə uyğun olduğu üçün çox müsbət yanaşılırdı. Ancaq Gürcüstanın Baş naziri Giorgi Qaxariyanın qəfil istefası Xarici işlər nazirlərinin Bakıda nəzərdə tutulmuş görüşünün təxirə salınmasına səbəb oldu”.

Siyasi şərhçi Gürcüstanın Baş naziri G. Qaxariyanın istefasını təsadüfi saymır:

“Gürcüstanda Mixail Saakaşvilinin yaratdığı “Birləşmiş Millət Hərəkatı” Partiyasının sədri Nika Meliya tərafdarlarının və dövlət sturukturlarında fəaliyyət göstərən ABŞ-a meyilli kadrların ölkə daxilində “siyasi qarşıdurmalar” yaratmaq barədə xəbərlər yayılmaqdadır. ABŞ Cənubi Qafqazda itirməkdə olan nüfuzunu bərpa etmək məqsədi ilə həm Gürcüstana, həm də Türkiyəyə təzyiq etməkdədir. İstər Gürcüstanda baş verən istefalar, istərsə də ABŞ Senatının üzvləri tərəfindən Cozef Baydenə ünvanlanmış məktubda qardaş Türkiyənin 44 günlük müharibədə Azərbaycana verdiyi dəstəyə görə kəskin şəkildə tənqid edilməsi, qardaş Türkiyəyə edilən təzyiq kimi başa düşülür. Bir sözlə, Gürcüstanda baş verən istefalar ABŞ-dan qaynaqlanır”.

Ana səhifəyə dön