Finlandiya Rusiyadan potensial hücumlar riskini azaltmaq üçün ölkənin cənubundan bəzi buzqıran gəmiləri şimala köçürməyi planlaşdırır.

Reyting.az xəbnər verir ki, bu barədə “Yle” məlumat yayıb.

Qeyd olunur ki, şimal limanları Oulu və Kemi buzqıran gəmilərin köçürülməsi üçün mümkün yerlər ola bilər. Onlar hazırda Rusiyaya olduqca yaxın yerləşən Helsinki Katajanokka limanında yerləşirlər.

“Rusiyanın Ukraynaya qarşı müharibəsi təchizat təhlükəsizliyi və müdafiə qabiliyyəti sahələrində xəbərdarlıq nümunələri təqdim edib. Belə nümunələrdən biri də buzqıran limanlarının mərkəzləşdirilməməsidir”, - deyə məqalədə bildirilir.

Finlandiya nəqliyyat və rabitə naziri Lulu Ranne jurnalistlərə bildirib ki, nazirlik milli buzqıran donanması üçün investisiya proqramının hazırlanmasını davam etdirir. O, həmçinin buzqıran əməliyyat sistemində islahatların aparıldığını da bildirib.

“Buzqıranların paylanması bu məsələlər kompleksinin yalnız kiçik bir hissəsidir, lakin bu da nəzərdən keçirilir. Hələlik yekun qərarlar qəbul edilməyib”, - deyə Ranne əlavə edib.

Kemi limanının direktoru Markku Rautio bildirib ki, Ukrayna “dərslərinə” qulaq asmaq məntiqlidir. O qeyd edib ki, buzqıranlar hazırda Helsinkidə cəmləşib və faktiki olaraq Rusiya raketlərinin potensial təhlükəsi altındadır.

Xatırladaq ki, 10 yanvar 2026-cı ildə Finlandiya piyada əleyhinə minaları qadağan edən Ottava Konvensiyasından rəsmi olaraq çıxıb. Ölkə hökuməti bu qərar üçün müdafiə mülahizələrini qeyd edib.

Finlandiya artıq rəsmi olaraq silahlı qüvvələrinin arsenalına piyada əleyhinə minalar əlavə edə bilər.

ELÇİN