Çində təkrar istifadə olunan maye yanacaqlı raket-daşıyıcıların istehsalı və sınağı üçün dəniz bazasının tikintisinə başlanılıb.

Reyting.az xəbər verir ki, "Space Epoch" aerokosmik şirkətinə məxsus "WeChat" sosial şəbəkə hesabında yayılan məlumata görə, kosmik baza Çinin şərqində yerləşən Hançjou şəhər dairəsinin Tsyantan rayonunda inşa ediləcək.

Bildirilir ki, bu nəhəng layihəyə 5,2 milyard yuan (təxminən 743 milyon dollar) sərmayə yatırılıb.

İlkin mərhələdə dəniz bazası 7,2 hektarlıq böyük bir ərazini əhatə edəcək. Layihəyə görə, burada orta və ağır sinif dəniz əsaslı raketlərin tədqiqi, istehsalı, yığımı, sınağı, bərpası, eləcə də təkrar istifadəsi həyata keçiriləcək.

Dəniz bazasının ildə 25-dək raket buraxılışını həyata keçirəcəyi bildirilir.

Qeyd edək ki, 2025-ci ilin mayında "Space Epoch" startapı "Yuanxincje-1" adlı təkrar istifadə olunan raketin ilk sınaq buraxılışını uğurla reallaşdırıb. Bu Çin kosmik raketi elə ilk sınaq uçuşu zamanı Şandun əyalətinin sahillərində dənizə uğurlu şaquli eniş edə bilmişdi.

Oqtay QORÇU