Donald Tramp administrasiyası, İsrailin Suriya daxilindəki hücumlarının ölkədəki sabitliyi poza biləcəyindən və İsrail ilə Suriya arasında potensial təhlükəsizlik müqaviləsi perspektivlərini sarsıda biləcəyindən narahatdır.

Reyting.az-ın məlumatına görə, “Axios” nəşrinə danışan iki adı açıqlanmayan yüksək vəzifəli ABŞ rəsmisi deyib ki, bu narahatlıqlar ABŞ prezidenti Donald Trampla İsrailin baş naziri Benyamin Netanyahu arasında telefon danışığından sonra ortaya çıxıb.

Rəsmilər bildiriblər ki, Ağ ev Suriyaya hücum barədə əvvəlcədən məlumatlandırılmayıb və İsrail keçmişdə olduğu kimi Suriyanı hərbi kanallar vasitəsilə xəbərdar etməyib.

Rəsmilər deyiblər ki, baş nazir Netanyahu ilə hücumları dayandırmağa çağırmaq üçün danışıblar: “Çünki o, belə davam edərsə, özünü məhv edəcək, böyük diplomatik fürsəti əldən verəcək və yeni Suriya hökumətini düşmənə çevirəcək”.

Rəsmilər qeyd ediblər ki, Suriya ictimaiyyəti hücumlarda uğradığı itkilərə görə qisas tələb edir və Netanyahunun hərəkətləri Vaşinqtonun Suriyanın gələcəkdə İbrahim sazişlərinə qoşulması istiqamətində ilk addım olacağına ümid etdiyi razılaşma üzərində işi pozur.

ABŞ rəsmiləri Tramp administrasiyasının İsrailin hücumlarının Suriyanı qeyri-sabitləşdirə biləcəyindən narahat olduğunu vurğulayıblar.

Dünən Tramp Suriyanın “real və çiçəklənən bir ölkə qurmaq” üçün atdığı addımları dəstəklədiyini deyib və İsraili “Suriya ilə güclü və həqiqi dialoq saxlamağa” çağırıb.

ELÇİN