Çinin dron istehsalçısı Ukraynaya qarşı vuruşur

Rusiya prezidenti Vladimir Putin Ukraynaya genişmiqyaslı hücuma başladıqdan sonra cəbhədən minlərlə kilometr aralıda yerləşən və az tanınan Rusiya şirkəti əsas problemlərdən birini - döyüş meydanında vəziyyəti kökündən dəyişdirəcək döyüş pilotsuz təyyarələrinə ehtiyacı həll etmək üçün Çin firmaları ilə əməkdaşlıq planı hazırlayıb.

Reyting.az xəbər verir ki, bu barədə “Bloomberg” agentliyi “Aero-HIT” şirkətinin sənədlərinə, eləcə də Rusiya rəsmiləri ilə yazışmalara istinadla bildirib.

Bu cür sübutlar Rusiyanın Pekinlə dostluq əlaqələrindən Qərb sanksiyalarından yan keçmək üçün necə istifadə etdiyini və Ukraynaya hücumlar üçün pilotsuz təyyarələr yaratmaq qabiliyyətini əldə etdiyini göstərir. Ümumilikdə, bu sənədlər Çindən Rusiyaya texnologiyanın necə gələ biləcəyini göstərir, hətta prezident Si Cinpin hökuməti hər iki tərəfə silah tədarükünü inkar etsə belə.

“Rusiya dövlətindən maliyyə alan “Aero-HIT”, uzaq şərqdəki Xabarovsk şəhərinin hava limanı yaxınlığındakı fabrikinin bu il ayda 10 min pilotsuz uçan aparat istehsal etmək gücünə malik olacağını və istehsalı daha qabaqcıl modellərlə genişləndirməyi planlaşdırdığını deyib. Şirkət qısa müddətdə Xerson bölgəsindəki hərbi əməliyyatlar üçün pilotsuz təyyarələrin əsas tədarükçülərindən birinə çevrildi”, - məqalədə qeyd olunur.

Məlumata görə, şirkətin məhsulları arasında (FPV) rejimli “Veles” dronları var ki, bunun sayəsində pilotlar real vaxt rejimində ekran və ya virtual reallıq eynəkləri vasitəsilə döyüş meydanını izləyə bilirlər.

Mart ayında alınan satınalma sənədlərinə görə, belə dronların bir sifarişi 8 milyon rubla başa gəlir, yəni bir pilotsuz təyyarə üçün təxminən min dollara.

Bununla belə, 2024-cü ilin iyununda ABŞ Maliyyə Nazirliyi “Aero-HIT”-ə sanksiya tətbiq edib. Bildirilir ki, “Veles” pilotsuz təyyarələrindən Xerson vilayətində yerləşdirilmiş Rusiya qoşunları tərəfindən Ukrayna hədəflərinə qarşı istifadə olunub.

Amma Rusiya bu sanksiyalardan yan keçməyin yollarını axtarmağa başlayıb. Xüsusilə, Çinin ən böyük dron və onların komponentlərini istehsal edənlərdən olan “Autel Robotics” məhsul tədarükünü və ya Rusiya şirkətləri ilə hər hansı əlaqəsi olduğunu inkar etsə də, “Bloomberg”in əldə etdiyi sənədlər bunun əksini göstərir.

Qeyd olunur ki, iki şirkət arasında əlaqələr sanksiyalara görə qısa müddətə kəsilsə də, “Autel”-in işçiləri ilə təmaslar təxminən 2024-cü ilin sonunda bərpa edilib və 2025-ci ilin may ayından etibarən tərəflər dron istehsalının lokallaşdırılması ilə bağlı danışıqlar aparırlar.

V. QULİYEV

Ana səhifəyə dön