Ali Rada ABŞ-dan Ukraynaya təklif olunan sazişi rədd edə bilər

ABŞ-nın yer təkinin sərvətləri ilə bağlı təklif etdiyi sənəd layihəsi absurddur, beynəlxalq müqavilə deyil və Ukrayna qanunvericiliyinə ziddir.

Reyting.az xəbər verir ki, bunu Ukrayna Ali Radasının Xarici siyasət və parlamentlərarası əməkdaşlıq komitəsinin sədri, beynəlxalq hüquqşünas Aleksandr Merejko deyib.

Onun sözlərinə görə, bu gün dərc olunmuş sənəd layihəsinin saxta olub-olmaması ilə bağlı tam anlayış yoxdur. “Amma görünür, bu, saxta deyil, çünki bu sənəd Amerika qanunları üslubunda yazılıb. Amma onun saxta olmadığına 100 faiz əminlik yoxdur. Əgər bu, həqiqətən də Amerika administrasiyasından ciddi təklifdirsə, o zaman bu sənədin yumşaq desək, absurd olması baxımından ciddi problemlər yaranır”, - Merejko vurğulayıb.

A. Merejko bildirib ki, layihədə Amerika qanunlarına uyğun, daha dəqiqi, Delaver ştatının (ABŞ) qanunlarına əsasən hüquqi şəxsin yaradılmasından bəhs olunur. O əlavə edib ki, bu kontekstdə başa düşmək lazımdır ki, söhbət Ukrayna Konstitusiyasına görə, Ukrayna xalqının mülkiyyəti olan Ukrayna resurslarından gedir.

“Əgər söhbət bu məsələnin formal tərəfindən gedirsə, deməli, bu, heç bir halda beynəlxalq müqavilə deyil”, - Merejko vurğulayıb.
O qeyd edib ki, tamhüquqlu beynəlxalq müqavilə hazırlamaq lazımdır, çünki saziş bundan ibarətdir: “İndi gözlənilmədən hansısa müqavilənin mətni təklif olunur ki, bu, beynəlxalq müqavilə deyil və Ukrayna qanunvericiliyinə uyğun gəlmir. Çünki bu, ABŞ qanunları baxımından yazılıb. Bu, qəbuledilməzdir. Ciddi yanaşma lazımdır, çünki söhbət Ukraynanın resurslarından, onun sərvətindən və gələcəyindən gedir. Və bunu tərəflərdən birinin müqaviləsi ilə həll etmək absurddur”.

Hüquqşünas qeyd edib ki, Ukrayna Ali Radası və ABŞ Senatı tərəfindən ratifikasiya ediləcək beynəlxalq saziş hazırlamaq lazımdır.

Bundan başqa, komitə sədri deyib ki, ABŞ Ukrayna ərazisində faydalı qazıntıların faktiki hasilatına keçməzdən əvvəl təcavüzkarı məğlub etməli, bu resursların da yerləşdiyi ərazilərin azad olunmasına köməklik göstərməlidir. Bundan sonra adıçəkilən layihənin həyata keçirilməsi mümkündür.

Ukraynalı deputat Yaroslav Jeleznyak isə bildirib ki, ABŞ Ukraynanın bütün yeraltı sərvətləri üzərində ABŞ-nın nəzarətini nəzərdə tutan “Yeraltı sərvətlər haqqında” saziş layihəsi təklif edib, lakin Ukraynanın təhlükəsizliyinə heç bir zəmanət yoxdur.

Baş nazirin birinci müavini, iqtisadiyyat naziri Yuliya Svırıdenko Ukrayna Ali Radasında hökumətə suallar saatı zamanı ABŞ-dan yeraltı sərvətlərə dair saziş layihəsinin Ukrayna hökumətinə daxil olduğunu təsdiqləyib. Onun sözlərinə görə, hazırda bunun üzərində işləyirlər və mövqelərini formalaşdırırlar.

E. KAMAL

Ana səhifəyə dön