Sabiq prezidentin tərəfdarları 200 əsgəri əsir götürüb

Boliviyanın keçmiş prezidenti Evo Morales hökuməti onlarla dialoqa inandırmaq üçün başlatdığı aclıq aksiyasının ikinci günündə BMT Baş katibi Antonio Quterreşə məktub göndərib.

Reyting.az Boliviya mətbuatına istinadla xəbər verir ki, Morales Baş katibə məktubunda Boliviyadakı vəziyyətlə bağlı narahatlığını ifadə edib.

“Bu məktub vasitəsilə BMT Baş katibi Quterreşdən sevimli Boliviyamızın düşdüyü kritik vəziyyətlə bağlı narahatlığımıza cavab verməsini gözləyirik. Artan zorakılıq və dövlət repressiyalarına son qoymaq üçün təsirli və səmimi dialoq tələbimizi ifadə edirik”,- sabiq prezident qeyd edib.

Morales ölkədəki iğtişaşlara son qoymaq üçün prezident Luis Arce hökuməti ilə səmimi dialoqa hazır olduqlarını bildirib və beynəlxalq təşkilatlardan, dost ölkələrdən dəstək istəyib.

Oktyabrın 28-də özünə qarşı silahlı hücumu xatırladan Morales yazıb:

“Prezident Maduro mənə iki avtomobil borc verməsəydi, silahlı hücum mənim həyatım bahasına başa gələ bilərdi. Prezident Maduro bir növ həyatımı xilas etdi”.

İqtisadi və siyasi tələblərinin masada olduğunu vurğulayan Moralesin sözlərinə görə, Arce hökuməti onları dinləyənə qədər aclıq aksiyasına davam edəcəklər.

Digər tərəfdən, Morales tərəfdarlarının 21 gündür həyata keçirdikləri yolbağlama aksiyaları davam edərkən, polislə nümayişçilər arasında ara-sıra gərginlik yaşanıb.

Oktyabrın 11-də prokurorluq tərəfindən “zorlama, insan alveri və qaçaqmalçılıq”da ittiham olunan Moralesin ifadə verməsi üçün həbs qərarı çıxarılıb. Moralesin həbsinə order verilməsinə etiraz edən fəallar avtomobil yollarını bağlayıblar. Prezident Arcenin istefasını tələb edən nümayişçilər həbs qərarının ləğvini tələb ediblər.

Xatırladaq ki, Morales oktyabrın 28-də Villa Tunari şəhərindən Laukaya koka istehsalçılarının radiostansiyasına gedərkən silahla hücuma məruz qalıb. O, sürücüsünün yaralandığını açıqlayıb.

Hücuma görə Boliviya prezidenti Arceni ittiham edən Morales deyib: “Arce tarixin ən pis prezidenti kimi tanınacaq. Keçmiş prezidenti güllələmək son nöqtədir”.

Hadisədən sonra Morales tərəfdarları ölkənin mərkəzində yolları bağlayıb və yüzlərlə polis nümayişə müdaxilə edib. Arce noyabrın 2-də izdihamlı silahlı qruplaşmanın üç kazarma ələ keçirdiyini, əsgərləri girov götürdüyünü açıqlayıb və bu qrupu “Moralesə bağlı silahlı simpatizanlar” kimi xarakterizə edib.

Boliviyada silahlı qrup kazarmalara hücum edərək 200-dən çox əsgəri əsir götürüb. Boliviya ordusu dünən bildirib ki, Koçabamba şəhəri yaxınlığındakı kazarma silahlı qrup tərəfindən ələ keçirilib və 200-dən çox əsgər əsirdir. Ordu silahlı qruplaşmanı kazarmaları “dərhal və dinc şəkildə tərk etməyə” çağırıb, əks halda onların hərəkətlərinin “ölkəyə xəyanət” kimi qiymətləndiriləcəyini vurğulayıb.

ELÇİN

Ana səhifəyə dön