Həbsdəki jurnalistin anası prezidentə müraciət edib

Sənan Həsənoğlu

Hazırda həbsdə olan jurnalist Sənan Həsənoğlunun anası Solmaz Kazımova (Yevlax şəhəri, Salatın Əsgərova küç., ev 38. tel: 0517201016) Azərbaycan Respublikasının Prezidenti İlham Əliyevə və Birinci vitse-prezident Mehriban Əliyevaya müraciət ünvanlayıb.

Reyting.az xəbər verir ki, S. Həsənoğlunun 70 yaşlı anası S. Kazımova oğlunun əfv olunmasını istəyir.

Əfvlə bağlı müraciətdə deyilir:

“Möhtərəm prezident, hörmətli Mehriban xanım!

Sizə təkcə ölkəmizin rəhbərləri kimi yox, həm də milli adət-ənənələrimizə sadiq və qayğıkeş azərbaycanlı ailəsinin başçıları kimi müraciət ünvanlayıram. Mən həbsdə olan jurnalist Sənan Abdullayevin anası, 70 yaşlı Solmaz Kazımova sizdən övladımın əfv edilməsini xahiş edirəm.

Oğlum 30 ilə yaxın ölkəmizin müxtəlif KİV-lərində çalışıb, hər zaman dövlətçiliyə və Heydər Əliyev siyasi kursuna sadiq olub. Sənan 1993-cü ildən 2003-cü ilədək "Ədalət", "Odlar yurdu", "Soydaş" və başqa kütləvi informasiya vasitələrində repartyor, 2003-cü ildən 2020-ci ilədək isə "Space" , ATV və AzTV-nin Qarabağda bölgə müxbiri kimi fəaliyyət göstərib.

2016-cı ilin aprel döyüşləri zamanı AzTV-nin Qarabağ bölgə muxbiri kimi, onun peşəkarlığı ali hərbi komandanlıq tərəfindən fəxri diplomla qiymətləndirilib. 44 günlük Zəfər müharibəsi zamanı isə Sənan Abdullayev rəsmi olaraq ölkəmizdə fəaliyyət göstərən internet televiziyalarının savaş müxbiri kimi Müzəffər Ordumuzun Ali baş komandanı İlham Əliyevin rəhbərliyi altında, rəşadətli qələbə xəbərlərini yaymaqla öz peşə borcunu layiqincə yerinə yetirib. Onun anası kimi mən də ömrümün 40 ilini əmək fəaliyyəti ilə məşğul olmaqla övladlarımı zəhmətlə və qayğıkeşliklə böyütmüşəm”.

Solmaz Kazımova yazır ki, əksər insanlar kimi oğlu Sənan Abdullayevin də bir insan kimi müəyyən səhvləri var: “Amma onun səhvləri bu gün-sabah öləcək ananın tabutunu oğulsuz qoymamalıdır.

Yaşımdan irəli gələn ağır xəstəliklərim var. Sənanın 3 övladı və 2 nəvəsi var. Demək olar ki, ailəsinin maddi durumu acınacaqlıdır. Sənan 2-ci tip kardioloji xəstədir, ikinci qrup gözdən əlildir, ürəyində 7 stenti var və ağır şəkər xəstəsidir. Birinci Qarabağ müharibəsinin iştirakçısıdır”.

Oğlu S. Abdullayevin Gəncə Ağir Cinayətlər Məhkəməsinin 12 dekabr 2022-ci il tarixli hökmü ilə 5 il 6 ay müddətinə azadlıqdan məhrumetmə cəzasına məhkum edildiyini xatırladan ana yazır ki, artıq o, 18 aydır həbsdədir:

“Cənab prezident, Siz Ümummilli lider Heydər Əliyevin davamçısı kimi artıq 20 ilə yaxındır ki, Azərbaycan Respublikasının Prezidentisiniz. Dahi liderin dahi də davamçısı olur. Dahi davamçılar isə ölkənin vətandaşları liderin həqiqətən onların maraqlarını düşündüyünü hiss etdikdə yaranır. Unutmayaq ki, insanlar yalnız etibar etdiklərinə inanırlar. Məhz Siz, Azərbaycan Respublikasının Prezidenti İlham Əliyev olaraq, 10 millyondan artıq Azərbaycan xalqının inamını qazanmağı bacarmısınız. Razılaşaq ki, liderlik məşhurluq deyil - səmimiyyətdir; o, hakimiyyət deyil - məqsəddir; liderlik vəzifə deyil - istedaddır. Yəni təkcə biz deyil, bütün Azərbaycan anaları Sizin kimi səmimi, məqsədli, humanist prezidentimizin olması ilə fəxr edir və edəcəkdir. Ən əsası da Siz bütün vətandaşlarımızın, elecə də məhkumluq həyatı yaşayan şəxslərin hüquqlarının təminatına daim xüsusi önəm vermisiniz. Sizin hakimiyyətiniz dörvründə 36 əfv sərancam ilə 6 mindən cox məhkumu bağışlamaqla onları ailələrinə qovuşdurmusunuz. Məhkum edilmiş şəxslərin əfv olunması hümanist addım olmaqla yanaşı insan və vətandaş hüquq və azadlıqlarına hörmət və ehtiramın bariz nümunəsidir. Elə ona görə də düz deyirlər ki, müdrik liderlər həmişə qayğıkeş olurlar.

Cənab prezident İlham Əliyev,
Çox hörmətli Mehriban xanım!

Sizdən ağbirçək ana kimi xahiş edirəm ki, Sənan Abdullayevin törətdiyi əməlin ictimai təhlükəlilik dərəcəsini, ilk məhkumluğunu, törətdiyi əməldən səmimi peşman olmasını, islah olunmasını, zərərçəkənlərlə barışıq əldə etməsini nəzərə alaraq, onu əfv edəsiniz.

Cənab Prezident!

Ağbirçək ana kimi gözəl bilirəm ki, Siz təkcə hazırda azadlıqda xoşbəxt yaşayanlara deyil, həmçinin azadlıqlarını itirmiş insanlara da xoşbəxtlik nəsib etmək gücündəsiniz. Mənim üçün xoşbəxtlik həm də oğlanlarımın çiynində qəbir evinə getməkdir. Siz təkcə Sənanı bağışlamaqla ona azadlığı bəxş etməyəcəksiniz, bizi, ailəsini,övladlarını sevindirməyəcəksiniz, Siz həm də onu bir ömür “anamı hamı kimi qəbir evinə yola salmadım” kimi vicdan əzabından qurtaracaqsınız”.

Ana səhifəyə dön