Autizmli uşaqların problemi müzakirə olunub

“Autizmli uşaqların valideynlərinin bacarıqlarının artırılması məqsədilə innovativ təşəbbüslərin təşkili” layihəsi davam etdirilir. “Autizm Defektoloji və Psixoloji Yardım Mərkəzi” İctimai Birliyi Qeyri-Hökumət Təşkilatlarına Dövlət Dəstəyi Agentliyinin yardımı ilə “2 Aprel - Ümumdünya Autizm Məlumatlandırma Gününə həsr edilmiş 2-ci beynəlxalq autizm konfransı” keçirib.

Reyting.az xəbər verir ki, tədbir şəhidlərin xatirəsini bir dəqiqəlik sükutla yad etməklə başlayıb.

“Autizm Defektoloji və Psixoloji Yardım Mərkəzi” İctimai Birliyinin sədri Çiçək Məmmədli layihənin həyata keçirildiyi ilk aylarda autizmli övladı olan valideynlərin bacarıqlarının artırılması məqsədilə beynəlxalq təcrübələrin və beynəlxalq ekspertlərin təcrübəsinin öyrənilib yayılması məqsədilə görülən işlərdən, bu sahədə həyata keçirilən tədbirlərdən söz açıb.

Millət vəkili Fazil Mustafa isə mövcud qanunvericilikdə autizm probleminə baxışın təkmilləşdirilməsindən danışıb.

F. Mustafa eyni zamanda qeyd edib ki, bəzən cəmiyyət üzvləri öz başına gəlməyənə qədər hər hansı hadisəni tam dolğunluğu ilə qəbul etmir və çox vaxt ona laqeyd yanaşır:

“Özünü tam sağlam hesab edənlər arasında bu gün autizmli xəstələrin problemlərinin ictimailəşməsi, onların cəmiyyət içərisinə çıxarılması və bu barədə müzakirə aparması çox böyük fədakarlıqdır”.

Bildirilib ki, ölkəmizdə 6 minə yaxın autizmli xəstə olması heç də onların tam siyahısı deyil: “Təəssüf ki, hələ də ailələrdə belə xəstələr barədə stiqma, onların cəmiyyətdən gizlədilməsi halları mövcuddur”.

Deputat autizmli uşaqlar üçün ayrıca məktəblərin açılması, valideynlərə maddi dəstək göstərilməsi, həmin xəstələrə əlillik pensiyalarının verilməsi, onlar üçün reabilitasiya mərkəzlərinin yaradılması məsələlərinin də vacibliyini qeyd edib.

Konfransda “Sağlamlığın Qorunması” İctimai Birliyinin rəhbəri, t.ü.f.d. Yazgül Abdıyeva autizmli uşaqların cəmiyyətə inteqrasiyası mövzusunda çıxış edib.

Y. Abdıyeva autizmin yaranması, risk faktorları, statistik göstəriciləri və s. barədə tədbir iştirakçlarına geniş məlumat verib. Burada əsas vurğu autizmin xəstəlik yox, fərqlilik olmasına yönəldilib.

Y. Abdıyeva autizm sindromlu uşaqların fərqli və xüsusi istedadından söz açıb, tarixdə iz qoymuş dahi şəxsiyyətlərin çoxunun məhz autizmli insanlar olmasına diqqət çəkib. Belə ki, məşhur alman alimi Albert Eynşteyn, məşhur rəssam-heykəltaraş Leanardo da Vinci, ingilis fiziki İsaak Nyuton, ispan əsilli rəssam Pablo Pikasso, holandiyalı məşhur rəssam Vincent Van Gogh, məşhur musiqişünas Ludviq van Bethoven, Avstryanın təkrarsız bəstəkarı Amadey Motsart, Amerika musiqiçisi James Durbin, kinorejissor Kim Berten, Kortni Lav, görkəmli Amerika yazıçısı Mark Tven, dünya şöhrətli Amerika ixtiraçısı Tomas Edison və digər dünya şöhrətli məşhurlar da autizm sindromlu olublar.

Y. Abdıyeva deyib ki, hər bir autist gələcəyin dahi şəxsiyyəti ola bilər: “Hər zaman onlara dəstək olmalı, onların real həyata adaptasiyasına, cəmiyyətə inteqrasiyasına kömək etməliyik”.

İctimai Birliyin icraçı direktoru Samirə Mustafayeva autik uşaqlarla işləmək yolları və onların fərdi bacarıqlarından danışıb.

Ankara Autizm Dərnəyi İdarə Heyətinin sədri Aydın Çayan, Hacettepe Universitetinin özəl təhsil bölməsinin müəllimi Seray Olcay və başqaları onlayn şəkildə konfransda çıxış edərək autizmli xəstələrin problemlərinin həlli sahəsində fikrilərini çatdırıblar.