Bəzi ölkələrdə karantin qaydaları sərtləşdirilir

Dünyada koronavirusla bağlı vəziyyət dəyişkən olaraq qalır. Artıq dünyada 328 milyondan çox insan koronavirusa yoluxub, rəsmi məlumatlarda 5 milyondan çox insanın bu virusdan həyatını itirdiyi bildirilir. Beynəlxalq təşkilatların məlumatlarına görə, hazırda dünyada 50 milyondan çox aktiv koronavirus xəstəsi var.

Beynəlxalq təşkilatların rəylərinə görə, dünyada virusun yayılma sürəti ilə vaksinasiya sürəti ciddi fərqlənir. Ümumdünya Səhiyyə Təşkilatı (ÜST) bildirir ki, bu ilin ortalarına qədər dünya əhalisinin 70 faizi peyvənd olunmalıdır. Lakin dünyadakı vaksinasiya sürətinə baxsaq, bu real görünmür.

Bu gərgin məqamda isə koronavirusun daha bir mutasiyaya uğramış variantı "Omikron" ştammı da sürətlə yayılır. "Omikron" aşkarlanmış ölkələrdə tezliklə vətəndaşaların böyük bir hissəsinin bu virusa yoluxacağı bildirilir.

Avropa ölkələri artıq "Omikron" ştammı ilə mübarizə üçün sərt tədbirlər görməyə başlayıb. Misal üçün, Yunanıstanda vaksin olunmayan 60 yaşdan yuxarı şəxslərin cərimə olunmasına başlanılıb. Avstriyada isə vaksinasiya məcburi elan edilib, Almaniyada qaydalar daha sərtdir. Belə ki, tam vaksinasiyası və neqativ test nəticəsi olmayanlar restoranlara buraxılmır.

Bəs Azərbaycanda koronavirusla bağlı son vəziyyət necədir?

Azərbaycanda yanvarın 10-da "Omikron" ştammı aşkarlanıb. Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələri İdarəetmə Birliyinin yaydığı birgə məlumatda qeyd olunub ki, ölkə xaricindən gələn şəxslərdən götürülən nümunələrdən 12-də SARS-CoV-2 21K "Omikron" variantı aşkarlanıb.

Reyting.az-ın məlumatına görə, infeksionist-hepatoloq Mərdan Əliyev “Trend”-ə bildirib ki, Azərbaycanda epidemoloji vəziyyət sabitdir.

"Dünyanın bir çox ölkələrində "Omikron" ştammı ölkələri cənginə alıb. Bu səbəbdən həmin ölkələrdə bir çox qadağalar qüvvəyə minib. Azərbaycanda isə hələki karantin qaydalarının sərtləşdirilməsinə ehtiyac duyulmur. Ölkəmizdə yaxın aylarda virusunun yayılması sürətlənməsə, yay fəslində virusun yayılması indikindən daha zəif olacaq. Buna əsas səbəb əhalimizin çoxunun yoluxub, sağalması və kütləvi peyvənd olunmasıdır. Təbii və süni immunitet birləşərək kollektiv immunitet formalaşdırıb. Bu səbəbdən ölkəmizdə yoluxmanın kəskin sürətdə artımı qeydə alınmır. Buna görə də karantin qaydalarının sərtləşdiriləcəyi gözlənilmir”.

Həkim bildirib ki, bu göstəricilərə baxmayaraq bütün gigyenik qaydalara əməl etmək, sosial məsafəni gözləmək lazımdır: “Bunlardan da vacib olanı vaksinasiyadı. Üçüncü doza vaksini həm risk qrupuna daxil olan, həm də xəstəliyi olmayan vətəndaşlarımızın qəbul etməsi tövsiyə olunur. Çünki virusdan qorunmaq üçün ən yaxşı variant vaksin olunmaqdır.

Ana səhifəyə dön