Yasamalın hüquq-mühafizə orqanları maklerin qarşısında aciz qalıb

Yasamal Rayon Məhkəməsinin hakimi Rauf Daşdəmirov

Avqust ayının birinci yarısında Rəhim Sultanova və onun sahibi olduğu şirkətə qarşı törədilmiş dələduzluq faktı ilə bağlı Yasamal Rayon Polis İdarəsində açılmış cinayət işinin normal hüquqi qaydada aparılmasına mane olan vəzifəli şəxslər barədə üç məqalə ilə çıxış etmişdik. Məsələnin ictimailəşməsi öz qanuni təsirini göstərdi və Bakı Apellyasiya Məhkəməsi doğru qərar verdi. O zaman yazımızı belə bir fikirlərlə bitirmişdik: “Şirkət ümid edir ki, Bakı Apellyasiya Məhkəməsinin qəbul etdiyi qanuni və ədalətli qərardan sonra Yasamal Rayon Polis İdarəsində aparılan cinayət işi hərtərəfli, tam və obyektiv araşdırılacaq, eyni zamanda Yasamal Rayon Prokurorluğu tərəfindən qanuni və ədalətli qərar qəbul edilərək təqsirkar şəxslər məsuliyyətə cəlb ediləcək”.

Təəssüf ki, şirkətin ümidi doğrulmayıb. Redaksiyaya daxil olan məlumatı dinlədikcə tam əmin oluruq ki, rayon hüquq-mühafizə orqanları dələduzluqda təqsirli bilinən şəxslərin əlində çarəsiz durumdadırlar.

Əvvəlki yazılardan da bilir ki, Rəhim Sultanovun tikinti şirkətinə ayrılan torpaq sahəsində sakinlərin köçürülməsi ilə, yəni maklerliklə məşğul olan Elmaz Hüseynov və şərikləri şirkətin resursları ilə qanunsuz əldə etdikləri mənzilləri mənimsəyiblər.

Bu günə kimi baş verən qanunsuzluqlar barədə əvvəlki yazılarda qeyd edilib. İndi isə Yasamal Rayon Məhkəməsində məhkəmə nəzarəti qaydasında aparılan işlə əlaqədar baş verən qanun pozuntularını oxucuların diqqətinə çatdırırıq. Belə ki, iş üzrə şahid olan və qərarlardan şikayət hüququ olmayan Elmaz Hüseynov, guya müstəntiqin onu rəsmi çağırışla deyil, telefon zəngi ilə idarəyə dəvət etməsindən şikayətçidir. Amma şikayətin sonunda cinayət işi üzrə qərar qəbul edilməsi xahiş edilir. Deməli, Elmaz Hüseynov o dərəcədə arxayındır ki, istənilən kağız parçasının sonunda cinayət işinə xitam verilməsi xahişini yazır və öz havadarlarının dəstəyi ilə həmin xahişin reallaşacağına ümidlidir. Bu barədə geniş şərh yazmadan, konkret olaraq Yasamal Rayon Məhkəməsinin hakimi Rauf Daşdəmirovun icraatında olan işin necə aparılmasını nəzərinizə çatdıraq. Guya, cinayət işinin gedişində Elmaz Hüseynovun hüququ pozulub (müstəntiq onu telefonla idarəyə dəvət edib) və o, məhkəmə nəzarəti qaydasında şikayət edib. Qanuna görə məhkəmə şahidin belə bir şikayətini təmin etməməlidir. Əksinə, qəbul edilməli olan qərar verilmir, əvəzində isə iş, süni şəkildə uzadılır. 15.09.2021-ci il tarixdə verilən şikayət, əvvəlcə 23.09.2021-də hakim Rauf Daşdəmirov tərəfindən təxirə salınır. Daha sonra iş 30.09.2021-ə təyin edilir. Həmin gün isə Elmaz məhkəməyə getmədiynə görə proses yenə təxirə salınır. Lakin hansı tarixə təyin edilməsi naməlum qalır. Qanunun tələbinə görə iş təxirə salınanda növbəti təyinat günü bilinir. Belə çıxır ki, Elmaz Hüseynov barədə qanunlar işləmir. Bu fikrimizi daha bir dəlillə sübut edə bilərik. Qanuna görə məhkəmə nəzarəti qaydasında olan işlərə təxirə salınmadan baxılır. Lakin Elmaz Hüseynov “şahid” kimi istintaqı və müstəntiqi saymadığı, çağırışlara gəlmədiyi halda onun hansı hüququnun pozulmasından söhbət gedə bilər ki, Yasamal Rayon Məhkəməsi buna görə işi təxirə salır və uzadır?

Cinayət işi ilə bağlı proses də acınacaqlıdır. Yasamal Rayon Polis İdarəsinin istintaq şöbəsinin, eləcə də Yasamal Rayon Prokurorluğunun da bu şəxsə gücü çatmır ki, cinayət işini yekunlaşdırsın və işi məhkəməyə göndərsin. Axırıncı dəfə müstəntiq istintaq hərəkəti olan üzləşdirməni 3 ay bundan əvvəl aparıb. Daha sonra heç nə edilməyib, cinayət işi irəli getməyib, iş üzrə təqsirkar şəxslər məsuliyyətə cəlb edilməyib. Bu barədə Yasamal rayon prokuroruna, respublika prokurorluğuna dəfələrlə müraciətlər edilib, qəbullar keçirilib, lakin hələ ki, heç bir xeyri yoxdur.

Mövzunu diqqətdə saxlayacaq və yeni gəlişmələrlə oxucuları tanış edəcəyik.

P.S. Redaksiya qarşı tərəfin mövqeyinə yer ayırmağa hazırdır.

Ana səhifəyə dön