Səbail Rayon Məhkəməsi şirkətlə bağlı ziddiyyətli qərarlar verir

Dünən “Caspian Service” şirkətinin təsisçisi və rəhbəri Rəhim Sultanovun müraciəti əsasında prokurorluq və ədliyyə orqanlarının bir-birinə zidd qərarları, dələduzluqla bağlı açılmış cinayət işinə təzyiqlər barədə yazı yayımlamışdıq. Reyting.az bu məsələ barədə əlavə məlumat verəcəyini bildirmişdi və bu gün də ünvanımıza daxil olan yeni məlumatlarla oxucularımızı tanış edirik.

Yaxın günlərdə hamımız şahidi olduq ki, hətta Milli Məclisin üzvü də qanunu pozarsa, qanunda nəzərdə tutulan cəzasını alacaq. Lakin, belə çıxır ki, dövlətçiliyin bu üzünü görməyən şəxslər hələ də prokurorluq və ədliyyə orqanlarında fəaliyyət göstərirlər.

Başa düşürük ki, işləyən hər bir insan bilməyərəkdən səhv edə bilər. Lakin, səlahiyyətli və vəzifəli şəxs, onu xəbərdar edəndən sonra da, qəsdən qanunsuzluğa yol verirsə, dələduzluq cinayətini törədənləri himayəsinə götürürsə, bunun nəticəsi çox pis olur.

Həmçinin dünənki yazıdan məlumdur ki, 11 fevral 2020-ci ildə Bakı Şəhər Prokurorluğu tərəfindən qanunsuz qərar qəbul olunub, prokurorluq özünün 21.11.2018-ci il tarixli qərarına zidd olsa da dələduzluq barədə cinayət işinin başlanma qərarını ləğv edib. Hansı ki, belə bir prosessual sənəd qanunvericilkdə nəzərdə tutulmayıb. Rəhim Sultanovun müxtəlif instansiyalara 1 il ərzində davam edən şikayətlərindən sonra 02 fevral 2021-ci il tarixdə Səbail Rayon Məhkəməsində məhkəmə nəzarəti qaydasında hakim Ülviyyə Şükürova həmin qərarı ləğ edib və cinayət işi istintaq orqanına göndərilib. Aktiv istintaq hərəkətləri nəticəsində ifşaolunma mərhələsində olan Elmaz Hüseynov-Emin Hüseynov-Qurban Verdiyev birliyi yenidən əvvəlki metodlarına qayıdaraq öz havadarları vasitəsilə məhkəmələrə və istintaqa təsir etmək yolu tutublar. Belə ki, onlar Səbail Rayon Məhkəməsinin qanuni qərarının ləğvinə və istintaqın xitam olunmasına çalışırlar. Bu işdə isə onlara prokurorluq və ədliyyə orqanlarında işləyən “tanışları” himayəçilik göstərir.(?)

Təsəvvür edin ki, işdə şahid olan Elmaz Hüseynov özünün apellyasiya şikayətində statusunu təqsirləndirilən şəxs kimi göstərir, halbuki o, həmin işdə hələ ki, şahiddir. Səbail Rayon Məhkəməsinin 02 fevral 2021-ci il qərarını Elmaz Hüseynov 21.06.2021-ci ildə əldə etsə də 3 günlük müddəti buraxaraq 29.06.2021-də apellyasiya şikayəti verir və onun üzrsüz səbəbdən buraxılan müddətinə Səbail Rayon Məhkəməsi göz yumur. Səbail məhkəməsi Elmaz Hüseynovun qanunsuz olan şikayətinə 14.07.2021-də baxarkən şikayətçi Rəhim Sultanovu və vəkilini iclasın yeri və vaxtı barədə xəbərdar etmir. İclas tam gizli şəkildə keçirilir. Ən acınacaqlısı isə odur ki, Səbail Rayon Məhkəməsi özünün 14.07.2021-ci il qərarında (qərarın surəti aşağıda əlavə edilir) qanuni və əsaslı heç bir maddə və norma göstərə bilmir. Ona görə ki, belə bir norma ümumiyyətlə yoxdur. Görəsən nə baş verdi ki, Səbail Rayon Məhkəməsi özünün əleyhinə qərar qəbul etmək məcburiyyətində qaldı və bunu şikayətçidən gizlədərək həyata keçirdi? Görəsən işdə şahid olan Elmaz Hüseynov və onun şərikləri nəyə görə istintaqın aparılmasından qorxurlar və hər vasitə ilə çalışırlar ki, cinayət təqibi yarımçıq sona çatsın?

Diqqət etdinizsə həm prokurorluq, həm də məhkəmə öz qərarlarının əksinə qərarlar çıxararaq istitaqın xitam olunmasına səy göstərir. Səbəb nədir? Əlbəttə, daha yuxarı instansiyadan olan təsir və təzyiq. Səbail Rayon Məhkəməsinin hakiminə Ədliyyə Nazirliyinin yuxarı pillələri səviyyəsində, Yasamal Rayon Polis İdarəsinin İstintaq şöbəsinə isə Baş Prokurorluğun səlahiyyətli idarəsi tərəfindən təzyiqlər olduğu barədə redaksiyamıza və şikayətçiyə məlumatlar verilib.

Ümid edirik ki, Bakı Apellyasiya Məhkəməsi bundan əvvəl baş vermiş qanun pozuntularını davam etdirməyəcək və işə qanuni və ədalətli şəkildə baxaraq əsaslı qərar qəbul edəcək.

P.S. Qeyd edək ki, Rəhim Sultanovun qarşılaşdığı qanunsuzluq barədə dünənki yazıdan sonra Bakı Apellyasiya Məhkəməsi 05 avqust 2021-ci ilə təyin etdiyi iclası, 09.08.2021-ci ilə keçirib. Həmin məhkəmə barədə əlavə məlumat veriləcək.

Redaksiyadan: Yazıda adları çəkilən şəxslərin mövqeyini verməyə hazırıq.